କଟକ ଅଫିସ,୨୦।୪: କଟକ ଶିଶୁଭବନର ପେଡିଆଟ୍ରିକ୍ ନ୍ୟୁବର୍ନ ୱାର୍ଡ ଆଇସିୟୁ କ୍ୟାବିନ୍ରେ ରହି ୮ ଦିନ ଧରି ଚିକିତ୍ସିତ ହେଉଥିବା କେନ୍ଦ୍ରାପଡାର ଦୁଇମୁଣ୍ଡିଆ ଶିଶୁକନ୍ୟାଙ୍କ ରବିବାର ମୃତ୍ୟୁ ଘଟିଛି। ଶିଶୁକନ୍ୟାର ଦୁଇଟି ହୃତ୍ପିଣ୍ଡ, ଗୋଟିଏ ରକ୍ତନଳୀ, ଦୁଇଟି ଫୁସ୍ଫୁସ୍, ଦୁଇଟି କିଡ୍ନୀ, ଦୁଇଟି ଗୋଡ, ତିନୋଟି ହାତ, ଗୋଟିଏ ବ୍ଲାଡର, ଗୋଟିଏ ପରିସ୍ରା ଦ୍ୱାର ରହିଥିଲା। ତେଣୁ ଏଭଳି ଶିଶୁମାନଙ୍କର ବଞ୍ଚିବା ଆଶା ବହୁତ କମ୍। ଶିଶୁକନ୍ୟାକୁ ନିଃଶ୍ୱାସ ନେବାରେ ଅସୁବିଧା ହେବା ସହ ଦୁଇଟି ହୃତ୍ପିଣ୍ଡ ଠିକ୍ ଭାବରେ କାମ କରୁ ନ ଥିଲା। ଏଥିସହ ଶରୀରରେ ଅନେକ ସମସ୍ୟା ରହିଥିବାରୁ ତାହାର ମୃତ୍ୟୁ ଘଟିଛି ବୋଲି ଶିଶୁଭବନ ସୁପରିଣ୍ଟେଣ୍ଡେଣ୍ଟ ଜ୍ଞାନେନ୍ଦ୍ର ବେହେରା କହିଛନ୍ତି। ଅପରପକ୍ଷେ ଶିଶୁକନ୍ୟାଙ୍କ ବାପା ଉମାକାନ୍ତ ପରିଡା କହିଛନ୍ତି, ମେଡିକାଲ କର୍ତ୍ତୃପକ୍ଷ ସମସ୍ତ ଚିକିତ୍ସା ସୁବିଧା ଯୋଗାଇ ଦେଉଛନ୍ତି ବୋଲି କହୁଥିଲେ। କିନ୍ତୁ ଝିଅକୁ ଉନ୍ନତ ଚିକିତ୍ସା ସେବା ଯୋଗାଇଲେ ନାହିଁ। ଶିଶୁଭବନର ଚିକିତ୍ସା ବ୍ୟବସ୍ଥା ଠିକ୍ ନ ଲାଗିବାରୁ ଝିଅକୁ ଅନ୍ୟତ୍ର ଚିକିତ୍ସା କରିବା ପାଇଁ ଚାହୁଁଥିଲି। ହେଲେ ସେମାନେ ମତେ ଏଠାରୁ ଯିବାକୁ ଦେଲେ ନାହିଁ। ଏତେଦିନ ମେଡିକାଲରେ ରଖିବା ପରେ ଶେଷରେ ଝିଅର ମୃତ୍ୟୁ ଘଟିଛି।
ସୂଚନାଥାଉ କି, କେନ୍ଦ୍ରାପଡ଼ା ସହରର ଏକ ଘରୋଇ ନର୍ସିଂହୋମରେ ଗତ ୧୧ ତାରିଖରେ ଏକ ଶିଶୁକନ୍ୟା ଜନ୍ମ ହୋଇଥିଲେ। ରାଜନଗର ବ୍ଲକ କଣି ଗ୍ରାମର ଉମାକାନ୍ତ ପରିଡ଼ାଙ୍କ ସ୍ତ୍ରୀ ଅମ୍ବିକା ପୂର୍ବାହ୍ନ ୧୧ଟାରେ ଏହି ଶିଶୁକନ୍ୟାକୁ ଜନ୍ମ ଦେଇଥିଲେ। ଏହାପରେ ଶିଶୁକୁ ତୁରନ୍ତ ନିକଟସ୍ଥ ଜିଲା ମୁଖ୍ୟ ଚିକିତ୍ସାଳୟର ଏସ୍ଏନ୍ସିୟୁ ଏବଂ ପରେ କଟକ ଶିଶୁଭବନକୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କ ଚିକିତ୍ସା ପାଇଁ ୪ ଜଣ ଡାକ୍ତରଙ୍କୁ ନେଇ ଏକ କମିଟି ଗଠନ କରାଯାଇଥିଲା। ଏଥିସହ ପେଡିଆଟିକ୍ ସର୍ଜନ, ନ୍ୟୁରୋ ସର୍ଜନ ଡାକ୍ତରମାନେ ଆସି ଶିଶୁକନ୍ୟାର ସ୍ବାସ୍ଥ୍ୟାବସ୍ଥା ଦେଖୁଥିଲେ।
