ମାଲକାନଗିରି,୨୪ା୫ (ଦୁ ର୍ଯ୍ୟୋଧନ ପାତ୍ର): ମାଲାକନଗିରି ଜିଲା ପଡିଆ ବ୍ଲକ ଅନ୍ତର୍ଗତ ନିିଲିଗୁଡା ଗ୍ରାମର ଦୁଇଜଣ ଅସହାୟ ଭଉଣୀଭାଇଙ୍କୁ ଆଇନସେବା ପ୍ରାଧିକରଣ ପକ୍ଷରୁ ଉଦ୍ଧାର କରାଯାଇ ଶୁକ୍ରବାର ଚାଇଲ୍ଡ ଲାଇନକୁ ହସ୍ତାନ୍ତର କରାଯାଇଛି।
ନିଲିଗୁଡା ଗ୍ରାମର ଜଣେ ଶିଶୁ କନ୍ୟା ଓ ତାଙ୍କର ଛୋଟ ଭାଇଙ୍କ ବାପା ଗତ ୮ ବର୍ଷ ତଳେ ମୃତ୍ୟୁବରଣ କରିଥିଲେ। କରୋନା ସମୟରେ ସେମାନଙ୍କ ମା’ଙ୍କ ମୃତ୍ୟୁ ଘଟିଥିଲା। ମାଆବାପାଙ୍କ ମୃତ୍ୟୁ ପରେ ଭଉଣୀ ନିଜର ଯତ୍ନ ନେବାସହ ଛୋଟ ଭାଇର ମଧ୍ୟ ଯତ୍ନ ନେଉଥିଲେ।
ଜଙ୍ଗଲକୁ ଯାଇ ମହୁଲ, ଟୋଲା, କେନ୍ଦୁପତ୍ର ଆଦି ଗୋଟାଇ ବିକ୍ରି କରି ଚଳୁଥିଲେ। ଭଉଣୀଟିର ବୟସ ୧୩ ବର୍ଷ ହୋଇଥିବା ବେଳେ ତାଙ୍କ ଭାଇର ବୟସ ୧୦ ବର୍ଷ। ମାଆବାପାଙ୍କ ମୃତ୍ୟୁ ପରେ ଅସହାୟ ଅବସ୍ଥାରେ ଚୂଳୁଥିଲେ ମଧ୍ୟ ସେମାନଙ୍କ କୌଣସି ସମ୍ପର୍କୀୟ ସେମାନଙ୍କୁ ସହାୟତା କରି ନ ଥିଲେ।
ଆଇନସେବା ପ୍ରାଧିକରଣ ମୁଖ୍ୟ ଆଇନ ସେବା ପ୍ରତିପକ୍ଷ ଓକିଲ ଅଶୋକ ପଟ୍ଟନାୟକ ଏ ସମ୍ପର୍କରେ ସୂଚନା ପାଇ ଉଭୟ ଶିଶୁଙ୍କୁ ଉଦ୍ଧାର କରି ପ୍ରାଧିକରଣ ସଚିବ ରାକେଶ ମୁଦୁଲିଙ୍କ ନିକଟରେ ହାଜର କରିଥିଲେ। ସଚିବଙ୍କ ନିର୍ଦ୍ଦେଶରେ ଏହି ଦୁଇ ଭଉଣୀଭାଇଙ୍କ ଯତ୍ନ ଓ ସୁରକ୍ଷା ନିମନ୍ତେ ଉଭୟଙ୍କୁ ଚାଇଲ୍ଡ ଲାଇନ ମାଧ୍ୟମରେ ଶିଶୁ ମଙ୍ଗଳ କମିଟି ନିକଟରେ ହାଜର କରାଇଥିଲେ। ପରେ ଶିଶୁ ମଙ୍ଗଳ କମିଟି କିଶୋର ନ୍ୟାୟ (ଯତ୍ନ ଓ ସୁରକ୍ଷା) ଆଇନ ଅନୁସାରେ ପଦକ୍ଷେପ ଗ୍ରହଣ କରି ସେମାନଙ୍କ ଯତ୍ନ ଓ ସୁରକ୍ଷା ପାଇଁ ବ୍ୟବସ୍ଥା କରିବାକୁ ଆଇନଜୀବୀ ଗୌତମ ସରକାର ପରାମର୍ଶ ଦେଇଛନ୍ତି।
