ଡେରାବିଶ,୨୪୯(ବେବର୍ତା ଅଜୟ ଦାସ): କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକରେ ୨୦୨୨ ଶିକ୍ଷା ବର୍ଷରେ ଆଦର୍ଶ ବିିଦ୍ୟାଳୟ ଖୋଲାଯାଇଥିଲା। ବ୍ଲକ ଅଧୀନ ଚାଟରାଚକଡ଼ା ପଞ୍ଚାୟତରେ ଖାଲିପଡ଼ିଥିବା ବଟ ମହାପୁରୁଷ ବାଳିକା ଉଚ୍ଚବିଦ୍ୟାଳୟରେ ଅସ୍ଥାୟୀ ଭାବେ ଶିକ୍ଷାଦାନ ଆରମ୍ଭ କରାଯାଇଥିଲା। ପାଟକୁରା ବିଧାୟିକା ସାବିତ୍ରୀ ଅଗ୍ରୱାଲା ଏହି ବିିଦ୍ୟାଳୟର ଶୁଭାରମ୍ଭ କରିଥିଲେ। ସେହିବର୍ଷ ଏହି ବିଦ୍ୟାଳୟରେ ୯୧ ଛାତ୍ରୀଛାତ୍ର ନାମ ଲେଖାଇଥିଲେ। ହେଲେ ଏହି ବିଦ୍ୟାଳୟ ଏବେ ବିଭାଗୀୟ କତ୍ତୃପକ୍ଷଙ୍କ ଦୃଷ୍ଟି ଆଢ଼ୁଆଳରେ ରହିଛି। ୨୦୨୩ ଶିକ୍ଷା ବର୍ଷରେ ଷଷ୍ଠ ଶ୍ରେଣୀରେ ଅଧ୍ୟୟନ କରୁଥିବା ଛାତ୍ରୀଛାତ୍ର ପାସ୍ କରି ସପ୍ତମ ଶ୍ରେଣୀକୁ ଆସିଛନ୍ତି। ଚଳିତ ଶିକ୍ଷାବର୍ଷରେ ଷଷ୍ଠ ଶ୍ରେଣୀରେ ୮୪ ଜଣ ଛାତ୍ରୀଛାତ୍ର ନାମଲେଖାଇଛନ୍ତି। ଏହି ୨ ଶ୍ରେଣୀର ଛାତ୍ରୀଛାତ୍ରଙ୍କ ସଂଖ୍ୟା ଏବେ ୧୬୫ ରହିଛି। ଉଭୟ ଶ୍ରେଣୀରେ ଦୁଇଟି ଲେଖାଏ ସେକ୍ସନ ରହିଛି।ଏହି ବିଦ୍ୟାଳୟରେ ଆଜି ପର୍ଯ୍ୟନ୍ତ ପାଠାଗାର ନାହିଁ। ବିଦ୍ୟାଳୟ ପରିସରରେ ଶୌଚାଳୟ ଓ ପରିସ୍ରାଗାର ନ ଥିବାରୁ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ଶିକ୍ଷୟିତ୍ରୀ ଶିକ୍ଷକମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ଅସରାଏ ବର୍ଷା ହେଲେ ବିଦ୍ୟାଳୟ ପଡ଼ିଆରେ ପାଣି ଜମି ବନ୍ୟାର ଭ୍ରମ ସୃଷ୍ଟି କରୁଛି। ଏପରି କି ଛାତ୍ରୀଛାତ୍ରଙ୍କ ବସିବା ପାଇଁ ବେଞ୍ଚ ଡେସ୍କ ନାହିଁ।ପିଲାମାନେ ତଳେ ବସି ପାଠ ପଢ଼ୁଛନ୍ତି। ଏଥିପାଇଁ ଜିଲା ଶିକ୍ଷାଧିକାରୀଙ୍କୁ ଆର୍ଥିକ ଅନୁଦାନ ଯୋଗାଇ ଦିଆଯାଇଥିଲେ ମଧ୍ୟ ଶିକ୍ଷାଧିକାରୀ ଏଯାଏ ବେଞ୍ଚ ଡେସ୍କ ଯୋଗାଇ ନ ଥିବା ଅଭିଯୋଗ ହୋଇଛି। ବିଦ୍ୟାଳୟ ପରିସରରେ ହାପି ମେଳକ ପ୍ରାଥମିକ ବିଦ୍ୟାଳୟ ଓ ଅଙ୍ଗନୱାଡ଼ି କେନ୍ଦ୍ର ଚାଲୁଛି। ଗୃହ ଅଭାବରୁ ଗୋଟିଏ କୋଠରୀରେ ସ୍କୁଲ ଅଧ୍ୟକ୍ଷ ଓ ଶିକ୍ଷୟିତ୍ରୀ, ଶିକ୍ଷକ ବସି କାମ କରୁଥିବା ଦେଖିବାକୁ ମିଳିଛି।
