ଲଣ୍ଡନ,୫।୧ : ଜାନୁଆରୀ ୧୦ ରେ ପ୍ରକାଶିତ ହେବାକୁ ଥିବା ତାଙ୍କ ଆତ୍ମଜୀବନୀ ‘ସ୍ପେୟାର’ରେ ପ୍ରିନ୍ସ ହ୍ୟାରି ତାଙ୍କ ବ୍ୟକ୍ତିଗତ ଜୀବନର ଆଶ୍ଚର୍ଯ୍ୟଜନକ ଘଟଣା ବିଷୟରେ ବିସ୍ତୃତ ବିବରଣୀ ଦେଇଛନ୍ତି। ସେ ତାଙ୍କ ବଡ଼ ଭାଇ ପ୍ରିନ୍ସ ୱିଲିୟମଙ୍କ ବିରୋଧରେ ଅନେକ ଗମ୍ଭୀର ଅଭିଯୋଗ ଆଣିଛନ୍ତି। ଏହି ଅଭିଯୋଗଗୁଡିକ ମଧ୍ୟରୁ ଗୋଟିଏ ହେଉଛି ଦୁହିଁଙ୍କ ମଧ୍ୟରେ ହାତାହାତି ଘଟଣା ଯାହା ରାଜପରିବାରରେ ଆଲୋଡ଼ନ ସୃଷ୍ଟି କରିଛି। ବାସ୍ତବରେ, ପ୍ରିନ୍ସ ହ୍ୟାରି ତାଙ୍କ ବଡ଼ ଭାଇ ପ୍ରିନ୍ସ ୱିଲିୟମଙ୍କ ବିରୋଧରେ ଶାରୀରିକ ନିର୍ଯାତନା ଅଭିଯୋଗ କରିଛନ୍ତି। ଏହି ଅଭିଯୋଗରୁ ଜଣା ପଡିଛି ଯେ ବଡ଼ଘର ବଡ଼ ଗୁମର କଥା ଭଳି ରାଜ ପରିବାରରେ ସବୁକିଛି ଠିକ ଚାଲିନାହିଁ।
ପ୍ରିନ୍ସ ହ୍ୟାରି ଏକ ଗୁରୁତର ଅଭିଯୋଗ କରିଛନ୍ତି ଯେ ମୋର ବଡ଼ ଭାଇ ପ୍ରିନ୍ସ ୱିଲିୟମ ଯୁକ୍ତିତର୍କ ସମୟରେ ମୋ କଲର ଧରି ମୋତେ ତଳେ ପକାଇ ଦେଇଥିଲେ ଏବଂ ମୁଁ କୁକୁର ଖାଇବା ପାତ୍ରରେ ପଡ଼ିଯାଇଥିଲି। ଏହି କାରଣରୁ ମୋର ପୋଷାକ ଛିଣ୍ଡିଗଲା ଏବଂ ମୋ ପିଠିରେ କ୍ଷତ ହୋଇଥିଲା। ଏହି ପ୍ରକାଶନ ରୟାଲ ପରିବାରରେ ଏକ ଆଲୋଡ଼ନ ସୃଷ୍ଟି କରିଛି। ବ୍ରିଟେନର ରାଣୀ ଏଲିଜାବେଥ ଦ୍ୱିତୀୟଙ୍କ ମୃତ୍ୟୁ ପରେ ରୟାଲ ପରିବାରର ପରିବେଶ ଖରାପ ହେବାରେ ଲାଗିଛି।
ଗଣମାଧ୍ୟମ ଦ୍ୱାରା ମିଳିଥିବା ଉଦ୍ଧୃତାଂଶ ଅନୁଯାୟୀ, ୱିଲିୟମ ପ୍ରିନ୍ସ ହ୍ୟାରିଙ୍କ ପତ୍ନୀ ମେଘନାଙ୍କୁ ବିପଜ୍ଜନକ ଏବଂ ଅଭଦ୍ର ବୋଲି କହିଥିଲେ। ଯେତେବେଳେ ୱିଲିୟମ ହ୍ୟାରିଙ୍କ କଲର ଧରିଥିଲେ ସେତେବେଳେ ଝଗଡା ବଢ଼ିଥିଲା। ଶାରୀରିକ ଆକ୍ରମଣ ବିଷୟରେ ପ୍ରିନ୍ସ ହ୍ୟାରି କହିଛନ୍ତି ଯେ ତାଙ୍କ ପିଠିରେ ସେହି ଆଘାତ ଚିହ୍ନ ଏବେ ବି ରହିଛି। ହ୍ୟାରି ଏହା ମଧ୍ୟ କହିଛନ୍ତି ଯେ ସେ ତାଙ୍କ ପତ୍ନୀ ମେଘନା ମାର୍କଲେଙ୍କୁ ଏହି ଘଟଣା ବିଷୟରେ କହି ନାହାନ୍ତି । କିନ୍ତୁ ପରେ ସେ ମୋ ପିଠିରେ ଆଘାତ ଲାଗିଥିବାର ଦେଖିଥିଲେ। ସେ ଦୁଃଖ ପ୍ରକାଶ କରିଥିଲେ। ଏହି ଆତ୍ମଜୀବନୀ ଆସନ୍ତା ସପ୍ତାହରେ ସାରା ବିଶ୍ୱରେ ପ୍ରକାଶିତ ହେବାକୁ ଯାଉଛି।
