କଟକ ଅଫିସ,୧୬ା୭: କରୋନା ଯୋଗୁ ଗତ ମାର୍ଚ୍ଚ ୨୨ତାରିଖ ପରଠୁ କୋର୍ଟଗୁଡ଼ିକର କାର୍ଯ୍ୟ ବାଧାପ୍ରାପ୍ତ ହୋଇଛି। ଫଳରେ ଆଇନ୍ଜୀବୀମାନେ ରୋଜଗାର ହରାଇଛନ୍ତି। ଏଣୁ ଆସନ୍ତା ଏକ ବର୍ଷ ପର୍ଯ୍ୟନ୍ତ ପ୍ରତ୍ୟେକ ଆଇନ୍ଜୀବୀଙ୍କୁ ମାସିକ ୨୫ ହଜାର ଟଙ୍କା ଲେଖାଏ ସହାୟତା ରାଶି ସରକାର ଦିଅନ୍ତୁ ବୋଲି ଆବେଦନ କରାଯାଇ ହାଇକୋର୍ଟରେ ବୁଧବାର ଏକ ମାମଲା ରୁଜୁ ହୋଇଛି। ରାଜ୍ୟ ସରକାରଙ୍କୁ ଏ ନେଇ ନିର୍ଦ୍ଦେଶ ଦେବା ପାଇଁ ଆବେଦନରେ ପ୍ରାର୍ଥନା କରାଯାଇଛି। କ୍ରିମିନାଲ କୋର୍ଟସ ବାର୍ ଆସୋସିଏସନ୍ ପୂର୍ବତନ ସଭାପତି ଆଇନଜୀବୀ ଅକ୍ଷୟ କୁମାର ପତିଙ୍କ ପକ୍ଷରୁ ଏହି ମାମଲା ରୁଜୁ ହୋଇଛି। ଆବେଦନକାରୀ ଉଲ୍ଲେଖ କରିଛନ୍ତି ଯେ, ନିମ୍ନ ଅଦାଲତଠାରୁ ଆରମ୍ଭ କରି ହାଇକୋର୍ଟ ଏବଂ ବିଭିନ୍ନ ଟ୍ରିବ୍ୟୁନାଲ୍ରେ ରାଜ୍ୟବ୍ୟାପୀ ପ୍ରାୟ ୫୦ ହଜାର ଆଇନଜୀବୀ କାର୍ଯ୍ୟ କରୁଛନ୍ତି। କୋର୍ଟ କାର୍ଯ୍ୟ ସ୍ବାଭାବିକ ଥିବାବେଳେ ମାମଲା ପରିଚାଳନାରୁ ଯାହା ଆୟ କରୁଥିଲେ, ସେଥିରେ ପରିବାର ଚଳାଉଥିଲେ। ତେବେ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ଲକ୍ଡାଉନ୍ ଏବଂ ଶଟ୍ଡାଉନ୍ ଜାରି ପରେ କୋର୍ଟ କାର୍ଯ୍ୟ ଠପ୍ ହୋଇପଡ଼ିଛି। କେବଳ ଜରୁରୀ ମାମଲାର ଶୁଣାଣି କରାଯାଉଛି। ସ୍ବଳ୍ପ ସଂଖ୍ୟକ ଆଇନଜୀବୀ ମାମଲା ପରିଚାଳନା କରୁଥିବାବେଳେ ଅଧିକାଂଶ କାମ ନ ପାଇ ବସି ରହିଛନ୍ତି। ଅପରପକ୍ଷେ କୋର୍ଟ ଫି, ଷ୍ଟାମ୍ପ ଫି ଆଦି ଜରିଆରେ ସରକାର ରାଜସ୍ବ ପାଉଛନ୍ତି। ପ୍ରତିବଦଳରେ ଆଇନଜୀବୀଙ୍କୁ ସହାୟତା ପ୍ରଦାନ ଦିଗରେ କୌଣସି ପଦକ୍ଷେପ ନେଇନାହାନ୍ତି। ଏଣୁ ଆସନ୍ତା ଏକବର୍ଷ କିମ୍ବା କରୋନା ପ୍ରଭାବ ଲାଗି ରହିବା ପର୍ଯ୍ୟନ୍ତ ରାଜ୍ୟର ପ୍ରତ୍ୟେକ ଆଇନଜୀବୀଙ୍କୁ ମାସିକ ୨୫ହଜାର ଟଙ୍କା ଲେଖାଏ ସହାୟତା ପ୍ରଦାନ କରାଯାଉ। ଏ ନେଇ ସର୍ବଭାରତୀୟ ସ୍ତରରେ ସ୍ବତନ୍ତ୍ର ଯୋଜନା ପ୍ରସ୍ତୁତ କରିବା ପାଇଁ ନିବେଦନ କରାଯାଇଛି। ମାମଲାରେ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ପକ୍ଷଭୁକ୍ତ କରାଯାଇଛି।
