ଝାରସୁଗୁଡ଼ା ଅଫିସ୍,୨୧।୨: ଝାରସୁଗୁଡା ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ମତଦାନ ୨ପର୍ଯ୍ୟାୟରେ ଶେଷ ହୋଇଛି। ଏଥିମଧ୍ୟରେ ପ୍ରାର୍ଥୀଙ୍କ ଭାଗ୍ୟ ଭୋଟ୍ବାକ୍ସରେ ବନ୍ଦ ହୋଇ ରହିଛି। ଆସନ୍ତା ୨୬, ୨୭, ୨୮ତାରିଖରେ ପର୍ଯ୍ୟାୟକ୍ରମେ ଭୋଟ୍ଗଣତି ହୋଇ ବିଧିବଦ୍ଧଭାବେ ନିର୍ବାଚନ ଫଳାଫଳ ଘୋଷଣା ହେବ। ଏଥିମଧ୍ୟରେ ପ୍ରାର୍ଥୀଙ୍କ ହାର୍ଜିତ୍କୁ ନେଇ ଗାଁ ଛକ ପାନ ଓ ଚା ଦୋକାନ ଆଦି ଖଟିରେ ଚର୍ଚ୍ଚା ଜୋର୍ ଧରିଛି। ପ୍ରାର୍ଥୀଙ୍କ ସମର୍ଥକମାନଙ୍କ ମଧ୍ୟରେ କିଏ କହୁଛି ବହୁ ଭୋଟ୍ ବ୍ୟବଧାନରେ ଆମେ ଜିତୁଛୁ ଆଉ କିଏ କହୁଛି କମ୍ ଭୋଟ୍ରେ ହେଲେ ମଧ୍ୟ ଆମେ ଜିତିବୁ। ଫଳାଫଳ ଷୋଷଣା ନ ହେବା ପୂର୍ବରୁ ପ୍ରାର୍ଥୀ ଓ ତାଙ୍କ ସମର୍ଥକମାନେ କୁହୁଡିରେ ପହଁରୀ ବିଜୟର ସ୍ବପ୍ନ ଦେଖୁଛନ୍ତି।
ଏଭଳି ସ୍ଥିତିରେ ରାଜନୈତିକ ଦଳମାନେ ପଞ୍ଚାୟତ ସମିତି ଅଧ୍ୟକ୍ଷ ପଦ ହାତେଇବା ପାଇଁ ଏବେଠାରୁ ଗୋଟିଚାଳନା ରଣକୌଶଳ ଆରମ୍ଭ କରିଦେଇଛନ୍ତି। ଏଥିରେ ବିଜେଡି ଦଳ ଆଗରେ ରହି ଜିଲାର ୫ପଞ୍ଚାୟତ ସମିତି ଅଧ୍ୟକ୍ଷ ପଦ ହାତେଇବା ପାଇଁ ଯୋଜନା ଚଳାଇଛି। ଏଥିମଧ୍ୟରେ ବିରୋଧୀ ମଧ୍ୟ ପଞ୍ଚାୟତ ସମିତି ଅଧ୍ୟକ୍ଷ ପଦ ହାତେଇବା ଆଶାରେ ରହିଛନ୍ତି। ଏଭଳି ସ୍ଥିତିରେ ଜିଲାରେ ନିର୍ବାଚନ ମତଦାନ ଶେଷ ହେବା ପରେ ଜିତିବା ସମ୍ଭାବନା ଥିବା ସମିତିସଭ୍ୟ ପ୍ରାର୍ଥୀମାନଙ୍କୁ ଉଠାଇନେଇ ଜିଲା ବାହାରେ ଅଜ୍ଞାତ ସ୍ଥାନରେ ରଖିଥିବା ଚର୍ଚ୍ଚା ହେଉଛି। ଏହି ପ୍ରକ୍ରିୟା ଏବେ ଜାରି ରହିଛି। ପ୍ରାର୍ଥୀଙ୍କ ଜିତିବା ସମ୍ଭାବନାକୁ ନେଇ ବିଜେଡି ଦଳ ଦ୍ୱନ୍ଦରେ ରହିଥିବାବେଳେ ଗୋଟିଏ ପଞ୍ଚାୟତରୁ ଏକାଧିକ ପ୍ରାର୍ଥୀଙ୍କୁ ଉଠାଇ ନିଆଯାଇ ଜିଲା ବାହାରେ ପୃଥକ ଅଜ୍ଞାତବାସରେ ରଖାଯାଇଛି। ଫଳାଫଳ ଜଣାପଡିବା ପରେ ବିଜୟୀ ପ୍ରାର୍ଥୀଙ୍କୁ ରଖି ପରାଜିତ ପ୍ରାର୍ଥୀଙ୍କୁ ଦଳ ଛାଡି ଦେବ। ଏବେ ରାଜନୈତିକ ଦଳର ଚକ୍ରବିହୋରେ ବଜୟୀ ସମ୍ଭାବିତ ପ୍ରାର୍ଥୀମାନେ ରହିଛନ୍ତି। ପଞ୍ଚାୟତ ସମିତି ଅଧ୍ୟକ୍ଷ ପଦ ପାଇଁ ଏବେ ବିଭିନ୍ନ ରାଜନୈତିକ ଦଳ ତରଫରୁ ଘୋଡାଦୌଡ ଆରମ୍ଭ ହୋଇଛି। ଏହି ରେସ୍ରେ ବିଜେଡି ଦଳ ଆଗରେ ରହିଛି । ବିଜେଡି ଦଳ ତରଫରୁ ପଞ୍ଚାୟତ ସମିତି ଅଧ୍ୟକ୍ଷ ପଦରେ ବସିବା ପାଇଁ ଏବେ ବହୁ ଆଶାୟୀ ପ୍ରାର୍ଥୀ ରହିଛନ୍ତି। ଏଥିପାଇଁ ନିଜର ସମର୍ଥକମାନଙ୍କୁ ନେଇ ଦଳରେ ଲବି ଆରମ୍ଭ ହୋଇଯାଇଛି। କିଏ କହୁଛି ଦଳରେ ଆମେ ପୁରୁଣା ଆଉ କିଏ କହୁଛି ଆମେ ନେତାଙ୍କ ପାଖଲୋକ ଏଭଳି କହି ଲବି ଆରମ୍ଭ ହୋଇଛି । ପଞ୍ଚାୟତ ସମିତି ଅଧ୍ୟକ୍ଷ ପଦପାଇଁ ଯେଉଁପ୍ରାର୍ଥୀ ସବୁଠାରୁ ଅଧିକ ଖର୍ଚ୍ଚ କରିପାରିବ ଦଳ ସେମାନଙ୍କୁ ପ୍ରଥମେ ପ୍ରାଥମିକତା ଦେବ ବୋଲି ଚର୍ଚ୍ଚା ହେଉଛି। ଏହି ଦୌଡରେ ପ୍ରାର୍ଥୀମାନେ ନିଜକୁ ସାମିଲ କରିବା ପରେ ଏବେ ରାଜନୈତିକ ଦଳରେ ମୁଲଚାଲ ଆରମ୍ଭ ହୋଇଛି। ଏଥିପାଇଁ ଏବେ ଆଶାୟୀଙ୍କ ମଧ୍ୟରେ ଏବେ ପ୍ରତିଯୋଗିତା ଆରମ୍ଭ ହୋଇଯାଇଛି । ଦେଖାଯାଉ ହାତୀ କାହାମୁଣ୍ଡରେ ସୁନା କଳସ ଢାଳୁଛି ତାହା ସମୟ କହିବ ।
