ଯାଜପୁର ଅଫିସ,୧୬।୪: ସୂଚନା କର୍ମୀ ତଥା ଭାଜପା ନେତା ସର୍ବେଶ୍ୱର ବେହୁରାଙ୍କ ଉପରକୁ ବୋମା ମାଡ଼ ହୋଇଥିଲା। ଏହି ଘଟଣାକୁ ନେଇ ଲୋକାୟୁକ୍ତରେ ଏକ ମାମଲା (ନଂ.୨୫୫/୨୦୨୧)ରୁଜୁ ହୋଇଛି। ଏହି କ୍ରମରେ ତା.୧୨ା୪ା୨୦୨୧ରେ ଲୋକାୟୁକ୍ତ ଅଧ୍ୟକ୍ଷ ଓ ସଭ୍ୟ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। ନିର୍ଦ୍ଦେଶରେ ଦର୍ଶାଯାଇଛି, ଏହି ଘଟଣାରେ ରାଜନୈତିକ ପ୍ରଭାବଶାଳୀ ବ୍ୟକ୍ତି ଏବଂ ଖଣି ମାଫିଆମାନେ ସମ୍ପୃକ୍ତ ଥିବାରୁ ପୋଲିସ ଦ୍ୱାରା ଉପଯୁକ୍ତ ଅନୁସନ୍ଧାନ ଏବଂ ଗିରଫଦାରି ହେଉନାହିଁ। ଏହି ଦୃଷ୍ଟିରୁ ରାଜ୍ୟ ସରକାରଙ୍କ ଗୃହ ବିଭାଗ ସଚିବ, ଡିଜିପି, ଯାଜପୁର ଏସ୍ପି, ଧର୍ମଶାଳା ଥାନା ଆଇଆଇସିଙ୍କୁ ଜବାବ ତଲବ କରାଯାଇଛି। ଏନେଇ ୩ ସପ୍ତାହ ମଧ୍ୟରେ ରେଜିଷ୍ଟଡ୍ ପୋଷ୍ଟ ଓ ଏଡି ଜରିଆରେ ଜବାବ ଦାଖଲ କରିବାକୁ ଲୋକାୟୁକ୍ତ ନିର୍ଦ୍ଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ତା୨୭ା୩ା୨୦୨୧ରିଖ ରାତି ପ୍ରାୟ ୯ଟାରେ ଯାଜପୁର ଜିଲା ଧର୍ମଶାଳା ଥାନା ଇମାମନଗରଠାରେ ସର୍ବେଶ୍ୱର ଓ ତାଙ୍କ ୨ ସାଙ୍ଗଙ୍କ ଉପରକୁ ବୋମା ମାଡ ହୋଇଥିଲା। ଏହି ଘଟଣାରେ ପୋଲିସ ୩ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ କଟକ ଜିଲା ଆଠଗଡ଼ ଥାନା ଅନ୍ତର୍ଗତ ପୁରୁଷୋତ୍ତମପୁର ଗ୍ରାମର ଶିବାନୀ ବେହେରା(୧୯), ଯାଜପୁର ଜିଲା ବଡଚଣା ଥାନା ଅନ୍ତର୍ଗତ କୁଆଁରପୁର ଗ୍ରାମର ଶମ୍ଭୁନାଥ ନାୟକ(୩୨) ଓ ଢେଙ୍କାନାଳ ଜିଲା ଗଁଦିଆ ଥାନା ଅନ୍ତର୍ଗତ ଷଣ୍ଢପଷି ପାଟଣା ଗ୍ରାମର କାଳିଆ ଦାସ(୨୮) । ପୂର୍ବ ଶତ୍ରୁତାକୁ କେନ୍ଦ୍ର କରି ବେହୁରାଙ୍କ ଉପରେ ୪ଟି ବୋମା ମାଡ ହୋଇଥିଲା। ଧର୍ମଶାଳା ତହସିଲ ଅଞ୍ଚଳରେ ବେଆଇନ କଳାପଥର ଉତ୍ତୋଳନ କାରବାର ଉପରେ ବେହୁରା ବିଭିନ୍ନସ୍ତରରେ ଅଭିଯୋଗ କରିଛନ୍ତି। ଏନେଇ ପୋଲିସ ମଧ୍ୟ ବିଭିନ୍ନ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବାରମ୍ବାର ବେଆଇନ କାରବାର ଉପରେ ହସ୍ତକ୍ଷେପ କରୁଥିବା ବେହୁରାଙ୍କୁ ଜୀବନରେ ମାରି ଦେବାକୁ ଅଭିଯୁକ୍ତମାନେ ଯୋଜନା କରିଥିଲେ। ଡଙ୍କାରୀରେ କଳାପଥର ଉତ୍ତୋଳନ କରୁଥିବା ଜଣେ ପଥର ବ୍ୟବସାୟୀଙ୍କ ପ୍ରରୋଚନାରେ ବୋମାମାଡ ଯୋଜନା ହୋଇଥିଲା। ତେବେ ପୂର୍ବରୁ ଡଙ୍କାରୀ ଆର୍ଆଇଙ୍କ ରିପୋର୍ଟ ଆଧାରରେ ଧର୍ମଶାଳା ତହସିଲଦାର ପତ୍ରସଂଖ୍ୟା ୪୩୦୨ରେ ଜେନାପୁର ଥାନା ଆଇଆଇସିଙ୍କୁ ଅଭିଯୁକ୍ତମାନଙ୍କ ବିରୋଧରେ ଦୃଢ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ତାହା କାର୍ଯ୍ୟକାରୀ ନ ହେବାରୁ ଉପରୋକ୍ତ ଅଭିଯୁକ୍ତମାନଙ୍କ ମଧ୍ୟରୁ ଜଣଙ୍କ ନିର୍ଦ୍ଦେଶରେ ବୋମାମାଡ ହୋଇଥିବା ଅଭିଯୋଗ ହୋଇଛି। ତେବେ ମୁଖ୍ୟ ଅଭିଯୁକ୍ତଙ୍କ ସମେତ ଅନ୍ୟମାନଙ୍କୁ ଏଯାଏ ପୋଲିସ ଗିରଫ କରି ପାରି ନ ଥିବାରୁ ସୂଚନା କର୍ମୀ ବେହୁରା ଲୋକାୟୁକ୍ତଙ୍କ ଦ୍ୱାରସ୍ଥ ହୋଇଛନ୍ତି।
