ଥିରୁଭାନନ୍ତପୁରମ୍,୧୭।୧୦: କରୋନା ମହାମାରୀ ସଂକ୍ରମଣ ଯୋଗୁ କେରଳରେ ସଙ୍କଟ ସୃଷ୍ଟି ହୋଇଥିଲା। ଏବେ ପ୍ରବଳ ବର୍ଷା ଯୋଗୁ ରାଜ୍ୟରେ ବନ୍ୟା ସ୍ଥିିତି ସୃଷ୍ଟି ହୋଇଛି। ମୁଷଳଧାରା ବର୍ଷାରେ ଭାସିଯାଇ ଇତିମଧ୍ୟରେ ରାଜ୍ୟରେ ୧୮ ଜଣଙ୍କ ମୃତ୍ୟୁ ଘଟିଛି। ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି। ୧୨ରୁ ଅଧିକ ଲୋକ ନିଖୋଜ ରହିଛନ୍ତି।
ଶନିବାର ଦିନ କେରଳର ଦକ୍ଷିଣ ଏବଂ ମଧ୍ୟ ଭାଗରେ ପ୍ରବଳ ବର୍ଷା ହୋଇଛି। ଏହି କାରଣରୁ ଅନେକ ସ୍ଥାନରେ ଫ୍ଲାସ ବନ୍ୟା ଏବଂ ଭୂସ୍ଖଳନ ଘଟିଛି। ଉଦ୍ଧାର କାର୍ଯ୍ୟ ପାଇଁ ରାଜ୍ୟ ସରକାର ସେନାର ସହାୟତା ଲୋଡିିଛନ୍ତି। କୋଟାୟାମ, ଇଡୁକ୍କି ଏବଂ ପଥନମଥିଟା ଜିଲାର ପାହାଡିଆ ଅଞ୍ଚଳରେ ସଙ୍କଟ ବଢ଼ିବାରେ ଲାଗିଛି। ଏଠାରେ ୨୦୧୮ ଏବଂ୨୦୧୯ରେ ଭୟଙ୍କର ବନ୍ୟା ପରିସ୍ଥିତି ଦେଖିବାକୁ ମିଳିଥିଲା।
ପରିସ୍ଥିତି ନିୟନ୍ତ୍ରଣରେ ଅଛି ଏବଂ ଆତଙ୍କିତ ହେବାର କୌଣସି ଆବଶ୍ୟକତା ନାହିଁ ବୋଲି ବିପର୍ଯ୍ୟୟ ପରିଚାଳନା ଅଧିକାରୀମାନେ କହିଛନ୍ତି। ତେବେ ବନ୍ୟା ଓ ଖରାପ ପାଗ ଯୋଗୁଁ ରାଜ୍ୟ ପୋଲିସ ଏବଂ ଅଗ୍ନିଶମ ବିଭାଗର ରିଲିଫ ଟିମ ପ୍ରଭାବିତ ଅଞ୍ଚଳରେ ପହଞ୍ଚିିପାରି ନାହାନ୍ତି।
କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟଙ୍କ ଅନୁଯାୟୀ ପରିସ୍ଥିତି ଗୁରୁତର ରହିଛି। ଏହା ସହିତ ସେ କହିଛନ୍ତି ଯେ ବର୍ତ୍ତମାନର ପାଣିପାଗ ପୂର୍ବାନୁମାନ ସୂଚାଉଛି ଯେ ସ୍ଥିତି ଅଧିକ ଖରାପ ହେବ ନାହିଁ। ସେନା, ବାୟୁସେନା ଏବଂ ନୌସେନା କର୍ମଚାରୀମାନେ କୋଟାୟାମର କୁଟ୍ଟିକାଲ ଏବଂ ଇଡୁକିରେ ପେରୁଓ୍ବନଥାନମ ପାହାଡ଼ିଆ ଗ୍ରାମରେ ପହଞ୍ଚିଛନ୍ତି।
ପ୍ରତିରକ୍ଷା ମୁଖପାତ୍ରଙ୍କ ଅନୁଯାୟୀ, ଏମ୍ -୧୭ ଏବଂ ସାରଙ୍ଗ ହେଲିକପ୍ଟରକୁ ପ୍ରସ୍ତୁତ ରଖାଯାଇଛି। କୋଟ୍ଟାୟାମ ଜିଲାର କାଞ୍ଜିରପନଲ୍ଲୀରେ ଥିବା ପାଙ୍ଗୋଡ ସାମରିକ ବେସରୁ ଏକ ଉଦ୍ଧାରକାରୀ ଦଳଙ୍କୁ ପଠାଯାଇଛି। ଏଥିରେ ଜଣେ ଅଧିକାରୀ, ଦୁଇ ଜଣ ଜେସିଓ ଏବଂ ୩୦ ଜଣ ଯବାନ ରହିଛନ୍ତି।
