ବେଙ୍ଗାଲୁରୁ,୪।୮: ବେଙ୍ଗାଲୁରୁରେ ଜଣେ ମହିଳା ରାସ୍ତାରେ ଯାଉଥିବାବେଳେ ଏକ ହୃଦୟଥରା ଘଟଣା ଘଟିଛି। ଅଚାନକ ଜଣେ ବ୍ୟକ୍ତି ଉଡିକି ଆସି ମହିଳାଙ୍କୁ ଏତେ ଜୋରରେ ଧକ୍କା ଦେଇଥିଲେ ଯେ, ମହିଳା ତଳେ ପଡିଯାଇଥିଲେ। ଏହାଦ୍ୱାରା ସେ ଗୁରୁତର ଆହତ ହୋଇଛନ୍ତି। ତାଙ୍କ ଶରୀରରେ ୫୨ଟି ଷ୍ଟିଚ୍ ପଡିଛି। ସୋସିଆଲ ମିଡିଆରେ ଏହାର ସିସିଟିଭି ଫୁଟେଜ୍ ଭାଇରାଲ ହୋଇଛି। ସୂଚନାଯୋଗ୍ୟ, ଟିସି ପାଲ୍ୟା ରୋଡରେ ଏକ ଟେଲିକମ୍ ତାର ଝୁଲୁଥିଲା। ତାରଟି ଏତେ ଢିଲା ଯେ ଓହଳି ପଡି ରାସ୍ତାରେ ଲାଗୁଥିଲା। ଏକ ଓଟୋ ଚକାରେ ଲାଗିଯିବା ଫଳରେ ଡ୍ରାଇଭର ଜଣଙ୍କ ତାରଟିକୁ ବାହାର କରୁଥିଲେ। ଏହି ସମୟରେ ଏକ ଗାଡି ଆସିବାରୁ ତାରରେ ଫଶି ହୋଇଯାଇଥିଲା। ଫଳରେ ଅଟୋ ଡ୍ରାଇଭର ଜଣଙ୍କ ଛିଟ୍କି ହୋଇ ମହିଳାଙ୍କୁ ଧକ୍କା ଦେଇଥିବା ସିସିଟିଭିରୁ ଜଣାପଡିଛି। ଗତ ଜୁଲାଇ ୧୬ରେ ଏହି ଘଟଣା ଘଟିଥିଲା। ୪୨ ବର୍ଷୀୟା ସୁନୀତାଙ୍କ କହିବା ଅନୁଯାୟୀ ମୁଁ ଅନ୍ନପୁର୍ଣ୍ଣେଶ୍ୱରୀ ହୋଟେଲକୁ ଯାଉଥିବାବେଳେ ହଠାତ୍ ମୋତେ ଜଣେ କେହି ଡାକିଥିଲେ। ପଛକୁ ଅନେଇଲା ବେଳକୁ ବ୍ୟକ୍ତି ଉଡିକି ମୋ ଶରୀରରେ ପିଟି ହୋଇଥିଲେ। ପରେ ମୁଁ ରାସ୍ତାରେ ପଡିଯାଇଥିଲି। ମୋ ବେକରୁ ପ୍ରବଳ ରକ୍ତ ବାହାରିଥିଲା। ସ୍ବାମୀ ପାଖରେ କାମ କରୁଥିଲେ। ସେ ଘଟଣାସ୍ଥଳରେ ପହଞ୍ଚି ହସ୍ପିଟାଲ ମୋତେ ଦେଇଥିଲେ। ଏବେ ୫୨ଟି ଷ୍ଟିଚ୍ ପଡିଥିବା ସେ କହିଛନ୍ତି। ଏହି ଘଟଣାରେ ପୋଲିସ ଟେଲିକମ କମ୍ପାନୀ ନାଁରେ ଏକ ମାମଲା ରୁଜୁ କରିଛି।
