ବଲାଙ୍ଗୀର,୩ା୮(ବୀରେନ୍ଦ୍ର କୁମାର ଝାଙ୍କର): ଲୋୟର ସୁକ୍ତେଲ ପ୍ରକଳ୍ପ ଯୋଗୁଁ କିଛିଦିନ ତଳେ ବିସ୍ଥାପିତ ହୋଇଥିବା ଗଡଶଙ୍କର ଡୁଙ୍ଗୁରିପାଲି ଗ୍ରାମର ପ୍ରାୟ ୨ଶହରୁ ଉର୍ଦ୍ଧ୍ୱ ପରିବାର ଏବେ ଝାଙ୍କରପାଲି ଥଇଥାନ କଲୋନୀର ଅସ୍ଥାୟୀ ଘରେ ରହୁଛନ୍ତି। ଅସ୍ଥାୟୀ ଘର ନିମ୍ନମାନର ହୋଇଥିତ୍ବାରୁ ଲୋକେ ବଷାଦିନରେ ବହୁକଷ୍ଟରେ ରହୁଛନ୍ତି। ଗତ ଦୁଇଦିନର ଲଗାଣ ବର୍ଷାରେ ପୁଣି ଥରେ ଝାଙ୍କରପାଲି ଥଇଥାନ କଲୋନୀର ଲୋକେ ଜଳ ଘେରରେ ରହିଛନ୍ତି। ଏଠାରେ ଅତି ନିମ୍ନମାନର କାମ ହୋଇଥିବା ଲୋକେ ବହୁ ଦିନରୁ ଅଭିଯୋଗ କରିଆସୁଛନ୍ତି। ଟିଣରେ ତିଆରି ଘରେ ପାଣି ଗଳୁଥିବାରୁ ଲୋକେ ଘର ଭିତରେ ରହି ବସି ପାରୁନାହାନ୍ତି। ଲଗାଣ ବର୍ଷାରେ ତାଙ୍କ ଅସ୍ଥାୟୀ ଘର ଭିତରେ ବର୍ଷା ପାଣି ଭରି ଯାଇଛି। ବାହାରେ ମଧ୍ୟ ବର୍ଷାଜଳ ଘେରାବନ୍ଦୀ ହୋଇ ରହିଛି। ଏଠାରେ ରହୁଥିବା ଫାଲ ପ୍ରଧାନ, ନାରାୟଣ କୁମ୍ଭାର, ଦିଗ୍ଶନ କୁମ୍ଭାର, ବୁଡକୁ ପ୍ରଧାନ, ଅଚ୍ୟୁତ୍ ପ୍ରଧାନ, ହରି ପ୍ରଧାନ, ରବୀନ୍ଦ୍ର ଗଡତ୍ୟା, ସୁରୁ ବିଶ୍ୱାଳଙ୍କ ଘରେ ପାଣି ପଶିଯାଇଛି। ରାସ୍ତାଘାଟ ତିଆରି ହୋଇ ନ ଥିବାରୁ ବର୍ଷାପାଣିରେ ଏହା ଚାଲିବା ଯୋଗ୍ୟ ହୋଇରହିନାହିଁ। ଲୋକଙ୍କ କହିବା ହେଲା ଯେ, ସେମାନେ ନିଜ ଗଁାରେ ଭଲରେ ଥିଲେ। ଆଉ ଦୁଇମାସ ପରେ ବିସ୍ଥାପିତ କରାଯାଇଥିଲେ ସେମାନଙ୍କର କୌଣସି ଅସୁବିଧା ହୋଇନଥାନ୍ତା। ମାତ୍ର ପ୍ରଶାସନ କୌଣସି କଥା ନଶୁଣି ତରବରିଆ ଭାବେ ଲୋକଙ୍କୁ ବିସ୍ଥାପିତ କରିଛି। ଗୋଟିଏ ପଟେ ଥଇଥାନ କଲୋନୀ ରହିବାଯୋଗ୍ୟ ହୋଇନାହିଁ। ଏବେ ବର୍ଷା ଦିନରେ ଲୋକେ ବହୁ କଷ୍ଟରେ ଦିନ କାଟୁଛନ୍ତି। ଜେସିବି ମେସିନ୍ ଅଣାଯାଇ ରାସ୍ତା କାଟିବା ପରେ ପାଣି ଯିବ ବୋଲି କୁହାଯାଉଛି। ମାତ୍ର ରାତି ସାରା ପାଣି ଘେରରେ ଲୋକ ରହିଛନ୍ତି। ଘର ଭିତରେ ପାଣି ଭରି ଯିବାରୁ ରାତିରେ ରନ୍ଧବଢ଼ା କରି ନ ଥିବା ଜଣାଇଛନ୍ତି। ପ୍ରଶାସନ ତୁରନ୍ତ ପ୍ରତିକାର ବ୍ୟବସ୍ଥା ଗ୍ରହଣ କରୁ ବୋଲି ସେମାନେ ଦାବି ଜଣାଇଛନ୍ତି।
