ନିରାକାରପୁର,୨୧ା୮(ଡି.ଏନ୍.ଏ.): ତହସିଲଦାର କୋର୍ଟଙ୍କ ନିର୍ଦ୍ଦେଶକ୍ରମେ ପୁରୀ ଜିଲା ଗଡ଼ିଶାଗୋଦା ଥାନା ଅନ୍ତର୍ଗତ ଗଡ଼ଖାରଦ ପଞ୍ଚାୟତ ଘଣ୍ଟପୁର ଅଞ୍ଚଳରେ ହୋଇଥିବା ବେଆଇନ ଘର, ଗୁହାଳ ଏବଂ ଦୋକାନକୁ ପ୍ରଶାସନ ପକ୍ଷରୁ ଶନିବାର ଉଚ୍ଛେଦ କରାଯାଇଛି ା
ପ୍ରକାଶ ଯେ, ପୁରୀ-ଖୋର୍ଦ୍ଧା ସୀମାନ୍ତ ନିରାକାରପୁର ଥାନା ଅନ୍ତର୍ଗତ ଡିଆ ପଞ୍ଚାୟତ ବାଲିଗାଁ(କପିଳେଶ୍ୱରପୁର)ନିରାକାରପୁରଠାରେ ଘଣ୍ଟପୁର ଅଞ୍ଚଳରେ କିଛି ସରକାରୀ ଜାଗା ରାସ୍ତାପାର୍ଶ୍ୱକୁ ଲାଗିକରି ରହିଛି। ଏହି ଜାଗାରେ ଖୋର୍ଦ୍ଧା ଜିଲା ବାଲିଗାଁର ୩ଟି ପରିବାର ଘର, ଗୁହାଘର ଓ ଦୋକାନ କରି ଚଳୁଥିଲେ। ତେବେ ୨୦୨୦ରେ ଗ୍ରାମକୁ ଜାଗା ଆବଶ୍ୟକ ପଡୁଥିବାରୁ ଘଣ୍ଟପୁର ଗା୍ରମବାସୀ କଣାସ ତହସିଲଦାରଙ୍କ କୋର୍ଟର ଆଶ୍ରୟ ନେଇଥିଲେ। ଏହାକୁ ଭିତ୍ତିକରି କୋର୍ଟଙ୍କ ନିର୍ଦ୍ଦେଶରେ ଆଜି ଉଚ୍ଛେଦ ଚାଲିଥିଲା ବେଳେ ସେଠାରେ ଘର କରିଥିବା ପରିବାରର ମହିଳାମାନେ ଉଛେଦ କରିବାକୁ ଯାଇଥିବା ଅଧିକାରୀଙ୍କ ଗୋଡ଼ ଧରି ନ ଭାଙ୍ଗିବାକୁ ଅନୁରୋଧ କରିଥିଲେ। ଏହି ଉଚ୍ଛେଦ କାର୍ଯ୍ୟକ୍ରମରେ କଣାସ ତହସିଲଦାର ଲକ୍ଷ୍ମୀଧର ମହାରଣା,ଗଡ଼ିଶାଗୋଦା ଥାନାଧିକାରୀ ନିରଞ୍ଜନ ଚନ୍ଦ୍ର ଲେଙ୍କା, ପୁରୀ ସଦର ଏସ୍ ଡିପି ଏ ରାଜ କିଶୋର ମୁଣ୍ଡୁଙ୍କ ସହିତ ଦୁଇ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଥିଲେ।
