ରସୁଲପୁର,୧୩।୧୧(ଡି.ଏନ.ଏ.): ରସୁଲପୁର ବ୍ଲକ୍ ଅଧୀନ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର(ସିଏଚ୍ସି) ଅଧୀନରେ ପରିଚାଳିତ ବ୍ରହ୍ମବରଦା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର(ପିଏଚ୍ସି)ରେ ନାନା ସମସ୍ୟା ଲାଗିରହିଛି। ହେଲେ ପ୍ରଶାସନିକ ଦୃଷ୍ଟି ଦିଆଯାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେଣୁ ଏଦିଗରେ ସୁଧାର ଆଣିବା ପାଇଁ ରୋଗୀ କଲ୍ୟାଣ ସମିତିର ଅଧ୍ୟକ୍ଷ ତଥା ଜିଲା ପରିଷଦ ସଭ୍ୟ ଚତୁର୍ଭୁଜ ଦ୍ୱିବେଦୀ ପ୍ରଶାସନ ନିକଟରେ ଦାବି ଉପସ୍ଥାପନା କରିଛନ୍ତି।
ଏହି ଡାକ୍ତରଖାନା ଉପରେ ବନ୍ଧଡ଼ିହ, ବ୍ରହ୍ମବରଦା, ମହେଶ୍ୱରପୁର, ଝାଲପଡ଼ା, ମଙ୍ଗଳରାଜପୁର ଆଦି ପଞ୍ଚାୟତର ପ୍ରାୟ ୩୦ ହଜାର ଲୋକ ନିର୍ଭର କରିଥାନ୍ତି। ପ୍ରତ୍ୟହ ପ୍ରାୟ ୨୦୦ ରୋଗୀ ଏହି ଡାକ୍ତରଖାନାକୁ ଆସିଥାନ୍ତି। ସ୍ବାସ୍ଥ୍ୟକେନ୍ଦ୍ରର ଭିତ୍ତିଭୂମି ଅଭାବ ଯୋଗୁ ବହିର୍ବିଭାଗ ରୋଗୀ ଚିକିତ୍ସା ପ୍ରକୋଷ୍ଠଟି ଏବେ ବି ଆଜବେଷ୍ଟସ୍ ତଳେ ଚାଲିଛି। ବିଭିନ୍ନ ସ୍ଥାନରେ ଆଜବେଷ୍ଟସ ଦୁର୍ବଳ ହୋଇପଡିଥିବାରୁ ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି। ଡାକ୍ତରଖାନା ପରିସରରେ ଥିବା ଶୌଚାଳୟ ଓ ଅଳିଆ ଆବର୍ଜନା କୁଣ୍ଡକୁ ଠିକ୍ ଭାବରେ ପରିଚାଳନା କରାଯାଉ ନ ଥିବାରୁ ଅସ୍ବାସ୍ଥ୍ୟକର ପରିବେଶ ସୃଷ୍ଟିକରୁଛି। ଡାକ୍ତରଖାନା ପରିସରରେ ୫ ବର୍ଷରୁ ଊର୍ଦ୍ଧ୍ୱ ହେବ ଦୁଇଟି କୋଠା ନିର୍ମାଣ କାର୍ଯ୍ୟ ସରିଛି। ମାତ୍ର ଉକ୍ତ ଗୃହକୁ ଡାକ୍ତରଖାନାକୁ ହସ୍ତାନ୍ତର କରାଯାଇ ନାହିଁ। ଡାକ୍ତରଖାନାର ସୀମାକୁ ନେଇ ବିବାଦ ରହିଥିବାରୁ ଚତୁଃପାର୍ଶ୍ୱରେ ପାଚେରି ନିର୍ମାଣ ହୋଇ ପାରୁନାହିଁ। ଡାକ୍ତର ନିୟମିତ ଆସୁ ନ ଥିବାରୁ ରୋଗୀ ସେବାରେ ବ୍ୟାଘାତ ଘଟୁଛି। ରୋଗୀଙ୍କ ପାଇଁ ଆସୁଥିବା ସରକାରୀ ଔଷଧର ସୁଷମ ବଣ୍ଟନ କରାଯାଉ ନାହିଁ। ଡାକ୍ତରଖାନା ସମସ୍ୟା ସମାଧାନ ପାଇଁ ରୋଗୀ କଲ୍ୟାଣ ସମିତି ଗଠନ କରାଯାଇଛି। ମାତ୍ର ୩ବର୍ଷ ହେଲାଣି ଥରୁଟିଏ ଏହି ସମିତି ବୈଠକ ବସିନାହିଁ। ଏହାର ସଦସ୍ୟ ଥିବା ରସୁଲପୁର ବିଡିଓ, ବିଭାଗୀୟ ଯନ୍ତ୍ରୀ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କ ଟାଳଟୁଳ ନୀତି ଯୋଗୁ ଏହା କାର୍ଯ୍ୟକାରୀ ହେଉନାହିଁ ବୋଲି କୁହାଯାଉଛି। ନାନା ସମସ୍ୟା ଭିତରେ ଛନ୍ଦି ହୋଇପଡିଥିବା ସ୍ବାସ୍ଥ୍ୟକେନ୍ଦ୍ରରେ ସୁଧାର ଆଣିବା ସକାଶେ ରସୁଲପୁର ବିଡିଓ ଉମାକାନ୍ତ ପରିଡ଼ା, ତହସିଲଦାର ଜ୍ୟୋତିକାନ୍ତ ଭୁଜବଳ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡା.ବିଶ୍ୱରଞ୍ଜନ କର ପ୍ରମୁଖଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ପରେ ସେମାନଙ୍କୁ ନେଇ ଏକ ପ୍ରତିନିଧି ଦଳ କ୍ଷେତ୍ର ପରିଦର୍ଶନ କରି ସ୍ଥିତି ପରଖି ଫେରିଛନ୍ତି। ଆଗାମୀ ଦିନରେ ରୋଗୀକଲ୍ୟାଣ ସମିତି ବୈଠକ ନିୟମିତ ବସିବା, ଉନ୍ନୟନ କାର୍ଯ୍ୟର ଠିକ୍ ପରିଚାଳନା, ସ୍ବାସ୍ଥ୍ୟସେବାରେ ସୁଧାର ଆଣିବା, ଡାକ୍ତରଖାନାର ସୀମା ନିର୍ଦ୍ଧାରଣ, ନୂତନ ଗୃହ ହସ୍ତାନ୍ତରୀକରଣ ଆଦି କାର୍ଯ୍ୟ ତୁରନ୍ତ କରାଯିବା ନେଇ ପଦକ୍ଷେପ ନିଆଯିବ ବୋଲି ବିଭାଗୀୟ ଅଧିକାରୀ ମତପ୍ରକାଶ କରିଛନ୍ତି। ତେବେ ଏହା କେବେ କାର୍ଯ୍ୟକାରୀ ହେଉଛି ତାହା ଦେଖିବାକୁ ଅପେକ୍ଷା।
