ଖୋର୍ଦ୍ଧା (ପ୍ରଭାତ ପାଣିଗ୍ରାହୀ)/ିରାକରପୁର, ୬ା୮(ମାନସ ଚନ୍ଦ୍ର ପଟ୍ଟନାୟକ)ରାଜ୍ୟରେ ଲଗାଣ ବର୍ଷା ଓ ହୀରାକୁଦର ଗେଟ୍ ଖୋଲାଯିବା ପରେ ମହାନଦୀର ଜଳସ୍ତର ବଢ଼ିବାରେ ଲାଗିଛି। ଏହାର ଶାଖା ନଦୀ ରାଜୁଆ, ମଲାଗୁଣୀ ଓ ଦୟାରେ ଜଳସ୍ତର ମଧ୍ୟ ବଢୁଛି। ଫଳରେ ଖୋର୍ଦ୍ଧା ବ୍ଲକ ଓରବରସିଂ ପଞ୍ଚାୟତର ୫ଟି ଗ୍ରାମ ଜଳମଗ୍ନ ହୋଇଛି। ହିରିମୂଳ ଗଁା ବାହ୍ୟଜଗତରୁ ବଚ୍ଛିନ୍ନ ହୋଇଥିବା ବେଳେ ଶୁକ୍ରବାର ରାତିରେ ଡିହଖଳା, ଦୁର୍ଗାପୁର, ମାନପୁର ଓ ଧବଳପୁର ଗ୍ରାମରେ ବନ୍ୟାଜଳ ପ୍ରବେଶ କରିଛି। ଡିହଖଳାରେ ୫ଫୁଟ ଉଚ୍ଚରେ ପାଣି ଚାଲିଛି। ଏକର ଏକର ଚାଷଜମି ବୁଡ଼ି ରହିଛି। ଆଗକୁ ଜଳସ୍ତର ବଢ଼ିବା ସମ୍ଭବନା ରହିଛି। ରାତି ହେଲେ ଗ୍ରାମବାସୀଙ୍କ ଦୁର୍ଦ୍ଦଶା ବଢୁଛି। ଅନ୍ୟପଟେ ସରୀସୃପ ଭୟ ଘାରିଛି। ଫଳରେ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ପ୍ରଶାସନ ପକ୍ଷରୁ ଯୋଗାଇଦିଆଯାଇଥିବା ଡଙ୍ଗାରେ ଲୋକେ ଯାତାୟାତ କରୁଛନ୍ତି। ଚୂଲିରେ ପାଣି ପଶିଯିବାରୁ ପ୍ରଶାସନ ପକ୍ଷରୁ ଦିଆଯାଉଥିବା ରନ୍ଧା ଓ ଶୁଖିଲା ଖାଦ୍ୟ ଖାଇ ଗ୍ରାମବାସୀ ରହିଛନ୍ତି।
ଅରବିନ୍ଦ ମଙ୍ଗରାଜ କୁହନ୍ତି, ରାଜୁଆରେ ଘେରିବନ୍ଧ ନିର୍ମାଣ କରାଗଲେ ଏହି ସମସ୍ୟାର ସମାଧାନ ହୋଇପାରିବ। ଏଥିପ୍ରତି କୌଣସି ଗୁରୁତ୍ୱ ଦିଆଯାଉନାହିିଁ। ପ୍ରତିବର୍ଷ ଏଭଳି ସମସ୍ୟା ରହୁଛି। ଚାଷକାର୍ଯ୍ୟ ଆରମ୍ଭ ହୋଇଥିବା ବେଳେ ବନ୍ୟାଜଳ ସବୁ ଉଜାଡି ଦେଲା। ଫଳରେ ପ୍ରତିବର୍ଷ ଚାଷୀ ଏଭଳି ସମସ୍ୟା ଭୋଗୁଛି। ଡିହଖଳାର ପ୍ରହଲାଦ ହରିଚନ୍ଦନ କୁହନ୍ତି, ରାତିରେ ଘରେ ଶୋଇଛୁ, ସକାଳୁ ଉଠିବା ବେଳେ ଘରେ ଭିତରେ ପାଣି