ନର୍ଥହାମ୍ପଟନ,୧୦।୭: ଇଂଲଣ୍ଡ ବିପକ୍ଷ ପ୍ରଥମ ଟି୨୦ ମ୍ୟାଚ୍ରେ ଭାରତୀୟ ମହିଳା ଦଳକୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା। କିନ୍ତୁ ହରଲିନ ଦେଓଲଙ୍କ ସୁପରମ୍ୟାନ କ୍ୟାଚ୍ ପ୍ରଶଂସକଙ୍କ ମନ ଜିତି ନେଇଛି। ଏପରି କି କ୍ରିକେଟର ଭଗବାନ କୁହାଯାଉଥିବା ସଚିନ ତେନ୍ଦୁଲକରଙ୍କୁ ମଧ୍ୟ ବେଶ୍ ପ୍ରଭାବିତ କରିଛି ଏହି କ୍ୟାଚ୍।
୧୯ତମ ଓଭରରେ ଲଙ୍ଗ ଅଫ୍ ଅଞ୍ଚଳକୁ ଏକ ବଡ଼ ଶଟ ଖେଳିଥିଲେ ଇଂଲଣ୍ଡ ବ୍ୟାଟ୍ସଓମେନ ଆମି ଜୋନ୍ସ। ସେଠାରେ ଫିଲ୍ଡିଂ କରୁଥିବା ହରଲିନ ପ୍ରଥମେ ବଲକୁ କ୍ୟାଚ୍ କରି ବାଉଣ୍ଡ୍ରି ବାହାରକୁ ଯିବା ପୂର୍ବରୁ ବଲକୁ ଉପରକୁ ଫିଙ୍ଗିଥିଲେ। ତା’ ପରେ ଫିଲ୍ଡ ମଧ୍ୟକୁ ସୁପରମ୍ୟାନ ଭଳି ଡେଇଁ ନେଇଥିଲେ କ୍ୟାଚ୍। ହରଲିନଙ୍କ ଏହି କ୍ୟାଚ୍ ଏତେ ଆକର୍ଷକ ଥିଲା ଯେ, ତାଳି ନ ମାରି ରହିପାରି ନ ଥିଲେ ପ୍ରତିପକ୍ଷ ଦଳର ଖେଳାଳିମାନେ।
ହରଲିନଙ୍କ ଏହି କ୍ୟାଚ୍ର ଭିଡିଓ ଶେୟାର କରି ସଚିନ ଲେଖିଛନ୍ତି, ହରଲିନଙ୍କ ଚମତ୍କାର କ୍ୟାଚ୍। ନିଶ୍ଚିତ ଭାବେ ଏହା ମୋ ପାଇଁ ବର୍ଷର ଶ୍ରେଷ୍ଠ କ୍ୟାଚ୍। ସଚିନଙ୍କ ଭଳି ଇଂଲଣ୍ଡ କ୍ରିକେଟ, ଭିଭିଏସ୍ ଲକ୍ଷ୍ମଣ, ଓ୍ବେଷ୍ଟଇଣ୍ଡିଜ ଦଳର ପୂର୍ବତନ ଅଧିନାୟକ ଡାରେନ ସାମି ମଧ୍ୟ ଭିଡିଓ ଶେୟାର କରି ହରଲିନଙ୍କୁ ପ୍ରଶଂସା କରିଛନ୍ତି।
