ଶୁଆଙ୍କର ମଣିଷ ଭଳି ନା ଜିଭ ଅଛି, ନା ଓଠ, ନା ହିଁ ଅଛି ତାଳୁ। ସେମାନଙ୍କର ଭୋକାଲ କର୍ଡ ବି ନାହିଁ। ତଥାପି ସେମାନେ ମଣିଷ ପରି କଥା କହିପାରନ୍ତି। ତେବେ ଏହା ସମ୍ଭବ ହୁଏ କେମିତି?
ବିଜ୍ଞାନ କହେ, ଶୁଆର ଟ୍ରାକିଆ ବା ଶ୍ୱାସନଳୀରେ ସିରିଂକ୍ସ ନାମକ ଏକ ଅଙ୍ଗ ଥାଏ, ଯାହାକି ଫୁସ୍ଫୁସ୍ ଓ ଓ୍ବିଣ୍ଡ ପାଇପ୍ ମଝିରେ ଥାଏ। ମଣିଷ ଗଳାରେ ଥିବା ଲାରିଂକ୍ସ(ଶବ୍ଦପେଟି) ପରି ସିରିଂକ୍ସର ଭୋକାଲ ଫୋଲ୍ଡ ବି ଥାଏ। ଯେତେବେଳେ ଶୁଆ ଶ୍ୱାସକ୍ରିୟା କରେ ବାୟୁ ସିରିଂକ୍ସ ଦେଇ ଗତି କରେ। ମଣିଷର ଲାରିଂକ୍ସଠାରୁ ସିରିଂକ୍ସ ଅଧିକ ଫ୍ଲେକ୍ସିବଲ୍। ତେଣୁ ବାୟୁ ଗତି କଲାବେଳେ ଏହାର ଉଭୟ ପାର୍ଶ୍ୱରେ କମ୍ପନ ସୃଷ୍ଟି ହୋଇ ଭିନ୍ନ ଭିନ୍ନ ଶବ୍ଦ ବାହାରିଥାଏ। ତା’ଛଡ଼ା ଶୁଆ କେଉଁ ପ୍ରକାରର ଶବ୍ଦ ବାହାର କରିବ ତାହା ତା’ ଗଳାରେ ଥିବା ଅନେକଗୁଡିଏ ମାଂସପେଶୀ ଓ ସିରିଂକ୍ସ ବାହାରେ ଥିବା ଅନେକ ନରମ ହାଡର ରିଙ୍ଗ ଦ୍ୱାରା ନିୟନ୍ତ୍ରିତ ହୋଇଥାଏ। ତା’ସହ ନକଲ କରିବାର ସଜ୍ଞାନାତ୍ମକ ତନ୍ତ୍ର ବା କଗନିଟିଭ ମେକାନିଜ୍ମ ଅଫ୍ ଇମିଟେସନ୍ ଦ୍ୱାରା ସେମାନେ ମଣିଷ ଯାହା କହେ ତାକୁ ନକଲ କରି ମଣିଷ ଭଳି କଥା କହିପାରନ୍ତି। ଏହାବାଦ ଶୁଆର ମୋଟା ଜିଭ ବି ମଣିଷ ପରି ଶବ୍ଦ ବାହାର କରିବାରେ ସାହାଯ୍ୟ କରିଥାଏ। କାରଣ ଜିଭର ମୁଭମେଣ୍ଟ ବି ଶବ୍ଦରେ ପରିବର୍ତ୍ତନ ଆଣିବାରେ ସାହାଯ୍ୟ କରିଥାଏ।
ଶୁଆ ମଣିଷ କହୁଥିବା କଥାର ନକଲ କରିପାରେ। ହେଲେ ସେମାନେ ଯେଉଁ ଶବ୍ଦକୁ ନକଲ କରନ୍ତି ତା’ର ଭାବ ବା ଅର୍ଥ ସେତେଟା ବୁଝି ନ ଥାନ୍ତି ବୋଲି କିଛି ଗବେଷଣା କହେ। ଅର୍ଥାତ୍ ଶୁଆ ଆପଣଙ୍କୁ ପଚାରିପାରେ ଯେ, ଆପଣ କେମିତି ଅଛନ୍ତି। ତା’ର ଅର୍ଥ ନୁହେଁ କି ସେ ନିଜର ମସ୍ତିସ୍କକୁ ବ୍ୟବହାର କରି ଭାବି ଚିନ୍ତି କହିଥାଏ। ବରଂ ସେ ଏହି କଥାକୁ ବାରମ୍ବାର କାହା ମୁହଁରୁ କହୁଥିବାର ଶୁଣି ତାକୁ ମନେ ରଖି ନକଲ କରି କହେ। ଆମେ ଏହା ବି କହିପାରିବା ଯେ, ଶୁଆ ଭଲ ମିମିକ୍ରି କରିପାରେ। ତେବେ ଆଉ କିଛି ଗବେଷଣା ଏହାର ବିପରୀତ କହେ ଯେ, ଶୁଆର ମସ୍ତିସ୍କ ବଡ଼ ଓ ମଣିଷର ମସ୍ତିସ୍କ ସଂରଚନା ପରି ହୋଇଥାଏ। ତେଣୁ ଏହା ଏକ ବୁଦ୍ଧିମାନ ପକ୍ଷୀ। ଏହାର ଜଟିଳ ସ୍ବର କ୍ଷମତା ଥିବା ସହ ଜ୍ଞାନ ବି ଅଛି। ତା’ଛଡ଼ା ଏମାନେ ସାମାଜିକ ସଂରଚନା ଭିତରେ ରହନ୍ତି। ତେଣୁ ଆଖପାଖର ମଣିଷଙ୍କ ସହ କଥା ହେବାକୁ ଚେଷ୍ଟା କରନ୍ତି ଓ ମିଶିଥାନ୍ତି। ଏମାନେ ଖାଲି ମଣିଷ ପରି କଥା ହୁଅନ୍ତି ନାହିଁ। ବରଂ ଗୀତ ବି ଗାଇ ପାରନ୍ତି। ସେପୁଣି ମଣିଷ ଭଳି ଖୁସି ଥିବାବେଳେ।
ଭଲ କଥା କହୁଥିବା ଶୁଆ: ଆଫ୍ରିକାନ ଗ୍ରେ ଶୁଆ ମଣିଷ ପିଲାଙ୍କ ଭଳି କଥା କହିପାରେ। ତା’ଛଡା ୟେଲୋ ନେପ୍ଡ ଆମାଜନ ପ୍ୟାରୋଟ୍, ଡବଲ ଆମାଜନ ୟେଲୋ ହେଡ ଆମାଜନ ପ୍ୟାରୋଟ, ଏକଲିକଟସ୍ ପ୍ୟାରୋଟ୍ ଆଦି ଭଲ କଥା କହୁଥିବା ଶୁଆଭାବେ ଜଣାଶୁଣା।