ପସିଗଲାଣି। ରାଜୁଆ ନଦୀ ଆମ ପାଇଁ ଦୁଃଖ ପାଲଟିଛି। ଏଠାରେ ଘେରିବନ୍ଧ ନିର୍ମାଣ କରାଗଲେ, ସମସ୍ୟାର ସମାଧାନ ହୋଇପାରିବ। ବାରମ୍ବାର ଅଭିଯୋଗ ସତ୍ୱେ ମଧ୍ୟ ଏଥିପ୍ରତି ଗୁରୁତ୍ୱ ଦିଆଯାଉନାହିଁ। ରାଜନୈତିକ ଇଚ୍ଛାଶକ୍ତିର ଅଭାବ, ଜିଲା ପ୍ରଶାସନର ଅବହେଳାରୁ ହିରିମୂଳ, ଡିହଖଳା ଗ୍ରାମବାସୀ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ଡିହଖଳାର ଲଲିତ ବେହେରା କହିଛନ୍ତି, ଜଳସେଚନର କୌଣସି ସୁବିଧା ନାହିଁ। ଚୁଡା, ଚିନି, ଗୁଡ ରିଲିଫ ଦରକାର ନାହିଁ, ସ୍ଥାୟୀ ପ୍ରତିକାର ଦରକାର। ପ୍ରତିବର୍ଷ ଧାନ ଚାଷ କରୁଛି, ଠିକ୍ ସମୟରେ ରାଜୁଆ ନଦୀର ପାଣି ସବୁ ନଷ୍ଟ କରିଦେଉଛି। ପ୍ରତିବର୍ଷ କ୍ଷତି ସହିବାକୁ ପଡୁଛି। ଡିହଖଳାର ସର୍ବେଶ୍ୱର ମାର୍ଥା କହିଛନ୍ତି, ବନ୍ୟାଜଳ ମାଡି ହଜାର ହଜାର ଚାଷଜମି ଏବେ ଜଳମଗ୍ନ ହୋଇଛି। ଲକ୍ଷାଧିକ ଟଙ୍କା ଧାରକରଜ କରି ଧାନ ବୁଣିଥିଲୁ। ଚାଷଜମି ସବୁ ଉଜିଡିଗଲା। ସବୁ ବେଳେ ଏହି ସମସ୍ୟା ଲାଗି ରହୁଛି। ଏହାର ସ୍ଥାୟୀ ପ୍ରତିକାର ଜରୁରୀ। କୃଷକନେତା ଶ୍ରୀରଞ୍ଜନ ମଙ୍ଗରାଜ କହିଛନ୍ତି, ଗତବର୍ଷ ନିଅଣ୍ଟିଆ ବୃଷ୍ଟି, ଅନୁକୂଳ ପରିସ୍ଥିତି ସତ୍ତ୍ୱେ ଚାଷୀ ଧାରକରଜ କରି ଚାଷ କାର୍ଯ୍ୟ କରିଥିଲେ। ଶେଷ ପର୍ଯ୍ୟାୟରେ ବନ୍ୟାଜଳ ମାଡି ଏକର ଏକର ଚାଷ ଜମି ଜଳମଗ୍ନ ହୋଇଥିଲା। ଚାଷୀ ଲକ୍ଷାଧିକ ଟଙ୍କା କ୍ଷତି ସହିଥିଲେ। ଚଳିତ ବର୍ଷ ମଧ୍ୟ ସେହି ସମସ୍ୟା। ଏହାର ପ୍ରତିକାର ପାଇଁ ଜିଲା ପ୍ରଶାସନ ନିକଟରେ ବାରମ୍ବାର ଦାବି ସତ୍ତ୍ୱେ କୌଣସି ଗୁରୁତ୍ୱ ଦିଆଯାଉନାହିଁ। ରାଜନୈତିକ ଇଚ୍ଛାଶକ୍ତିର ଅଭାବରୁ ଚାଷୀମାନେ ପ୍ରତିବର୍ଷ କ୍ଷତି ସହୁଛନ୍ତି।
