ମାଲକାନଗିରି, ୨୨।୪: (ଡି.ଏନ୍.ଏ.) ମାଲକାନଗିରି ଜିଲାରେ ତାପମାତ୍ରା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଜିଲାରେ ଏବେ ୪୩ ଡିଗ୍ରୀ ତାପମାତ୍ରା ରହୁଛି। ଏନେଇ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡୁଥିବା ବେଳେ ଅଘୋଷିତ ବିଦ୍ୟୁତ୍ କାଟ୍ କଷ୍ଟକୁ ଦ୍ୱିଗୁଣିତ କରିଛି। ଏଥିପାଇଁ ବରିଷ୍ଠ ନାଗରିକମାନେ ବେଶି କଷ୍ଟ ଭୋଗୁଛନ୍ତି। ପାନୀୟ ଜଳ ସମସ୍ୟା ଦେଖାଦେଉଛି। ଜିଲାରେ ପ୍ରଚଣ୍ଡ ରୌଦ୍ରତାପ ଜାରି ରହିଥିବା ବେଳେ ହାତଗଣତି କେତେକ ସ୍ଥାନକୁ ଛାଡିଦେଲେ ଅନ୍ୟ କେଉଁଠି ପ୍ରଶାସନ ପକ୍ଷରୁ ଜଳଛତ୍ର ବ୍ୟବସ୍ଥା କରାଯାଇନାହିଁ। ୧୫ ଦିନ ତଳେ ପ୍ରଶାସନ ଗ୍ରୀଷ୍ମ ଦାଉରୁ କିପରି ଜନସାଧାରଣ ସୁରକ୍ଷିତ ରହିବେ ସେନେଇ ସଚେତନ କରିବା ଲାଗି ଏକ ବୈଠକ ହୋଇଥିଲେ ସୁଦ୍ଧା ଏଯାଏ ଜନସାଧାରଣଙ୍କୁ ସଚେତନ କରାଯାଇ ନାହିଁ। ବିଭିନ୍ନ ରାଜପଥ ପାର୍ଶ୍ୱରେ ଥିବା ବିଶ୍ରାମାଗାର, ବିଭିନ୍ନ ଛକ ଓ ଜନଗହଳି ସ୍ଥାନରେ ଜଳଛତ୍ର ଖୋଲାଯାଇନାହିଁ। ବୈଠକର ନିଷ୍ପତ୍ତି କେବଳ ନିଷ୍ପତ୍ତିରେ ସୀମିତ ରହିଛି। ପ୍ରବଳ ଗ୍ରୀଷ୍ମ ପ୍ରବାହ ଯୋଗୁ ଜିଲାର ଅନେକ ପୁଷ୍କରିଣୀ ଜଳଶୂନ୍ୟ ହୋଇପଡ଼ିଲାଣି। ଫଳରେ ଆଗାମୀ ଦିନରେ ସମ୍ପୃକ୍ତ ଅଞ୍ଚଳର ଗୃହପାଳିତ ପ୍ରାଣୀଙ୍କ ପାଇଁ ଜଳ ସମସ୍ୟା ଦେଖାଦେବ। ଯେଉଁଠି ପୁଷ୍କରିଣୀ ରହିଛି ସେଠାରେ ପିଲାମାନେ ବହୁ ସମୟ ଧରି ଗାଧୋଉଥିବା ଦେଖିବାକୁ ମିଳୁଛି। ଜିଲାର ୧୧୧ ପଞ୍ଚାୟତ ମଧ୍ୟରୁ ଅନେକ ପଞ୍ଚାୟତରେ ନଳକୂପଗୁଡିକ ଅଚଳ ହୋଇପଡିଛି। ପାଇପ ଯୋଗେ ପାନୀୟ ଜଳ ଯୋଗାଣ ପ୍ରକଳ୍ପଗୁଡିକର ଅବସ୍ଥା ମଧ୍ୟ ତଦ୍ରୂପ। କେଉଁଠି ମୋଟର ପୋଡ଼ିଯାଇଛି ତ କେଉଁଠି ପାଇପ ଲାଇନ ନଷ୍ଟ ହୋଇଯାଇ ଜଳ ଯୋଗାଣ ନେଇ ସମସ୍ୟା ଉପୁଜିଛି। ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ଗତ ୨ମାସ ତଳୁ ଜିଲାର ଅନେକ ଅଞ୍ଚଳରେ ପାଇପ ଯୋଗେ ପ୍ରତି ଘରେ ପାନୀୟ ଜଳ ଯୋଗାଇଦେବାକୁ ଦାବି ହୋଇଥିଲେ ମଧ୍ୟ ଅନେକ ସ୍ଥାନରେ ପାଇପ ବିଛା କାର୍ଯ୍ୟ ଏବଂ ବୃହତ୍ ପାଣି ଟାଙ୍କି କାର୍ଯ୍ୟ ଅଧାପନ୍ତରିଆ ହୋଇପଡିଛି। ସୂଚନାଯୋଗ୍ୟ, ବିଦ୍ୟୁତ୍ କାଟ୍ ଯୋଗୁ ପାଇପ ଯୋଗେ ପାନୀୟ ଜଳ ଯୋଗାଣ ନେଇ ସହର ଓ ଗ୍ରାମାଞ୍ଚଳରେ ସମସ୍ୟା ସୃଷ୍ଟି ହେଉଛି। ଖରାଦିନେ ବିଦ୍ୟୁତ୍ କାଟ୍ ନ କରିବା ଲାଗି ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
