ବିର୍ଲା ଟାୟାର୍ସ ଖୋଲିବା ନେଇ ଆଶା ସଞ୍ଚାର
6:44 amSeptember 23, 2023September 23, 2023 / 04

ବାଲେଶ୍ୱର,୨୩।୯(ମାନସ ବିଶ୍ୱାଳ): ଦୀର୍ଘ ଦିନ ହେବ ବନ୍ଦ ପଡ଼ିଥିବା ବାଲେଶ୍ୱର ଜିଲାର ବୃହତ୍‌ ଶିଳ୍ପ ବିର୍ଲା ଟାୟାର୍ସ ଚାଲୁହେବା ନେଇ ଆଶା ସଞ୍ଚାର ହୋଇଛି। ଆସନ୍ତା ଅକ୍ଟୋବର ୪ ତାରିଖରେ ନ୍ୟାଶନାଲ କମ୍ପାନୀ ଲ’ ଟ୍ରିବ୍ୟୁନାଲ (ଏନ୍‌ସିଏଲ୍‌ଟି) କୋଲକାତା ଶାଖାରେ କମ୍ପାନୀ ସମ୍ପର୍କିତ ମାମଲାର ପ୍ରାୟ ଚୂଡ଼ାନ୍ତ ବିଚାର ହେବାର ସମ୍ଭାବନା ରହିଛି। ଏଣୁ ଏହି କମ୍ପାନୀ ପୂର୍ବ ଭଳି ଚାଲୁ ହେବା ସମ୍ଭାବନା ଥିବା ଶ୍ରମିକ ନେତା ଅରୁଣ କୁମାର ସ୍ବାଇଁ କହିଛନ୍ତି। ବିର୍ଲା ଟାୟାର୍ସ ଦୀର୍ଘ ୩ ଦଶନ୍ଧିରୁ ଊର୍ଦ୍ଧ୍ୱ ସ୍ଥାନୀୟ ଲୋକଙ୍କର ଭରଣପୋଷଣରେ ଏକ ମୁଖ୍ୟ ଉତ୍ସ ପାଲଟିଥିଲା। ଗତ ୨୦୧୭-୧୮ଠାରୁ ବିଭିନ୍ନ ଆର୍ଥିକ ସମସ୍ୟା ଦେଇ ଗତି କରୁଥିବା ବେଳେ କରୋନା ସମୟରେ ସ୍ଥିତି ଗମ୍ଭୀର ହୋଇପଡ଼ିଥିଲା। ଏହାସହ କମ୍ପାନୀ ପାଖାପାଖି କାର୍ଯ୍ୟରତ ଶ୍ରମିକଙ୍କ ୩୦କୋଟି ଟଙ୍କା ବାକି ରଖିଥିବା ବେଳେ ଶିଳ୍ପାନୁଷ୍ଠାନରେ ଅସ୍ଥିରତା ଦେଖାଦେଇଥିଲା। ଶ୍ରମିକଙ୍କ ଦରମା ଦେବାରେ କମ୍ପାନୀ ଅସମର୍ଥତା ଦେଖାଇଥିଲା। ପରେ ବିଭିନ୍ନ ଶ୍ରମିକ ସଙ୍ଗଠନ ପକ୍ଷରୁ ଆନ୍ଦୋଳନ, ଧର୍ମଘଟକୁ ସମ୍ମୁଖୀନ ହେବାକୁ ପଡ଼ିଥିଲା। ଗତ ୨୦୨୧ ମାର୍ଚ୍ଚରୁ କମ୍ପାନୀ ସମ୍ପୂର୍ଣ୍ଣ ବନ୍ଦ ରହିଥିବା ବେଳେ ଶ୍ରମିକଙ୍କ ପକ୍ଷରୁ ନ୍ୟାଶନାଲ କମ୍ପାନୀ ଲ’ ଟ୍ରିବ୍ୟୁନାଲ (ଏନ୍‌ସିଏଲ୍‌ଟି)ରେ ରୁଜୁ ହୋଇଥିବା ମାମଲା ବିଚାରାଧୀନ ରହିଛି। ଉକ୍ତ ମାମଲାରେ ମାଟେରିଆଲ ସପ୍ଲାୟରଙ୍କଠାରୁ ଆରମ୍ଭ କରି ଶ୍ରମିକ ସଙ୍ଗଠନଗୁଡ଼ିକ ପକ୍ଷ ରହିଛନ୍ତି।