ଆର୍ନିଆ,୨୭ା୧୦୨୦୨୧ ପରେ ପାକିସ୍ତାନୀ ରେଞ୍ଜରମାନେ ପ୍ରଥମ ଥର ପାଇଁ ଅସ୍ତ୍ରବିରତି ଉଲ୍ଲଂଘନ କରି ସୀମାନ୍ତ ଅଞ୍ଚଳରେ ଜୋର୍ଦାର ଗୁଳିଗୋଳା ଓ ସେଲ୍ ମାଡ଼ କରିଛନ୍ତି। ଜମ୍ମୁ-କଶ୍ମୀରର ଆର୍ନିଆ ସେକ୍ଟରରେ ଗୁରୁବାର ରାତି ୮ଟାରୁ ଏହି ଗୁଳିବିନିମୟ ଆରମ୍ଭ ହୋଇ ୭ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଚାଲିଥିଲା।
ଭୟରେ ସୀମାନ୍ତ ଅଞ୍ଚଳର ଲୋକମାନେ ଘରଦ୍ୱାର ଛାଡ଼ି ପଳାଇଯାଇଛନ୍ତି। ଅନ୍ତର୍ଜାତୀୟ ସୀମା ଅନ୍ତର୍ଗତ କେତେକ ଗ୍ରାମରେ ବିବାହ ଉତ୍ସବ ଚାଲିଥିବା ବେଳେ ପାକ୍ ରେଞ୍ଜରଙ୍କ ଗୁଳିଗୋଳା ମାଡ଼ ଯୋଗୁ ତାହା ବାଧାପ୍ରାପ୍ତ ହୋଇଥିଲା। ଆର୍.ଏସ୍. ପୁରା ସେକ୍ଟରରେ ପାକିସ୍ତାନ ପଟୁ ସେଲ୍ ମାଡ଼ ଯୋଗୁ ବିବାହ ଭୋଜି ଛାଡ଼ି ଲୋକମାନେ ପଳାଇଯାଇଥିଲେ। ଭୋର ୩ଟା ପର୍ଯ୍ୟନ୍ତ ପାକିସ୍ତାନୀ ସେନା ସେଲ୍ ମାଡ଼ ଜାରି ରଖିଥିବା ବେଳେ ଏହାର ଠିକଣା ଜବାବ ଦିଆଯାଇଥିଲା ବୋଲି ଭାରତର ସୀମା ସୁରକ୍ଷା ବଳ (ବିଏସ୍ଏଫ୍) କହିଛି। ପାକିସ୍ତାନୀ ଗୁଳିରେ ଜଣେ ବିଏସ୍ଏଫ୍ ଯବାନ ଓ ଜଣେ ମହିଳା ଆହତ ହୋଇଛନ୍ତି। ସେହିପରି ସେଲ୍ ମାଡ଼ରେ ସୀମାନ୍ତ ଗ୍ରାମର ବହୁ ଘର କ୍ଷତିଗ୍ରସ୍ତ ହୋଇଛି।
