ଛତ୍ରପୁର, ୧୬।୬ (ଦିଲୀପ ସାମଲ): ଘରେ ନିରୀହ ପଶୁ ପାଳିଲେ ଗୃହ ପରିବାର ଭିତରେ ଆତ୍ମୀୟତା ସହିତ ସେବା ମନୋବୃତ୍ତି ବଢ଼େ ବୋଲି ବିଶାସରେ ଅଛି। କିନ୍ତୁ ସେହି ଗୃହ ପାଳିତ କିମ୍ବା ପଦାରେ ବୁଲୁଥିବା ପଶୁଟିଏ ଗୋଟେ ମଣିଷକୁ କାମୁଡ଼ି ଦିଏ, ତେବେ ମଣିଷକୁ ଜଳାତଙ୍କ ଭଳି ଭୟଙ୍କର ରୋଗ ସଂକ୍ରମିତ ହେବାର ସମ୍ଭାବନା ବଢ଼ିଯାଏ। ଛତ୍ରପୁର ସହର କେବେଳ କୁକୁର ବିଲେଇ କାମୁଡ଼ା ସମସ୍ୟାରେ ସୀମିତ ନୂହେଁ ବରଂ ଏଇଠି ମାଙ୍କଡ଼ଙ୍କ ଆତଙ୍କ ମାତ୍ରାଧିକ ବୃଦ୍ଧି ପାଇଛି।
କୁକୁର, ବିଲେଇ, ମାଙ୍କଡ଼ କାମୁଡ଼ିବା ପରେ ଭୟଙ୍କର ଜଳାତଙ୍କ ରୋଗରୁ ରକ୍ଷା ପାଇବା ପାଇଁ ପୂର୍ବରୁ ସରକାରଙ୍କ ତରଫରୁ ମାଗଣାରେ ଜଳାତଙ୍କ ଟିକାକରଣ କରାଯାଏ। ଛତ୍ରପୁର ଉପଖଣ୍ଡ ଚିକିତ୍ସାଳୟରେ ଗତ ମେ’ ମାସରେ ୩୦୦ଟି ଶିଶି ଗ୍ରହଣ ହୋଇଥିବା ବେଳେ ଚଳିତ ଜୁନ ମାସରେ ଏଯାବତ୍ ୨୫୦ଟି ଶିଶି ଗ୍ରହଣ ହୋଇ ସାରିଛି ବୋଲି ଉପଖଣ୍ଡ ଚିକିତ୍ସାଳୟର ଅଧିକ୍ଷକ ଡଃ ଅଲେଖ ପ୍ରଧାନ ସୂଚନା ଦେଇଛନ୍ତି। ସୂଚନା ଅନୁଯାୟୀ ପ୍ରତି ମାସରେ ପ୍ରାୟ ୧୦୦୦ ରୁ ୧୨୦୦ ରୋଗୀ ପଶୁ କାମୁଡ଼ାର ଶିକାର ହୋଇ ଟିକାକରଣ ପାଇଁ ଆସନ୍ତି। ଅର୍ଥାତ୍ ଦୈନିକ ୪୦ – ୫୦ ରୋଗୀଙ୍କୁ କୁକୁର, ବିଲେଇ କିମ୍ବା ମାଙ୍କଡ଼ କାମୁଡ଼ି ଥାଆନ୍ତି। ଗୋଟିଏ ଶିଶିରୁ ୪୦ – ୫୦ ରୋଗୀଙ୍କୁ ଟିକା ଦିଆଯାଏ ଯାହାକି ଗ୍ରହଣ କରିଥିବା ମାସିକ ଟୀକାକରଣ ସମ୍ପୂର୍ଣ୍ଣ ବ୍ୟବହାର ହୋଇଯାଏ ବୋଲି ଡଃ ପ୍ରଧାନ କହିଛନ୍ତି। ଅନ୍ୟପଟେ କୁକୁର ଏବଂ ମାଙ୍କଡଙ୍କ ଉପଦ୍ରବ ଛତ୍ରପୁର ସହରକୁ ଘେରି ରହିଛି। ବୁଦ୍ଧିଜୀବୀ ମହଲରେ ଚର୍ଚ୍ଚା ହୋଇଛି ଯେ ବାହାରେ ବୁଲୁଥିବା କୁକୁରଙ୍କୁ ଟିକାକରଣ ଉପରେ ଓ ମାଙ୍କଡଙ୍କୁ କିଭଳି କୌଶଳକ୍ରମେ କାବୁ କରି ବନାଞ୍ଚଳରେ ଛଡାଯିବ ତାହା ଉପରେ ସରକାର କିଛି ବ୍ୟବସ୍ଥା ଗ୍ରହଣ କରିଲେ ଜନସାଧାରଣ ଉପକୃତ ହୋଇପାରିବେ ବୋଲି ସାଧାରଣରେ ଚର୍ଚ୍ଚା ହେଉଛି ।
