କେନ୍ଦ୍ରାପଡ଼ା ଅଫିସ, ୨୯ା୭: ଗ୍ୟାଙ୍ଗଷ୍ଟର ସେକ୍ ହାଇଦର ଅଲ୍ଲୀଙ୍କର ଗତ ୨୪ତାରିଖରେ ପୋଲିସ ଏନ୍କାଉଣ୍ଟରରେ ମୃତ୍ୟୁ ହୋଇଛି। ତାଙ୍କ ମୃତ୍ୟୁ ପରେ ପାରମ୍ପରିକ ସଂସ୍କାର କାର୍ଯ୍ୟକ୍ରମରେ ସାମିଲ ପାଇଁ ପୁଅ ସେକ୍ କାଦିର ଓରଫ ମୁନା କେନ୍ଦ୍ରାପଡ଼ା ଜିଲା ସେସନ୍ସ କୋର୍ଟରେ ମଧ୍ୟବର୍ତ୍ତୀ କାଳୀନ ଜାମିନରେ ଯିବା ପାଇଁ ଆବେଦନ କରିଥିଲେ। ତେବେ ଏହି ଆବେଦନକୁ ଜିଲା ଜଜ୍ ଗୋପାଳ ଚନ୍ଦ୍ର ବେହେରା ବୁଧବାର ଖାରଜ କରିଦେଇଛନ୍ତି। ଆଇନଶୃଙ୍ଖଳା ପରିସ୍ଥିତି ଓ ମୁନାଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ଏହି ଆବେଦନ ଖାରଜ ହୋଇଥିବା ଆଦେଶନାମାରେ ଉଲ୍ଲେଖ କରାଯାଇଛି। ଏ ସମ୍ପର୍କରେ ମୁନାଙ୍କ ଓକିଲ ରବିନାରାୟଣ ମହାନ୍ତି କହିଛନ୍ତି, ହାଇଦରଙ୍କ ମୃତ୍ୟୁ ପରେ ପରିବାରର ପୁରୁଷ ସଦସ୍ୟ କେହି ଘରେ ନାହାନ୍ତି। ମୃତ୍ୟୁର ପାରମ୍ପରିକ ବିଧି ପାଇଁ ଜୁଲାଇ ୨୪ରୁ ସେପ୍ଟେମ୍ବର ୬ ପର୍ଯ୍ୟନ୍ତ ମଧ୍ୟବର୍ତ୍ତୀ କାଳୀନ ଜାମିନ ପାଇଁ ମୁନା କୋର୍ଟରେ ଆବେଦନ କରିଥିଲେ। ଏହା ଖାରଜ ହୋଇଛି। ମୁନାଙ୍କୁ ଜାମିନରେ ଆସିବା ପାଇଁ ଉଚ୍ଚ ନ୍ୟାୟାଳୟର ଆଶ୍ରୟ ନିଆଯିବ ବୋଲି ସେ କହିଛନ୍ତି। ସୂଚନାଯୋଗ୍ୟ, ମୁନାଙ୍କ ନାମରେ ଅଦ୍ୟାବଧି ୧୮ ମାମଲା ରୁଜୁ ହୋଇଛି। ୨୦୧୧ରେ ସେ ଗିରଫ ହୋଇ ଚୌଦ୍ୱାର ଜେଲରେ ଅଛନ୍ତି। ଗତ ୨୪ ତାରିଖରେ ତାଙ୍କ ବାପା ହାଇଦରଙ୍କୁ ଚୌଦ୍ୱାର ଜେଲରୁ ବାରିପଦା ଜେଲକୁ ସ୍ଥାନାନ୍ତର ସମୟରେ ବାଲେଶ୍ୱର ଜିଲା ସିମୁଳିଆଠାରେ ଏନ୍କାଉଣ୍ଟର କରାଯାଇଥିଲା।
