ନୂଆଦିଲ୍ଲୀ,୨୯।୭: ବ୍ୟାଙ୍କ ଉପରେ କୌଣସି କାରଣବଶତଃ ଯଦି ମୋରାଟୋରିୟମ ଲାଗେ ତେବେ ନିଜ ଜମା ଅର୍ଥ ରାଶି ଉଠାଣ ନେଇ ଜମାକାରୀଙ୍କୁ ବେଶି ସମସ୍ୟା ସାମ୍ନା କରିବାକୁ ପଡ଼ିବ ନାହିଁ। ଡିପୋଜିଟ୍ ଇନ୍ସ୍ୟୁରାନ୍ସ ଆଣ୍ଡ କ୍ରେଡିଟ୍ ଗ୍ୟାରେଣ୍ଟି କର୍ପୋରେଶନ (ଡିଆଇସିଜିସି) ଆଇନରେ ସଂଶୋଧନକୁ କେନ୍ଦ୍ର କ୍ୟାବିନେଟ ବୁଧବାର ମଞ୍ଜୁରୀ ଦେଇଛି। ଫଳରେ ବ୍ୟାଙ୍କ ଉପରେ କଟକଣା ଲାଗିଲେ ମଧ୍ୟ ଜମାକାରୀ ୯୦ ଦିନରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଉଠାଇପାରିବେ। ପଞ୍ଜାବ ଆଣ୍ଡ ମହାରାଷ୍ଟ୍ର ସମବାୟ (ପିଏମ୍ସି) ବ୍ୟାଙ୍କ ଏବଂ ୟେସ୍ ବ୍ୟାଙ୍କ ଉପରେ ଆର୍ବିଆଇ ମୋରାଟୋରିୟମ ଲଗାଇବା ଯୋଗୁ ଜମାକାରୀ ନିଜ ଜମା ରାଶି ବ୍ୟାଙ୍କରୁ ଉଠାଇପାରି ନ ଥିଲେ। ଏଭଳି ଘୋଷଣା ଦ୍ୱାରା ନୂଆ ଆଇନ ପରିସରରେ ୯୮.୩% ଜମା ଆକାଉଣ୍ଟ ଏବଂ ମୋଟ ଜମା ମୂଲ୍ୟର ୫୦.୯% ପରିସରଭୁକ୍ତ ହେବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଛନ୍ତି। ବ୍ୟାଙ୍କ ମୋରାଟୋରିୟମରେ ରହିଲେ ମଧ୍ୟ ନୂଆ ପଦକ୍ଷେପ କାର୍ଯ୍ୟକାରୀ ହୋଇପାରିବ। ଆର୍ବିଆଇ କୌଣସି ବ୍ୟାଙ୍କ ଉପରେ ମୋରାଟୋରିୟମ ଲଗାଇବାର ୪୫ ଦିନ ମଧ୍ୟରେ ଜମାକାରୀଙ୍କ ଦାବି କରିଥିବା ଅର୍ଥ ସଂଗ୍ରହ କରାଯିବ। ଏହାକୁ ଡିଆଇସିଜିସି ନିକଟରେ ଜମା କରାଯିବ। ସମସ୍ତ ଜମାଦାବିକୁ କର୍ପୋରେଶନ ରିୟଲଟାଇମ ବା ଠିକ୍ ସମୟ ମଧ୍ୟରେ ପ୍ରୋସେସ୍ କରିବ। ମୋରାଟୋରିୟମ ଲାଗୁ ହୋଇଥିବା ବ୍ୟାଙ୍କଗୁଡ଼ିକ ମଧ୍ୟ ନୂଆ ନିୟମ ପରିସରଭୁକ୍ତ ହେବେ। ପ୍ରତି ୧୦୦ ଟଙ୍କା ଜମା ଉପରେ ବ୍ୟାଙ୍କ ୧୨ ପଇସା ପ୍ରିମିୟମ ଦେବେ। ଏହା ପୂର୍ବରୁ ୧୦ ପଇସା ରହିଥିଲା। ୧୦୦ ଟଙ୍କା ଜମା ଉପରେ ପ୍ରିମିୟମ ୧୫ ଟଙ୍କାରୁ ଊର୍ଦ୍ଧ୍ୱ ନ କରିବାକୁ ଆଇନରେ ଉଲ୍ଲେଖ ରହିଛି। ୯୮.୩% ଜମାକାରୀଙ୍କୁ ନୂଆ ନିୟମ ପରିସରଭୁକ୍ତ କରାଯାଇଥିବାରୁ କ୍ଷୁଦ୍ର ଜମାକାରୀଙ୍କ ଲାଗି ଏକ ବୃହତ୍ ଆଶ୍ୱସ୍ତି ବୋଲି ସୀତାରାମନ କହିଛନ୍ତି। ଏହାବାଦ ବୁଧବାର ସରକାର ଲିମିଟେଡ୍ ଲାଏବିଲିଟି ପାର୍ଟନରଶିପ ଆଇନରେ ମଧ୍ୟ ସଂଶୋଧନ କରିଛନ୍ତି।
