ରାୟଗଡ଼ା,୩ା୧(ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ନିୟମଗିରିରେ ବସବାସ କରୁଥିବା ଆଦିମ ଜନଜାତିଙ୍କ ହାତବୁଣା ଶାଲ୍ କାପଡ଼ାଗୁନ୍ଦା ଏବଂ ଗୁଣପୁର ଲାଞ୍ଜିଆ ସୌରାଙ୍କ ଚିତ୍ରକଳା ଇଡିତାଲ ଜିଆଇ ଟ୍ୟାଗ୍ ମାନ୍ୟତା ପାଇଥିବା ନେଇ ସୂଚନା ମିଳିଛି । ଓଡ଼ିଶାର ୭ଟି ସାମଗ୍ରୀ ମଧ୍ୟରୁ କାପଡ଼ାଗୁନ୍ଦା ଜିଆଇ ଟ୍ୟାଗ୍କୁ କେନ୍ଦ୍ର ସରକାର ମାନ୍ୟତା ମିଳିଛି।
ନିୟମଗିରିରେ ବସବାସ କରୁଥିବା ଏହି ଆଦିମ ଜନଜାତିଙ୍କ ଚଳଣି ସାଧାରଣ ଚାଲିଚଳନଠାରୁ ସମ୍ପୂର୍ଣ୍ଣ ଭିନ୍ନ। ଏମାନେ ଯେଉଁ ଶାଲ୍ ପରିଧାନ କରନ୍ତି ତାହା ନିଜେ ବୁଣିବା ସହ ଏହାକୁ ବିଭିନ୍ନ ରଙ୍ଗବେରଙ୍ଗ ଆକୃତି ଦେଇଥାନ୍ତି। ଉକ୍ତ ଶାଲ୍କୁ କାପଡ଼ାଗୁନ୍ଦା ବୋଲି କୁହାଯାଏ। ଏହି କାପଡ଼ାଗୁନ୍ଦା ବିଦେଶରୁ ଆସିଥିବା ପର୍ଯ୍ୟଟକମାନେ ବେଶ୍ ପସନ୍ଦ କରିଥାନ୍ତି। ଯାହାଫଳରେ ଏମାନଙ୍କର କାରୁକାର୍ଯ୍ୟ ବର୍ତ୍ତମାନ ବିଶ୍ୱରେ ଏକ ପରିଚୟ ସୃଷ୍ଟି କରିପାରିଛି ଡଙ୍ଗରିଆ ସମ୍ପ୍ରଦାୟଙ୍କର। ଏହି କାପଡ଼ାଗୁନ୍ଦା ଶାଲ୍ ବର୍ତ୍ତମାନ ବିଶ୍ୱରେ ଲୋକପ୍ରିୟତା ହାସଲ କରିଛି ଏବଂ ଏହାକୁ କେବଳ ନିୟମଗିରିର ଡଙ୍ଗରିଆ କନ୍ଧ ସମ୍ପ୍ରଦାୟ ବୁଣି ତିଆରି କରୁଛନ୍ତି । ୨୦୨୧ ଅଗଷ୍ଟ ୩ରେ କାପଡ଼ାଗୁନ୍ଦା ଜିଆଇ ଟ୍ୟାଗ୍ ମାନ୍ୟତା ପାଇଁ ଆବେଦନ କରାଯାଇଥିଲା। ସେହିଭଳି ଗୁଣପୁର ଲାଞ୍ଜିଆ ସୌରାଙ୍କ ଇଡିତାଲ ଚିତ୍ରକଳାକୁ ଜିଆଇ ଟ୍ୟାଗ୍ ମାନ୍ୟତା ପାଇଁ ୨୦୨୨ ଏପ୍ରିଲ ୧୩ ତାରିଖରେ ଆବେଦନ ହୋଇଥିଲା। ଇଡିତାଲ ମଧ୍ୟ ଜିଆଇ ଟ୍ୟାଗ୍ ମାନ୍ୟତା ମିଳିଛି। କାପଡ଼ାଗୁନ୍ଦା ଜିଆଇ ଟ୍ୟାଗ୍ ମାନ୍ୟତା ସାର୍ଟିଫିକେଟ ନମ୍ବର ୫୪୧ ଏବଂ ଇଡିତାଲ ସାର୍ଟିଫିକେଟ ନମ୍ବର ୫୪୭ ରହିଥିବା ସୂଚନା ମିଳିଛି। ଏହି ମାନ୍ୟତା ପାଇଁ ରାୟଗଡ଼ା ଜିଲାର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିବାରୁ ଜିଲାବାସୀ ଡଙ୍ଗରିଆ କନ୍ଧ ଓ ଲାଞ୍ଜିଆ ସୌରାଙ୍କ ଭୂୟସୀ ପ୍ରଶଂସା କରିଛନ୍ତି।
