ଇସଲାମବାଦ,୨୯।୫: ପାକିସ୍ତାନରେ ସଂଖ୍ୟାଲଘୁ ହିନ୍ଦୁ ସମ୍ପ୍ରଦାୟର ଜଣେ ମହିଳାଙ୍କୁ ଅପହରଣ କରାଯାଇ ବଳପୂର୍ବକ ଇସଲାମ ଧର୍ମ ଗ୍ରହଣ କରି ଜଣେ ମୁସଲିମ ପୁରୁଷଙ୍କ ସହ ବିବାହ କରାଯାଇଥିବା ଅଭିଯୋଗ ହୋଇଛି। ଏନେଇ ମହିଳାଙ୍କ ପରିବାର ଏହା ଦାବି କରିଛନ୍ତି। ଅପହୃତ ମହିଳାଙ୍କ ପରିବାର ଦକ୍ଷିଣ ସିନ୍ଧ ପ୍ରଦେଶର ମୀରପୁରଖାସର ଦିଘରି ଅଞ୍ଚଳରୁ ତାଙ୍କୁ ଉଦ୍ଧାର କରିବା ପାଇଁ ସରକାର ଏବଂ ଅଧିକାରୀମାନଙ୍କୁ ନିବେଦନ କରିଛନ୍ତି।
ମହିଳାଙ୍କ ସ୍ବାମୀ ଏବଂ ତାଙ୍କର ଚାରି ପିଲା ମାମଲା ଦାୟର କରିବାକୁ ମୀରପୁରଖାସରେ ଥିବା ‘ଦରାବର ଇତ୍ତେହାଦ ପାକିସ୍ତାନ’ ଏନଜିଓର କାର୍ଯ୍ୟାଳୟକୁ ଆସିଥିଲେ। ସଂଖ୍ୟାଲଘୁ, ବିଶେଷକରି ହିନ୍ଦୁମାନଙ୍କ କଲ୍ୟାଣ ଏବଂ ଅଧିକାର ପାଇଁ ସୱର ଉତ୍ତୋଳନ କରୁଥିବା ଏନଜିଓର ମୁଖ୍ୟ ଶିବ କାଛି କହିଛନ୍ତି ଯେ ମହିଳାଙ୍କୁ ଅପହରଣ କରାଯାଇଥିଲା, ତା’ପରେ ବଳପୂର୍ବକ ଇସଲାମ ଧର୍ମ ଗ୍ରହଣ କରାଯାଇଥିଲା ଏବଂ ଶାହବାଜ ଖାଶଖେଲି ନାମକ ଜଣେ ମୁସଲିମ ପୁରୁଷଙ୍କ ସହ ବିବାହ କରାଯାଇଥିଲା।
ସରକାରୀ ସଂଗଠନର ମୁଖ୍ୟ ଶିବ କାଛି କହିଛନ୍ତି, “ପୋଲିସ ଏପର୍ଯ୍ୟନ୍ତ ଏଫଆଇଆର ପଞ୍ଜିକୃତ କରିନାହିଁ ଏବଂ ସହଯୋଗ କରୁନାହିଁ। ଏବେ ଆମେ କୋର୍ଟର ଦ୍ୱାରସ୍ଥ ହେବୁ। ମହିଳାଙ୍କ ସ୍ବାମୀ କହିଛନ୍ତି ଯେ ଗତ ସପ୍ତାହରେ ଶାହବାଜ ଖାସଖେଲି ଏବଂ ତାଙ୍କ ଲୋକମାନେ ତାଙ୍କ ସ୍ତ୍ରୀଙ୍କୁ ଘର ପାଖରୁ ଅପହରଣ କରିଥିଲେ। ସେ କହିଛନ୍ତି, “ଦୁଇ ଦିନ ପରେ ସେମାନେ ତାଙ୍କୁ ଏକ ଧାର୍ମିକ ସ୍ଥଳକୁ ନେଇ ଇସଲାମ ଧର୍ମ ଗ୍ରହଣ କରିଥିଲେ ଏବଂ ତା’ପରେ ଖାସଖେଲି ତାଙ୍କ ଇଚ୍ଛା କିମ୍ବା ସମ୍ମତି ବିନା ତାଙ୍କୁ ବିବାହ କରିଥିଲେ। ଏହା କ’ଣ ପାକିସ୍ତାନରେ ସଂଖ୍ୟାଲଘୁଙ୍କ ପାଇଁ ନ୍ୟାୟ?”
ପାକିସ୍ତାନରେ ଧର୍ମାନ୍ତରୀକରଣ ପ୍ରସଙ୍ଗ ବର୍ଷ ବର୍ଷ ଧରି ବିବାଦୀୟ ହୋଇ ରହିଛି। ବିଶେଷକରି ନାବାଳିକା ଏବଂ ବିବାହିତ ହିନ୍ଦୁ ମହିଳାଙ୍କୁ ଅପହରଣ କରି ଜୋରଜବରଦସ୍ତ ଇସଲାମ ଧର୍ମ ଗ୍ରହଣ କରି ବିବାହ କରିବା ଘଟଣା ଏବେ ସାଧାରଣ ହେବାରେ ଲାଗିଛି। ଅନ୍ତର୍ଜାତୀୟ ମାନବାଧିକାର ସଂଗଠନଗୁଡ଼ିକ ମଧ୍ୟ ଏହି ପ୍ରସଙ୍ଗକୁ ଅନେକ ଥର ଉଠାଇଛନ୍ତି, କିନ୍ତୁ ପାକିସ୍ତାନ ସରକାରଙ୍କ ଦ୍ୱାରା କୌଣସି ଠୋସ ପଦକ୍ଷେପ ନିଆଯାଇନାହିଁ। ୨୦୧୯ ମସିହାରେ, ସିନ୍ଧ ବିଧାନସଭାରେ ବଳପୂର୍ବକ ଧର୍ମାନ୍ତରୀକରଣ ବିରୁଦ୍ଧରେ ଏକ ବିଲ ଆଗତ କରାଯାଇଥିଲା, କିନ୍ତୁ ମୌଳବାଦୀ ଶକ୍ତିଙ୍କ ଚାପରେ ଏହାକୁ ପ୍ରତ୍ୟାଖ୍ୟାନ କରାଯାଇଥିଲା। ଏହା ସ୍ପଷ୍ଟ କରେ ଯେ ପାକିସ୍ତାନରେ ଧାର୍ମିକ ସୱାଧୀନତା କେବଳ ଏକ ପ୍ରହସନ।
