ଜୟପୁର, ୧୨।୩ (ନି.ପ୍ର.): କୋରପୁଟ ଜିଲା ଜୟପୁର ସହରରେ ସ୍ପଷ୍ଟ ଦିବାଲୋକରେ ଜଣେ ବ୍ୟବସାୟୀଙ୍କ ଉପରକୁ ହୋଇଥିବା ଗୁଳିକାଣ୍ଡ ଘଟଣାର ଶନିବାର ପର୍ଦ୍ଦାଫାଶ କରିଛି ଟାଉନ ଥାନା ପୋଲିସ। ଏଥିରେ ସମ୍ପୃକ୍ତ ୫ଜଣଙ୍କ ମଧ୍ୟରୁ ୩ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ଖ୍ରୀଷ୍ଟିଆନପେଟାର ଅଭିଜିତ ମହୁରିଆ ଆଲିୟାସ ଜିହିତ (୨୪), ଯମୁନାଗୁଡାର ଫିରୋଜ ନାଗ (୨୨) ଓ ହାନାଗୁଡାର ସଚିନ ନାୟକ (୨୩) ା ୨ ଫେରାର ଅଭିଯୁକ୍ତ ହେଲେ ଜୟନଗରର ଇମରାନ ଖାନ ଓ ବ୍ଲକ କଲୋନିର ଟୁଲୁ ଖୋସ୍ଲା। ସମ୍ପୃକ୍ତ ବ୍ୟବସାୟୀଙ୍କୁ ଅଭିଯୁକ୍ତମାନେ ୫୦ ଲକ୍ଷ ଟଙ୍କା ମାଗିଥିଲେ। ସେ ନ ଦେବାରୁ ଗୁଳି କରି ଜୀବନରେ ମାରିଦେବାକୁ ଯୋଜନା କରିଥିଲେ ବୋଲି ପଚରାଉଚରା ବେଳେ ସ୍ବୀକାର କରିଥିବା ଟାଉନ ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ଅଭିନବ ସୋନକାର କହିଛନ୍ତି।
ଖବରରୁ ଜଣାପଡିଛି, ଗତ ୪ ତାରିଖରେ ୫ଜଣ ଦୁର୍ବୃତ୍ତ ଜୟପୁରର ବ୍ୟବସାୟୀ ପବନ ଅଗ୍ରଓାଲଙ୍କ ପୁଅ ଆଦର୍ଶ (୨୩)ଙ୍କ ଉପରକୁ ଲକ୍ଷ୍ମୀ ପଣ୍ଡା ଛକ ଡେଙ୍ଗାତୋଟା ମଶାଣି ନିକଟରେ ୨ରାଉଣ୍ଡ ଗୁଳିମାଡ଼ କରିଥିଲେ। ଗୁଳି ଆଦର୍ଶଙ୍କ କାର୍ରେ ବାଜି ଲକ୍ଷ୍ୟଭ୍ରଷ୍ଟ ହୋଇଥିଲା। ଫଳରେ ତାଙ୍କର କୌଣସି କ୍ଷତି ହୋଇ ନ ଥିଲା। ଖବରପାଇ ପୋଲିସ ପହଞ୍ଚତ୍ ଘଟଣାସ୍ଥଳରୁ ୨ଟି ୯ଏମ୍ଏମ୍ ଖୋକା ଜବତ କରିଥିଲା। ସାଇଣ୍ଟିଫିକ ଟିମ୍ ମଧ୍ୟ ଏହାର ତଦନ୍ତ କରି ଛାନ୍ଭିନ୍ ଚଳାଇଥିଲା। ଏନେଇ ଏକ ଟିମ୍ ଗଠନ ହୋଇଥିଲା। ବିଭିନ୍ନ ସ୍ଥାନରେ ଚଢାଉ କରି ଉପରୋକ୍ତ ଅଭିଯୁକ୍ତମାନଙ୍କୁ ଗିରଫ କରାଯାଇଥିବା ଏସ୍ପି ସୂଚନା ଦେଇଛନ୍ତି। ତେବେ ଏହି ଘଟଣାର ମାଷ୍ଟର ମାଇଣ୍ଡ୍ ଥିଲେ ଅଭିଯୁକ୍ତ ସଚିନ। ସେ ଆଦର୍ଶଙ୍କ କାର୍ ଶୋ’ରୁମ୍ରେ କାମ କରୁଥିଲେ। ମାଲିକଙ୍କ ସମସ୍ତ ତଥ୍ୟ ଅପରାଧୀମାନଙ୍କୁ ଦେଉଥିଲେ। ଘଟଣା ଘଟାଇବା ପୂର୍ବରୁ ସେମାନେ ଫୋନ କରି ତାଙ୍କୁ ୫୦ ଲକ୍ଷ ଟଙ୍କା ମାଗିଥିଲେ। ସେ ଦେବାକୁ ଅକ୍ଷମତା ପ୍ରକାଶ କରିବାରୁ ତାଙ୍କୁ ହତ୍ୟା କରିବାକୁ ଯୋଜନା କରିଥିଲେ। ୪ରେ ଆଦର୍ଶ ତାଙ୍କ ଶୋ’ରୁମ୍ରୁ ବାହାରିବା ସମ୍ପର୍କରେ ସବୁ ଖବର ସଚିନ ସେମାନଙ୍କୁ ଦେଇଥିଲେ। ଏହାକୁ ଆଧାର କରି ଅଭିଯୁକ୍ତମାନେ ଡେଙ୍ଗାତୋଟା ମଶାଣି ନିକଟରେ ଆଦର୍ଶଙ୍କ ଉପରକୁ ଗୁଳି ଚଳାଇଥିଲେ। ଗିରଫ ଅଭିଯୁକ୍ତଠାରୁ ପିସ୍ତଲ, ମୁଖା, ୪ଟି ସିମ୍ ଜବତ ହୋଇଛି। ସମସ୍ତଙ୍କୁ କୋର୍ଟଚାଲାଣ କରାଯାଇଥିବା ଏସ୍ପି ସୋନକାର କହିଛନ୍ତି। ଏହି ଖବରଦାତା ସମ୍ମିଳନୀରେ ଜୟପୁର ଏସ୍ଡିପିଓ ହରିଶ ବିଶି, କୋରାପୁଟ ଏସ୍ଡିପିଓ ମନୋଜ ପୂଜାରୀ, ଟାଉନ ଥାନା ଅଧିକାରୀ ସମ୍ବିତ ବେହେରା, ସଦର ଥାନା ଅଧିକାରୀ ଈଶ୍ୱର ତାଣ୍ଡି ପ୍ରମୁଖ ଉପସ୍ଥିତ ଥିଲେ।
