ଯାଜପୁର ଅଫିସ,୨୦।୪: ବଲାଙ୍ଗୀର ଓ କେନ୍ଦୁଝର ଜିଲା କେନ୍ଦ୍ରୀୟ ସମବାୟ ବ୍ୟାଙ୍କ(ଡିସିସିବି)ର ଆନନ୍ଦପୁର ଶାଖାରେ ହୋଇଥିବା ଅର୍ଥ ଆତ୍ମସାତ୍ ମାମଲାକୁ ଚାପି ଦିଆଯାଇଛି। ଏଥିରେ ସମ୍ପୃକ୍ତ ପରିଚାଳନା ନିର୍ଦ୍ଦେଶକ ଓ କର୍ମଚାରୀଙ୍କୁ ଦାୟୀ କରି ସେମାନଙ୍କଠାରୁ ଉକ୍ତ ଅର୍ଥକୁ ଆଦାୟଯୋଗ୍ୟ ଦର୍ଶାଯାଇଛି। ସେମାନଙ୍କ ବିରୋଧରେ କେବଳ ସରଚାର୍ଜ ପ୍ରୋସିଡିଂ ମାମଲା ରୁଜୁ କରି ରଫାଦଫା କରିବାକୁ ଉଦ୍ୟମ ହୋଇଛି। ଏହି ମାମଲାର ଭିଜିଲାନ୍ସ କିମ୍ବା ଲୋକପାଳ ତଦନ୍ତ ନିମନ୍ତେ ବିଭାଗୀୟ ଷ୍ଟାଣ୍ଡିଂ କମିଟି ସୁପାରିସ କରିଥିଲେ ହେଁ ତାକୁ ଅଣଦେଖା କରାଯାଇଛି। କେବଳ ଆଇନ ବିଭାଗକୁ ଅଡିଟ୍ ରିପୋର୍ଟ ପଠାଇ ଦେଇ ଦୁର୍ନୀତିଗ୍ରସ୍ତ ଅଧିକାରୀ ଓ କର୍ମଚାରୀଙ୍କୁ ସୁରକ୍ଷା ଯୋଗାଇ ଦିଆଯାଇଛି ବୋଲି ଅଭିଯୋଗ ହୋଇଛି। ଏଥିପାଇଁ ବିଭାଗୀୟ ଅଧିକାରୀ ଓ ଦୁର୍ନୀତିଗ୍ରସ୍ତ କର୍ମଚାରୀଙ୍କ ମଧ୍ୟରେ ଏକ ବଡ଼ଧରଣର ମୂଲଚାଲ ହୋଇଥିବା ମତପ୍ରକାଶ ପାଇଛି।
ବଲାଙ୍ଗୀର ଜିଲା କେନ୍ଦ୍ରୀୟ ସମବାୟ ବ୍ୟାଙ୍କର ୨୦୧୫-୧୬ଠାରୁ ୨୦୧୮-୧୯ ମଧ୍ୟରେ ଘଟିଥିବା ବିଭିନ୍ନ ଆର୍ଥିକ ଅନିୟମିତତା ଏବଂ ୧ା୧୨ା୨୦୧୮ଠାରୁ ୩୧ା୧୦ା୨୦୧୯ ମଧ୍ୟରେ ଏଟିଏମ୍ ମାଧ୍ୟମରେ ଜାଲିଆତି କରି ଅର୍ଥ ଉଠାଣ ଉପରେ ୨ଟି ସ୍ବତନ୍ତ୍ର ଅଡିଟ୍ କରାଯାଇଥିଲା। ଏହି ସ୍ବତନ୍ତ୍ର ଅଡିଟ୍ର ବିବରଣୀ ଅନୁଯାୟୀ ୨୦୧୫-୧୬ ଠାରୁ ୨୦୧୮-୧୯ ମଧ୍ୟରେ ୧ କୋଟି ୪୭ ଲକ୍ଷ ୫୯ ହଜାର ୩୨ ଟଙ୍କାର ଆର୍ଥିକ ଅନିୟମିତତା ଦୃଷ୍ଟିଗୋଚର ହୋଇଥିଲା। ଏଥିପାଇଁ ୧୫ ଜଣ ପରିଚାଳନା ପରିଷଦ ନିର୍ଦ୍ଦେଶକ ଏବଂ ୨୩ ଜଣ କର୍ମଚାରୀଙ୍କୁ ଦାୟୀ କରି ସେମାନଙ୍କଠାରୁ ଉକ୍ତ ଅର୍ଥକୁ ଆଦାୟଯୋଗ୍ୟ ଦର୍ଶାଯାଇଛି। ଏଥିପାଇଁ ଉକ୍ତ ଅଧିକାରୀ ଓ କର୍ମଚାରୀଙ୍କ ବିରୋଧରେ ସରଚାର୍ଜ ପ୍ରୋସିଡିଂ ମାମଲା ରୁଜୁ କରାଯାଇଛି। ଏଟିଏମ ମାଧ୍ୟମରେ ଅର୍ଥ ଉଠାଣ ବିଷୟରେ ହୋଇଥିବା ସ୍ବତନ୍ତ୍ର ସମୀକ୍ଷା ବିବରଣୀ ଅନୁଯାୟୀ ୧୦ ଲକ୍ଷ ୩୪ ହଜାର ୬୩୨ ଟଙ୍କାର ଜାଲିଆତି ହୋଇଥିଲା। ଅଡିଟରଙ୍କ ଦ୍ୱାରା ଏହି ଜାଲିଆତିରେ ସମ୍ପୃକ୍ତ ୧୦ ଜଣ କର୍ମଚାରୀଙ୍କ ନାମ ଦର୍ଶାଯାଇଥିବାବେଳେ ୮ ଜଣଙ୍କ ବିରୋଧରେ ସରଚାର୍ଜ ପ୍ରୋସିଡିଂ ମାମଲା ରୁଜୁ କରାଯାଇଛି। ଏହାବ୍ୟତୀତ ୧୦ କର୍ମଚାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ବଲାଙ୍ଗୀର ଟାଉନ ଥାନାରେ ୨ଟି ଏଫଆଇଆର ରୁଜୁ ହୋଇଛି।
କେନ୍ଦୁଝର ଜିଲା କେନ୍ଦ୍ର ସମବାୟ ବ୍ୟାଙ୍କ ଅଧୀନ ଆନନ୍ଦପୁର ଶାଖାର ୨୦୧୭-୧୮ଠାରୁ ୨୦୧୯-୨୦ ମଧ୍ୟରେ ସ୍ବତନ୍ତ୍ର ଅଡିଟ୍ ହୋଇଥିଲା। ବ୍ରାଞ୍ଚରେ ବିଭିନ୍ନ ଋଣ ପ୍ରକ୍ରିୟା ଏବଂ ଏ ସଂକ୍ରାନ୍ତୀୟ ରାଜିନାମାରେ ତ୍ରୁଟି ପାଇଁ ସମ୍ପୃକ୍ତ କର୍ମଚାରୀଙ୍କ ବିରୋଧରେ ୧୦ ଲକ୍ଷ ୧୫ ହଜାର ୬୧୩ ଟଙ୍କା ଆଦାୟଯୁକ୍ତ ଅର୍ଥ ଦର୍ଶାଯାଇଅଛି। ଉକ୍ତ ଅର୍ଥକୁ ଆଦାୟ କରିବା ପାଇଁ ଇତିମଧ୍ୟରେ ଆସିଷ୍ଟାଣ୍ଟ ଅଡିଟର ଜେନେରାଲ ଅଫ୍ କୋଅପରେଟିଭ ସୋସାଇଟିଜ୍ (ଏଏଜିସିଏସ୍)ଠାରେ ସରଚାର୍ଜ ପ୍ରୋସିଡିଂ ମାମଲା ଦାୟର ହୋଇ ଶୁଣାଣି ଜାରି ରହିଛି। ଉପରୋକ୍ତ ଅନିୟମିତତା ଅର୍ଥ ଆତ୍ମସାତ୍ କିମ୍ବା ଜାଲିଆତି ଜନିତ ହୋଇ ନ ଥିବାରୁ ସମ୍ପୃକ୍ତ କର୍ମଚାରୀମାନଙ୍କ ବିରୋଧରେ କୌଣସି ଫୌଜଦାରୀ ମାମଲା ନ ହୋଇ ସମବାୟ ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ରାଜ୍ୟ ସମବାୟ ସମିତି(ମାର୍କେଟିଂ)ର ଡେପୁଟି ରେଜିଷ୍ଟ୍ରାର ୨୬ା୩ା୨୦୨୧ରେ ସମବାୟ ସମିତିର ଅଣ୍ଡର ସେକ୍ରେଟାରିଙ୍କୁ ଦେଇଥିବା ପତ୍ରରେ ଦର୍ଶାଇଛନ୍ତି।
