ଚମ୍ପୁଆ,୧୪ା୭(ମହେଶ୍ୱର ଦାସ): କୃଷି ଜିଲା ଚମ୍ପୁଆ ଅଧୀନରେ ଥିବା ଚମ୍ପୁଆ ବ୍ଲକ୍ରେ ଚଳିତ ବର୍ଷ ନିଅଣ୍ଟିଆ ବର୍ଷା ହୋଇଛି। ବର୍ଷାକୁ ଅନାଇ ଧାନ ତଳି ପକାଇଥିବା ଚାଷୀ ମୁଣ୍ଡରେ ହାତ ଦେଲେଣି। କେଉଁଠି ତଳି ବୁଢ଼ାହେବାକୁ ବସିଲାଣି ତ କେଉଁଠି ଜମି ହଳ କରି ରୁଆ ଧାନ କରିବାକୁ ଲକ୍ଷ୍ୟ ରଖିଥିବା ଚାଷୀ ବର୍ଷାକୁ ଚାହିଁ ବସିଛି। ନିଅଣ୍ଟିଆ ବର୍ଷା ଯୋଗୁ ପାଣି ଅଭାବରେ ତଳି ମରୁଡ଼ି ହେବା ଆଶଙ୍କା ବଢ଼ାଇଛି। ପୂର୍ବ ବର୍ଷ ଅପେକ୍ଷା ଚଳିତବର୍ଷ ସମୟ ହୋଇଯାଇଥିଲେ ମଧ୍ୟ ଧାନ ଚାଷ ପାଇଁ ଅନୁକୂଳ ପାଗ ହୋଇପାରୁନାହିଁ। ଫଳରେ କ୍ଷତିର ଆଶଙ୍କା ବୃଦ୍ଧି ପାଉଥିବା ବେଳେ ଚାଷୀଙ୍କ ମନରେ ହତାଶ ଭାବ ଦେଖାଦେଇଛି।
ସୂଚନା ଅନୁଯାୟୀ, ୨୦୨୨ରେ ଚାଷର ଟାର୍ଗେଟ ଅନୁସାରେ ଧାନ ୧୩,୮୦୦ ହେକ୍ଟର, ଶସ୍ୟ ଜାତୀୟ ୧୬,୧୭୦ ହେକ୍ଟର ଓ ମକା, ମାଣ୍ଡିଆ ଆଦି ୧୬୫୦ ହେକ୍ଟର ରହିଥିବା ବେଳେ ଚଳିତ ବର୍ଷ ଜୁନ୍ ସୁଦ୍ଧା ଧାନ ୮୫୫ ହେକ୍ଟର, ଶସ୍ୟ ଜାତୀୟ ୨୦୮୫ ହେକ୍ଟର, ଡାଲି ଜାତୀୟ ୨୮୦ ହେକ୍ଟର ଓ ତୈଳ ଜାତୀୟ ୨୫୨ ହେକ୍ଟର ଚାଷ କରାଯାଇଛି। ସେହିପରି ଝୁମ୍ପୁରା ବ୍ଲକ୍ରେ ବର୍ତ୍ତମାନ ସୁଦ୍ଧା ଧାନ ୫୬ ହେକ୍ଟର, ଶସ୍ୟ ଜାତୀୟ ୨୦୯ ହେକ୍ଟର, ଡାଲି ଜାତୀୟ ୮୫ ହେକ୍ଟର ଓ ତୈଳ ଜାତୀୟ ୩୭ ହେକ୍ଟର ଚାଷ ହୋଇଛି। ଏହା ସହ ଯୋଡ଼ା ବ୍ଲକ୍ରେ ଜୁନ ସୁଦ୍ଧା ଧାନ ୨୯୧ ହେକ୍ଟର, ଶସ୍ୟ ଜାତୀୟ ୩୫୦ ହେକ୍ଟର, ଡାଲି ଜାତୀୟ ୨୩୦ ହେକ୍ଟର ଓ ତୈଳ ଜାତୀୟ ୨୮ ହେକ୍ଟର ଜମିରେ ଅଦ୍ୟବଧି ଚାଷ କରାଯାଇଛି। ପୂର୍ବ ବର୍ଷ ତୁଳନାରେ ଏହି ଚାଷ ଆଶାଠାରୁ ବହୁ ଗୁଣରେ କମ୍ ହୋଇଛି। ସେହିପରି ୨୦୨୨ ଜୁନ୍ ସୁଦ୍ଧା ଚମ୍ପୁଆ ବ୍ଲକ୍ରେ ୧୩୩.୬୦ ମି.ମି. ବର୍ଷା ହୋଇଥିବା ବେଳେ ବର୍ତ୍ତମାନ ସୁଦ୍ଧା ୫୯ ମି.ମି. ବର୍ଷା ହୋଇଛି। ଗତ ବର୍ଷ ଯୋଡ଼ାରେ ୧୨୬.୨୦ ମି.ମି. ଓ ଝୁମ୍ପୁରାରେ ୭୪.୪୦ ମି. ମି. ବର୍ଷା ହୋଇଥିବା ବେଳେ ଚଳିତ ବର୍ଷ ଜୁନ୍ ସୁଦ୍ଧା ଯୋଡ଼ାରେ ୧୫୧.୬୦ ମି.ମି. ଓ ଝୁମ୍ପୁରାରେ ୨୧୭.୬୦ ମି.ମି. ବର୍ଷା ହୋଇଛି। ଚମ୍ପୁଆ ବ୍ଲକ୍ରେ ଚାଷୀ ଜମିରେ ହଳକରି ବର୍ଷାକୁ ଅପେକ୍ଷା କରିଛନ୍ତି। ଯଦି ଉପଯୁକ୍ତ ସମୟରେ ବର୍ଷା ନ ହୁଏ, ଚଳିତ ବର୍ଷ ଚାଷୀ ଚାଷ କାର୍ଯ୍ୟ ଆଗକୁ ବଢ଼ାଇପାରିବ କି ନାହିଁ ତାହା ଏବେ ଚାଷୀକୁଳଙ୍କୁ ସନ୍ଦେହରେ ପକାଇଛି।
