ଗୁଆହାଟୀ,୧।୩ : ମେଘାଳୟର ରାଜନୀତିରୁ ବଡ ଖବର ଆସିଛି। ମଙ୍ଗଳବାର ରାତିରେ ଗୁଆହାଟୀରେ ଆସାମ ମୁଖ୍ୟମନ୍ତ୍ରୀ ତଥା ଭାଜପା ନେତୃତ୍ୱାଧୀନ ଉତ୍ତର ପୂର୍ବ ବିକାଶ ମହାସଂଘର ମୁଖ୍ୟ ହିମନ୍ତ ବିଶ୍ୱ ଶର୍ମା ମେଘାଳୟର ମୁଖ୍ୟମନ୍ତ୍ରୀ ତଥା ଏନପିପି ମୁଖ୍ୟ କୋନରାଡ ସାଙ୍ଗମାଙ୍କୁ ଭେଟିଛନ୍ତି। ସୂଚନାନୁସାରେ, ସାଙ୍ଗମା ଗୁଆହାଟୀରେ ଥିଲେ ଏବଂ ହିମନ୍ତ ବିଶ୍ୱ ଶର୍ମା ହୋଟେଲରେ ପହଞ୍ଚି ତାଙ୍କୁ ଭେଟିଥିଲେ। ଉଭୟଙ୍କ ମଧ୍ୟରେ ଏହି ସାକ୍ଷାତ ଏକ ସମୟରେ ଘଟିଛି ଯେତେବେଳେ ମେଘାଳୟ ସମେତ ଉତ୍ତର ପୂର୍ବର ତିନୋଟି ରାଜ୍ୟର ନିର୍ବାଚନ ଫଳାଫଳ ମାର୍ଚ୍ଚ ୨ ରେ ଆସିବ।
ତେବେ ଭାଜପା ପୁଣି ସରକାରଙ୍କ ଏକ ଅଂଶ ହେବ କି ବୋଲି ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
ଗତ ୫ ବର୍ଷ ଧରି ମେଘାଳୟରେ ଏନପିପି ନେତୃତ୍ୱାଧୀନ ସରକାରର ଭାଜପା ଏକ ଅଂଶ ହୋଇଥିବାରୁ ଏହି ପ୍ରଶ୍ନ ଉଠିଛି। ତେବେ ନିର୍ବାଚନ ପୂର୍ବରୁ ସିଟ ବାଣ୍ଟିବା ନେଇ ବିବାଦ ଥିବାରୁ ଏହି ମିଳିତ ମଞ୍ଚ ଭାଙ୍ଗି ଯାଇଥିଲା। ଏହା ପରେ ଉଭୟ ଦଳ ଅଲଗା ଅଲଗା ନିର୍ବାଚନ ଲଢ଼ିଥିଲେ।
ଫେବୃଆରୀ ୨୭ରେ ଭୋଟ ଶେଷ ହେବା ପରେ ସମସ୍ତ ସର୍ଭେ ଏଜେନ୍ସି ଦ୍ୱାରା ଏକଜିଟ ପୋଲ ପ୍ରକାଶ ପାଇଥିଲା। ଏହା ଅନୁଯାୟୀ, ମେଘାଳୟରେ ଝୁଲା ବିଧାନସଭା ହେବା ପୂର୍ବାନୁମାନ କରାଯାଇଛି। ଏକଜିଟ ପୋଲରେ କୌଣସି ଦଳକୁ ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ମିଳି ନାହିଁ। ତଥାପି, ଏନପିପି ଏକକ ବୃହତ ଦଳ ଭାବରେ ଉଭା ହୋଇପାରେ ବୋଲି କୁହାଯାଉଛି।
ରାଜ୍ୟରେ ସରକାର ଗଠନ ପାଇଁ ଯେକୌଣସି ଦଳ ଅତି କମରେ ୩୧ ଜଣ ସଦସ୍ୟଙ୍କ ସମର୍ଥନ ଆବଶ୍ୟକ କରୁଛନ୍ତି। ଏକଜିଟ ପୋଲ ତଥ୍ୟ ଅନୁଯାୟୀ, ଏନପିପି ସର୍ବାଧିକ ୨୦ ଟି ସିଟ ପାଇବ ବୋଲି ଆଶା କରାଯାଉଛି। ଛଅରୁ ୧୧ ଟି ସିଟ ଭାଜପା ଖାତାକୁ ଯିବାର ଆଶା ରହିଛି। ଏଭଳି ପରିସ୍ଥିତିରେ ଯଦି ତ୍ରିଶଙ୍କୁ ପରିସ୍ଥିତି ଉପୁଜେ, ତେବେ ଗତଥର ଭଳି କୋନରାଡ ସାଙ୍ଗମା ଭାଜପା ଏବଂ ୟୁଡିପି ସହିତ ସରକାର ଗଠନ କରିପାରନ୍ତି।
