ମୁମ୍ବାଇ,୪।୫ : ବିଭିନ୍ନ ଦଳର ଖେଳାଳି କୋଭିଡ୍-୧୯ରେ ଆକ୍ରାନ୍ତ ଥିବା ଜଣାପଡ଼ିବା ପରେ ଆଇପିଏଲର ୧୪ତମ ସଂସ୍କରଣକୁ ସ୍ଥଗିତ କରି ଦିଆଯାଇଛି। ଏଥି ଯୋଗୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ବଡ଼ ଆକାରରେ କ୍ଷତି ସହିବାକୁ ପଡ଼ିବ। ଚଳିତ ଆଇପିଏଲ ମଧ୍ୟାନ୍ତରରୁ ସ୍ଥଗିତ ହେବାରୁ ଆମେ ୨ ହଜାର କିମ୍ବା ଅଢ଼େଇ ହଜାର କୋଟି ଟଙ୍କାର କ୍ଷତି ସହିବୁ। ଏ ନେଇ ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି।
ଚଳିତ ଆଇପିଏଲରେ ମୋଟ ୬୦ ମ୍ୟାଚ୍ ମଧ୍ୟରୁ କେବଳ ୨୯ଟି ମ୍ୟାଚ୍ ଖେଳାଯାଇଛି। ଷ୍ଟାର ସ୍ପୋଟର୍ସ ୧୬,୩୪୭ କୋଟି ଟଙ୍କାରେ ୫ ବର୍ଷ ପାଇଁ କିଣିଥିଲା ପ୍ରସାରଣ ଅଧିକାର। ଏହାକୁ ହିସାବ କଲେ ପ୍ରସାରଣ ବାବଦକୁ ବର୍ଷକୁ ୩୨୬୯.୪ କୋଟି ଟଙ୍କା ପାଉଥିଲା ବିସିସିଆଇ। ଗୋଟିଏ ସିଜନରେି ୬୦ ମ୍ୟାଚ୍ ଖେଳାଗଲେ, ମ୍ୟାଚ୍ ପିଛା ବୋର୍ଡକୁ ୫୪.୫ କୋଟି ଟଙ୍କା ମିଳେ। କିନ୍ତୁ ୨୯ଟି ମ୍ୟାଚ୍ ଖେଳାଯାଇଥିବାରୁ ବୋର୍ଡ ୧୫୮୦ କୋଟି ଟଙ୍କା ହାସଲ କରିଛି। ଏଥି ଯୋଗୁ ବିସିସିଆଇ ସିଧାସଳଖ ୧୬୯୦ କୋଟି ଟଙ୍କା ହରାଇଛି।
ମୋବାଇଲ ଉତ୍ପାଦନକାରୀ କମ୍ପାନୀ ଭିଭୋ ଟୁର୍ନାମେଣ୍ଟ ଟାଇଟଲ ପ୍ରାୟୋଜକ ଭାବେ ପ୍ରତ୍ୟେକ ସେସନରେ ୪୪୦ କୋଟି ଟଙ୍କା ପ୍ରଦାନ କରିଥାଏ। ଆଇପିଏଲ ସ୍ଥଗିତ ରହିବା ଫଳରେ ବୋର୍ଡ ଏହାର ଅଧା ଅର୍ଥ ହରାଇବ। ପୁଣି ସହକାରୀ ପ୍ରୟୋଜକ ଭାବେ ଅନ୍ଏକାଡେମୀ, ଡ୍ରିମ୍ ୧୧, ସିଆରଇଡି, ଅପ୍ଷ୍ଟୋକ୍ସ ଓ ଟାଟା ମୋଟର୍ସ ପ୍ରତ୍ୟେକ ୧୨ କୋଟି ଟଙ୍କା ପ୍ରଦାନ କରିଥାନ୍ତି। ବର୍ତ୍ତମାନ ଏହି ପ୍ରାୟୋଜକମାନେ ଏହାର ଅଧା ଅର୍ଥ ପ୍ରଦାନ କରିବେ। ଫଳରେ ଏ ବାବଦରେ ବୋର୍ଡ ମୋଟ ଉପରେ ୨୨୦୦ କୋଟି ଟଙ୍କା ହରାଇବ। ପ୍ରକୃତରେ ଏହାଠାରୁ ଅଧିକ ଅର୍ଥ ବିସିସିଆଇ ହରାଇବ ବୋଲି ଅନୁମାନ କରାଯାଉଛି।
