ବମ୍ବେ: ଭାରତୀୟ ରାପର ୟୋ ୟୋ ହନି ସିଂହଙ୍କ ସ୍ତ୍ରୀ ଶାଳିନୀ ତଲଓ୍ବାର ଅଗଷ୍ଟ ୩ରେ ଗାୟକଙ୍କ ବିରୋଧରେ ଘରୋଇ ହିଂସା ଅଭିଯୋଗ ଆଣି କୋର୍ଟର ଦ୍ୱାରସ୍ଥ ହୋଇଥିଲେ। ଶାଳିନୀ ଦିଲ୍ଲୀର ତିସ୍ ହଜାରୀ କୋର୍ଟରେ କରିଥିବା ନିଜର ଆବେଦନରେ ହନିଙ୍କ ବିରୋଧରେ ଅନେକ ଚକିତ କଲାଭଳି ଅଭିଯୋଗ ଆଣିଥିଲେ। ଗାୟକଙ୍କର ଅନେକ ମହିଳାଙ୍କ ସହ ଯୌନ ସମ୍ପର୍କ ରହିଛି। ଏପରିକି ସେ ତାଙ୍କୁ ନିର୍ଦ୍ଦୟ ଭାବେ ମାଡ଼ ମାରିବା ସହ ମଦ ବୋତଲ ଫିଙ୍ଗିଥିବା ସେ କହିଥିଲେ। ମାମଲା ପଞ୍ଜୀକୃତ ହେବାର ୩ ଦିନ ପରେ ମୁହଁ ଖୋଲିଛନ୍ତି ହନି। ସେ ନିଜର ସୋସିଆଲ ମିଡିଆ ଆକାଉଣ୍ଟରେ ଏକ ବିବୃତ୍ତି ଜାରି କରି ନିଜର ପକ୍ଷ ରଖିଛନ୍ତି।
ହନି ଲେଖିଛନ୍ତି, ୨୦ ବର୍ଷର ଜୀବନସାଥୀ ଶାଳିନୀ ମୁଁ ଓ ମୋ ପରିବାର ବିରୋଧରେ ମିଥ୍ୟା ଏବଂ କୁତ୍ସିତ ଅଭିଯୋଗ ଆଣିଛନ୍ତି। ଏହା ମୋତେ ଅତ୍ୟନ୍ତ ଦୁଃଖି ଏବଂ ବ୍ୟଥିତ କରିଛି। ଏହା ବହୁତ ଘୃଣିତ କାର୍ଯ୍ୟ। ମୁଁ ନିଜର ଗୀତ ପାଇଁ କଠୋର ସମାଲୋଚନା, ଅତୀତରେ ମୋ ସ୍ବାସ୍ଥ୍ୟ ଉପରେ କଳ୍ପନାଜଳ୍ପନା ଏବଂ ସାମାନ୍ୟ ଭାବେ ନକରାତ୍ମକ ଗଣମାଧ୍ୟମରେ କଭରେଜ ସତ୍ତ୍ୱେ ମୁଁ ସର୍ବସାଧାରଣରେ ବିବୃତ୍ତି କିମ୍ବା ପ୍ରେସ୍ ନୋଟ୍ ଜାରି କରିନାହିଁ। ହେଲେ ଏଥର ନୀରବ ରହିବାର କୌଣସି ଲାଭ ନ ଥିଲା। ମୋର ବୃଦ୍ଧ ବାପାମା’ଙ୍କ ସହ ଦୁଃଖରେ ମୋ ସହ ଛିଡ଼ା ହୋଇଥିବା ସାନ ଭଉଣୀଙ୍କ ଉପରେ ମିଥ୍ୟା ଅଭିଯୋଗ ଲାଗିଛି। ଏହି ଅଭିଯୋଗ ନିନ୍ଦନୀୟ ଏବଂ ବଦନାମ କରିବାକୁ ପ୍ରୟାସ ବୋଲି ସେ କହିଛନ୍ତି। ଏହାଛଡ଼ା ମୁଁ ଏହି ଫିଲ୍ମଜଗତ ସହ ୧୫ ବର୍ଷରୁ ଅଧିକ ସମୟ ଧରି ଜଡ଼ିତ ଅଛି। ଦେଶର କଳାକାର ଏବଂ ସଂଗୀତଜ୍ଞମାନଙ୍କ ସହ କାମ କରିଆସୁଛି। ସେମାନେ ମୋ ସ୍ତ୍ରୀଙ୍କ ସହ ମୋର ସମ୍ପର୍କ ବିଷୟରେ ଅବଗତ ଅଛନ୍ତି। ଶେଷଷରେ ହନି ତାଙ୍କ ପ୍ରଶଂସକ ତଥା ଶୁଭେଚ୍ଛୁମାନଙ୍କୁ ସମର୍ଥନ କରିଥିବାରୁ ଧନ୍ୟବାଦ ଜଣାଇଛନ୍ତି। କୋର୍ଟରେ ମାମଲା ବିଚାରାଧୀନ ଥିବାରୁ ଅଧିକ ମନ୍ତବ୍ୟ ଦେବି ନାହିଁ। ଦେଶର ନ୍ୟାୟ ବ୍ୟବସ୍ଥା ଉପରେ ମୋର ସମ୍ପୂର୍ଣ୍ଣ ବିଶ୍ୱାସ ରହିଛି। ଶୀଘ୍ର ସତ ବାହାରକୁ ଆସିବ ବୋଲି ମୋର ବିଶ୍ୱାସ ରହିଛି। ଉଭୟ ପକ୍ଷଙ୍କ ଶୁଣାଣି ଶେଷ ହେବା ପରେ କୋର୍ଟ ରାୟ ନ ଆସିବା ଯାଏ ମୋର ଏବଂ ମୋର ପରିବାର ବିଷୟରେ କୌଣସି ସିଦ୍ଧାନ୍ତରେ ପହଞ୍ଚନ୍ତୁନାହିଁ ବୋଲି ହନି କହିଛନ୍ତି। ତେବେ ମାମଲା ଆଗକୁ କି ମୋଡ ନେଉଛି ତାହା ଦେଖିବାକୁ ବାକି ରହିଲା।
