ଡୁଙ୍ଗୁରିପାଲି,୨ା୧(ଡି.ଏନ୍.ଏ.): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଅଧୀନ ଡୁଙ୍ଗୁରିପାଲି ଶିଶୁମନ୍ଦିର ଛକ ନିକଟରେ ଶନିବାର ପୂର୍ବାହ୍ନରେ ଏକ ଅଘଟଣ ଘଟିଛି। ଘର ତିଆରି ବେଳେ ମାଟି ତଳେ ଚାପି ହୋଇ ଜଣେ ଯୁବକଙ୍କ ମୃତ୍ୟୁ ଘଟିଛି । ମାଟି ଆଣୁଥିବା ଏକ ହାଇଓ୍ବା ଭାରସାମ୍ୟ ହରାଇ ଓଲଟି ପଡିବା ଫଳରେ ଏହି ଘଟଣା ଘଟିଛି। ମୃତକ ହେଲେ ରଙ୍ଗ ତପନଲାଲ ବର୍ଗେ (୨୮)। ଦୁର୍ଘଟଣା ପରେ ଡ୍ରାଇଭର ଫେରାର ହୋଇଯାଇଛି। ପ୍ରକାଶ ଯେ, ଡୁଙ୍ଗୁରିପାଲି ଅଞ୍ଚଳର ବାସିନ୍ଦା ମୁରଲୀ ବର୍ଗେ ୨୬ ନମ୍ବର ଜାତୀୟ ରାଜପଥ ପାର୍ଶ୍ୱ ଶିଶୁମନ୍ଦିର ଛକ ନିକଟରେ ଏକ ନୂଆ ଘର ତିଆରି କରୁଥିଲେ। ଘରର ପିଲାର ଉଠିଥିବା ବେଳେ ମାଟି ଫିଲିଂ କାମ ହେଉଥିଲା। ଏନେଇ ଏକ ହାଇଓ୍ବାରେ ମାଟି ଅଣାଯାଇ ସେଠାରେ ପକା ଯାଉଥିଲା। ମୁରଲୀଙ୍କ ମଝିଆ ପୁଅ ରଙ୍ଗ ତପନଲାଲ ପୂର୍ବାହ୍ନ ପ୍ରାୟ ୧୦ଟା ବେଳେ ମାଟି ପକା ଯାଞ୍ଚ କରୁଥିଲେ। ଏହି ସମୟରେ ଡ୍ରାଇଭର ଗାଡି ସାଇଡ୍୍ ମାରିବା ବେଳେ ୧୦ ଚକିଆ ହାଇଓ୍ବାଟି ଓଲଟି ପଡିବାରୁ ଘଟଣାସ୍ଥଳରେ ରଙ୍ଗ ତପନଲାଲ ମାଟି ଗଦାରେ ପୋତି ହୋଇଯାଇଥିଲେ। ଖବର ପାଇ ଅଗ୍ନିଶମବାହିନୀ ପହଞ୍ଚି ଜେସିବି ମେଶିନ ସହାୟତାରେ ମାଟିତଳୁ ତାଙ୍କୁ ଉଦ୍ଧାର କରି ଡୁଙ୍ଗୁରିପାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା ା ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ମୃତକଙ୍କ ବଡଭାଇ ରାମରତନଲାଲ ବର୍ଗେ ସ୍ଥାନୀୟ ଥାନାରେ ଲିଖିତ ଅଭିଯୋଗ କରିଛନ୍ତି ା ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି ା ଦୁର୍ଘଟଣାଗ୍ରସ୍ତ ହାଇଓ୍ବା (ନଂ.ଓଆର୦୨ବିଡବ୍ଲୁ-୮୭୪୧) ଜବତ ହୋଇଛି ା ଏ ସଂକ୍ରାନ୍ତରେ ପୋଲିସ ଏକ ମାମଲା(ନଂ ୪/୨୦୨୧) ରୁଜୁ କରି ତଦନ୍ତ ଚଳାଇଛି।
