ବମ୍ବେ: ଘରୋଇ ହିଂସା ଅଭିଯୋଗରେ ସ୍ତ୍ରୀ ଶାଳିନୀ ତଲଓ୍ବାର କୋର୍ଟର ଦ୍ୱାରସ୍ଥ ହେବା ପରେ ଏବେ ଅଡ଼ୁଆରେ ଫସିଛନ୍ତି ରାପର୍ ହନି ସିଂହ। ଅନେକ ମହିଳାଙ୍କ ସହ ଗାୟକଙ୍କର ସମ୍ପର୍କ ଥିଲା। ଯେତେବେଳେ ତାଙ୍କ ବିବାହ ଖବର ସୋସିଆଲ ମିଡିଆରେ ଭାଇରାଲ ହୋଇଥିଲା, ହନି ଡରି ଯାଇ ଅତି ନିର୍ଦ୍ଦୟ ଭାବେ ପିଟିଥିବା ଶାଳିନୀ ଅଭିଯୋଗରେ ଦର୍ଶାଇଛନ୍ତି। ଏବେ ଶାଳିନୀ ଘରୋଇ ହିଂସା, ମହିଳା ସଂରକ୍ଷଣ ଅଧିନିୟମ ଅନୁଯାୟୀ ୧୦ କୋଟି ଟଙ୍କାର କ୍ଷତିପୂରଣ ଦାବି କରିଥିବା ଜଣାପଡ଼ିଛି। ଅଭିଯୋଗର ପ୍ରାରମ୍ଭିକ ଶୁଣାଣି କରି କୋର୍ଟ ପକ୍ଷରୁ ହନିଙ୍କୁ ନୋଟିସ କରାଯାଇଛି। ଏହାଛଡ଼ା ତାଙ୍କର ମିଳିତ ସମ୍ପତି ସହ ସୁନାଗହଣା ଆଦିକୁ ବିକ୍ରି ନ କରିବାକୁ କୁହାଯାଇଛି।
ଅପରପକ୍ଷେ ଶାଳିନୀ ସ୍ବାମୀଙ୍କ ବିରୋଧରେ କରିଥିବା ଅଭିଯୋଗରେ ଶାଶୁ ଭୁପିନ୍ଦର କୌର, ଶ୍ୱଶୁର ସରବଜୀତ ସିଂହ ଏବଂ ନଣନ୍ଦ ସ୍ନେହା ସିଂହଙ୍କ ନାମ ମଧ୍ୟ ରହିଛି। ଦୀର୍ଘଦିନରୁ ସମସ୍ତେ ତାଙ୍କୁ ମାନସିକ ନିର୍ଯ୍ୟାତନା ଦେଉଥିଲେ। ଏଥିଯୋଗୁ ଅବସାଦକୁ ଚାଲିଯାଇଥିଲେ ବୋଲି ସେ କହିଛନ୍ତି।
ତେବେ ହନି ୨୦୧୧ରେ ଶାଳିନୀଙ୍କୁ ବିବାହ କରିଥିଲେ। ଏହାପୂର୍ବରୁ ଦୀର୍ଘ ଦଶ ବର୍ଷ ଧରି ଉଭୟ ସମ୍ପର୍କରେ ରହିଥିଲେ। ହେଲେ ବିବାହର ୩ ବର୍ଷ ପରେ ପ୍ରଶଂସକମାନଙ୍କୁ ହନି ବିବାହ କରିଥିବା ନେଇ ଜଣାପଡ଼ଇଥିଲା। ଏହି ବିବାହ ତାଙ୍କ କ୍ୟାରିୟର ଖରାପ କରୁ ବୋଲି ସେ ଚାହୁଁ ନ ଥିବା ଗାୟକ କହିଥିଲେ।