ପୂର୍ତ୍ତବିଭାଗର ବେପରୁଆ ନୀତି ପାଇଁ ବ୍ଲକ ଅଧୀନସ୍ଥ କୁରୁଜଙ୍ଗା-ବଡ଼ମଙ୍ଗରାଜପୁରଠାରେ ଆଦର୍ଶ ବିଦ୍ୟାଳୟର ନବନିର୍ମିତ ଗୃହ ଅଧପନ୍ତରିଆ ହୋଇ ପଡ଼ି ରହିଛି। ଏହି ଗୃହ ପାଇଁ ବିଭାଗ ପକ୍ଷରୁ ୭କୋଟି ୯୧ ଲକ୍ଷ ଟଙ୍କା ବ୍ୟୟବରାଦ କରାଯାଇଛି। ଜଣେ ଠିକାଦାରଙ୍କୁ ପୁର୍ତ୍ତ ବିଭାଗ ପକ୍ଷରୁ କାର୍ଯ୍ୟାଦେଶ ଦିଆଯାଇଛି। ନିର୍ମାଣ କାର୍ଯ୍ୟ ୨୦୨୧ ସେପ୍ଟେମ୍ବର ୨୧ରୁ ଆରମ୍ଭ ହୋଇ ୨୦୨୨ ଅଗଷ୍ଟ ୧୯ରେ ଶେଷ ହେବା ପାଇଁ ଚୁକ୍ତି କରାଯାଇଥିଲା। ମାତ୍ର ଅବଧିର ୧୪ ମାସ ବିତିଯାଇଥିଲେ ମଧ୍ୟ ଏହି ଗୃହ କାର୍ଯ୍ୟ ଅଧପାନ୍ତରିଆ ହୋଇ ପଡ଼ିରହିଛି। ନିର୍ମାଣ ସଂକ୍ରାନ୍ତରେ ଆବଶ୍ୟକ ସୂଚନା ଫଳକ ମଧ୍ୟ ନାହିଁ। ପୁର୍ତ୍ତବିଭାଗର ଏଭଳି ବେପରୁଆ ମନୋଭାବ ପାଇଁ ଛାତ୍ରୀଛାତ୍ରଙ୍କ ଶିକ୍ଷାଦାନ ବାଧାପ୍ରାପ୍ତ ହୋଇଛି ବୋଲି ସାମାଜିକ କର୍ମୀ ହଳଧର ଦାଶ କହିଛନ୍ତି। ବ୍ଳକ ଅଞ୍ଚଳରେ ଏକମାତ୍ର ଆଦର୍ଶ ବିଦ୍ୟାଳୟ ପ୍ରତି ପ୍ରଶାସନ ଦୃଷ୍ଟି ଦେଉ ନ ଥିବା ଦାଶ ଅଭିଯୋଗ କରିିଛନ୍ତି। ବିଦ୍ୟାଳୟ ପରିଚାଳନା କମିଟିର ସଭାପତି ଜିଲାପାଳ ଥିବା ବେଳେ ଡେରାବିଶ ବିଡ଼ିଓ ଉପସଭାପତି ଅଛନ୍ତି। ବିଡ଼ିଓ ଦାଶରଥି ଜେନାଙ୍କୁ ଏ ସଂକ୍ରାନ୍ତରେ ପଚାରିବାରୁ ସେ କୁହନ୍ତି, ତୁରନ୍ତ ନିର୍ମାଣ କାମ ଶେଷ କରିବାକୁ ପୂର୍ତ୍ତବିଭାଗ କର୍ତ୍ତୃପକ୍ଷଙ୍କୁ ବାରମ୍ବାର ଅବଗତ କରାଯାଇଛି। ହେଲେ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଅପରପକ୍ଷେ ଠିକାଦାର ମନ୍ଥର ଗତିରେ କାମ କରୁଥିବାରୁ କେବେ କାମ ଶେଷ ହେବ ସେ ନେଇ ଅନିଶ୍ଚିତତା ଦେଖାଦେଇଛି ବୋଲି ବିଡ଼ିଓ ଜେନା କହିଛନ୍ତିି। ଜେନାଙ୍କ ସୂଚନା ଅନୁଯାୟୀ ଅସ୍ଥାୟୀ ଭାବେ ଚାଲୁଥିବା ସ୍କୁଲ ପରିସରରେ ତୁରନ୍ତ ଶୌଚାଳୟ ଓ ପରିସ୍ରାଗାର ନିର୍ମାଣ ପାଇଁ ପଦକ୍ଷେପ ନିଆଯାଇଛି। ବିଦ୍ୟାଳୟର ଅଧ୍ୟକ୍ଷ ପ୍ରିୟବ୍ରତ ସ୍ବାଇଁ କହନ୍ତି, ନିର୍ମାଣ କାମ ଶେଷ କରି ସେହି କୋଠାକୁ ହସ୍ତାନ୍ତର ପାଇଁ ବିଦ୍ୟାଳୟ ସଙ୍ଗଠନ ପୂର୍ତ୍ତ ବିଭାଗ ଅଧିକାରୀ ଓ ଜିଲାପାଳଙ୍କୁ ବାରମ୍ବାର ଚିଠି ମାଧ୍ୟମରେ ଅବଗତ କରାଯାଇଛି ବୋଲି କହିଛନ୍ତି।ଏ ବିଷୟରେ କେନ୍ଦ୍ରାପଡ଼ା ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ଜ୍ୟୋତିରଞ୍ଜନ ପତିଙ୍କୁ ପଚାରିବାରୁ ସେ କୁହନ୍ତି,କ ନିର୍ମାଣ କାମ ଶେଷ କରିବାକୁ ଠିକାଦାରଙ୍କୁ ବାରମ୍ବାର ଚିଠି ମାଧ୍ୟମରେ ନିର୍ଦ୍ଦେଶ ଦିଆଯାଉଛି। ମନ୍ଥର ଗତିରେ କାମ ଚାଲୁଥିବାରୁ ତୁରନ୍ତ କାମ ଶେଷ କରିବାକୁ ଠିକାଦାରଙ୍କୁ ଗୁରୁବାର ପୁଣି ଏକ ଚିଠି ଲେଖାଯାଇଛି।
