ଅହମଦାବାଦ,୧୦।୩(ପି.ଟି.): ୧୨ ତାରିଖରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ ପୂର୍ବରୁ ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ନେଟ୍ସରେ ବେଶ୍ ଝାଳ ବୁହାଇଛନ୍ତି। ନେଟ୍ସରେ ସାମାନ୍ୟ ଆକ୍ସନରେ ସୁଧାର ଆଣି ବୋଲିଂ କରିଥିଲେ। ହାର୍ଦ୍ଦିକ ନେଟ୍ ସେସନର ପ୍ରାକ୍ଟିସ ଭିଡିଓ ନିଜ ଟୁଇଟର ପେଜରେ ଅପ୍ଲୋଡ କରିଛନ୍ତି। ଏଥିରେ ସେ ବଡ଼ ବଡ଼ ଶଟ୍ମାନ ଖେଳୁଥିବାର ଦେଖାଯାଇଛି। ପ୍ରସ୍ତୁତି ପୂରା ହୋଇଛି ଓ ଟି୨୦ ମ୍ୟାଚ୍ ଖେଳିବାକୁ ବେଶ୍ ବ୍ୟଗ୍ର ଅଛି ବୋଲି ସେ ଭିଡିଓର କ୍ୟାପସନରେ ଉଲ୍ଲେଖ କରିଛନ୍ତି। ହାର୍ଦ୍ଦିକଙ୍କ ବ୍ୟାଟିଂ ଅଭ୍ୟାସକୁ ଅଧିନାୟକ ବିରାଟ କୋହଲି, କୋଚ୍ ରବି ଶାସ୍ତ୍ରୀ, ବ୍ୟାଟିଂ କୋଚ୍ ବିକ୍ରମ ରାଠୋର ଦୂରରେ ଠିଆହୋଇ ଦେଖୁଥିଲେ। ଭିଡିଓ ଶେଷରେ ପାଣ୍ଡ୍ୟା ବୋଲିଂ କରିଥିବାର ଦେଖାଯାଇଛି।
ଗତବର୍ଷ ଡିସେମ୍ବରରେ ଅଷ୍ଟ୍ରେଲିଆ ଗସ୍ତ ଅବସରରେ ପାଣ୍ଡ୍ୟା ଶେଷଥର ପାଇଁ ଟି୨୦ ମ୍ୟାଚ୍ ଖେଳିଥିଲେ। ୨୦୧୯ରେ ପିଠିରେ ଇଞ୍ଜୁରି (ଷ୍ଟ୍ରେସ୍ ଫ୍ରାକ୍ଚର) କାରଣରୁ ବୋଲିଂ କରୁ ନ ଥିଲେ। ତେବେ ଗତ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ ସେ କିଛି ଓଭର ବୋଲିଂ କରିବାକୁ ବାଧ୍ୟ ହୋଇଥିଲେ। ଏବେ ପାଣ୍ଡ୍ୟା ତାଙ୍କ ବୋଲିଂ ଆକ୍ସନରେ ପରିବର୍ତ୍ତନ କରିଛନ୍ତି ବୋଲି ପୂର୍ବତନ ଜାତୀୟ ଚୟନକର୍ତ୍ତା ଦେବାଙ୍ଗ ଗାନ୍ଧୀ କହିଛନ୍ତି। ଇଞ୍ଜୁରିକୁ ଦୃଷ୍ଟିରେ ରଖି ସେ ତାଙ୍କ ଜମ୍ପର ଲେନ୍ଥକୁ ଯଥେଷ୍ଟ କମାଇଛନ୍ତି। ଯାହାଫଳରେ ତାଙ୍କ ପିଠି ଉପରେ କମ୍ ଚାପ ପଡିବ। ଆଗାମୀ ଅକ୍ଟୋବରରେ ଖେଳାଯିବାକୁ ଥିବା ଟି୨୦ ବିଶ୍ୱକପ୍ ଓ ଇଂଲଣ୍ଡରେ ଆୟୋଜନ ହେବାକୁ ଥିବା ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ଫାଇନାଲ ଓ ଟେଷ୍ଟ ସିରିଜ ପାଇଁ ପାଣ୍ଡ୍ୟା ଭାରତୀୟ ଦୃଷ୍ଟିକୋଣରୁ ଉପଯୋଗୀ ସାବ୍ୟସ୍ତ ହେବେ।
ଟି୨୦ ସିରିଜରେ ଧାଓ୍ବନ ନ ଖେଳିପାରନ୍ତି
ଟି୨୦ ସିରିଜରେ ଅଭିଜ୍ଞ ଓପନର ଶିଖର ଧାଓ୍ବନ୍ ନ ଖେଳିବା ସମ୍ଭାବନା ସୃଷ୍ଟି ହୋଇଛି। ତେବେ ଯଦି ଲୋକେଶ ରାହୁଲ ଓ ରୋହିତ ଶର୍ମା ଆହତ ହୁଅନ୍ତି ତାଙ୍କୁ ସୁଯୋଗ ମିଳିପାରେ। ସେ ପ୍ରଥମ ପସନ୍ଦର ବ୍ୟାକ୍- ଅପ୍ ଓପନର ଭାବେ ଦଳରେ ସ୍ଥାନ ବଜାୟ ରଖିପାରନ୍ତି। ତେବେ ଦିନିକିଆ ସିରିଜରେ ତାଙ୍କୁ ସୁଯୋଗ ମିଳିପାରେ ବୋଲି ଗାନ୍ଧୀ କହିଛନ୍ତି।
୪ ନଂ.ରେ ପନ୍ତ, ୫ରେ ସୂର୍ଯ୍ୟ ଖେଳିବା ସମ୍ଭାବନା
ଟି୨୦ ସିରିଜରେ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ୪ ନମ୍ବରରେ ବ୍ୟାଟିଂ କରିବା ଉଚିତ ହେବ ବୋଲି ଦେବାଙ୍ଗ ଗାନ୍ଧୀ କହିଛନ୍ତି। ସେ ଏହି ସ୍ଥାନରେ ତାଙ୍କର ସ୍ବାଭାବିକ ବିସ୍ଫୋରକ ବ୍ୟାଟିଂ କରିବେ। ସେହିପରି ୫ ନଂ.ରେ ସୂର୍ଯ୍ୟକୁମାର ଯାଦବ ବ୍ୟାଟିଂ କରିପାରନ୍ତି। ଗତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ସୂର୍ଯ୍ୟକୁମାର ମୁମ୍ବାଇ ଇଣ୍ଡିଆନ୍ସ ତରଫରୁ ଖେଳି ଜବରଦସ୍ତ ସଫଳତା ପାଇଥିଲେ। ସେ ମଧ୍ୟ ଦିନିକିଆ ଦଳରେ ସ୍ଥାନ ପାଇବା ଉଚିତ ବୋଲି ଗାନ୍ଧୀ କହିଛନ୍ତି।
