ପଟ୍ଟାଙ୍ଗି,୨୨।୬(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ପେଟୁରୁ ପଞ୍ଚାୟତ ଅନ୍ତର୍ଗତ କପାଟିଗୁଡା ଜଙ୍ଗଲରୁ ସନ୍ଦେହଜନକ ଭାବେ ଯୁବତୀଯୁବକଙ୍କ ମୃତଦେହ ସୁଙ୍କି ପୋଲିସ ଉଦ୍ଧାର କରି ତଦନ୍ତ ପ୍ରକ୍ରିୟାକୁ ଜୋରଦାର କରିଛି । ସୂଚନା ମୁତାବକ ଉକ୍ତ ବ୍ଲକର ରାଲେଗଡା ପଞ୍ଚାୟତର ଲମନ୍ତାପାଡୁ ଗ୍ରାମର ଜଣେ ଯୁବତୀ ପେଟୁରୁ ପଞ୍ଚାୟତର କପାଟିଗୁଡା ଗ୍ରାମର ଯୁବକଙ୍କୁ ଦୀର୍ଘ ବର୍ଷ ଧରି ଭଲ ପାଇ ଆସୁଥିଲେ। କିନ୍ତୁ ଯୁବକ ଜଣକ ଯୁବତୀଙ୍କ ଘରେ ଶନିବାର ପହଞ୍ଚି ଯୁବତୀକୁ ନିଜ ସହ ଡାକି ନେଇ ଥିବା ଘର ଲୋକଙ୍କ ସୂଚନାରୁ ଜଣାପଡିଥିବା ବେଳେ ରବିବାର ସାବେଳେ କପାଟିଗୁଡା ଜଙ୍ଗଲରେ ଦୁହିଁଙ୍କ ମୃତଦେହ ଗୋଟିଏ ଗଛ ଡାଳରେ ଝୁଲୁଥିବା କିଛି ଗ୍ରାମବାସୀ ଦେଖି ଯୁବତୀଙ୍କ ପରିବାରକୁ ଜଣାଇଥିଲେ । ଉକ୍ତ ଘଟଣା ପ୍ରଘଟ ହେବା ପରେ ଘଟଣାସ୍ଥଳକୁ ଉଭୟ ଯୁବତୀଯୁବକଙ୍କ ପରିବାର ବର୍ଗଙ୍କ ସହ ଦୁଇ ଗ୍ରାମର ଗ୍ରାମବାସୀ ଏବଂ ଭଦ୍ରବ୍ୟକ୍ତି ପହଞ୍ଚି ପାରିପାଶର୍ବିକ ସ୍ଥିତି ଅନୁଧ୍ୟାନ କରି ସୁଙ୍କି ପୋଲିସକୁ ଖବର ଦେଇଥିଲେ । ଖବରପାଇ ସୁଙ୍କି ଆଇଆଇସି ଚତୁର୍ଭୁଜ ନାୟକ ଏବଂ ଅନ୍ୟ ପୋଲିସ ଅଧିକାରୀ କର୍ମଚାରୀ ପହଞ୍ଚି ଦୁଇ ମୃତଦେହ ଉଦ୍ଧାର କରି ଘଟଣା ସ୍ଥଳେ ରହି ଟିମ ଡକାଇ ତଦନ୍ତ ପ୍ରକ୍ରିୟାକୁ ଜୋରଦାର କରିଛି। ସେପଟେ ଦୁଇ ମୃତଦେହକୁ ନେଇ ଏହା ଆତ୍ମହତ୍ୟା ନୁହେଁ ହତ୍ୟା କରି ଆତ୍ମହତ୍ୟାର ରୂପ ଦିଆଯାଇଥିବା ଲୋକଙ୍କ ମଧ୍ୟରେ ଆଲୋଚନା ହେଉଛି। ଅନ୍ୟପକ୍ଷରେ ସୁଙ୍କି ଆଇଆଇସି ନାୟକ ଏହାକୁ ନେଇ ଉଭୟ ପରିବାରଙ୍କ ଲିଖିତ ଅଭିଯୋଗକୁ ଆଧାର କରି ଦୁଇଟି କେସ ନଂ ୦୪/୨୬ ଏବଂ ୦୫/୨୬ ରୁଜୁ କରାଯାଇଛି । ଶବ ବ୍ୟବଚ୍ଛେଦ ଏବଂ ସାଇଣ୍ଟିଫିକ ଟିମର ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡିବ ବୋଲି ପ୍ରକାଶ କରିଛନ୍ତି ।
