ଅସନ୍ତୁଳିତ ଖାଦ୍ୟାଭ୍ୟାସ ଏବଂ ପରିବର୍ତ୍ତିତ ଜୀବନଶୈଳୀ ଯୋଗୁ ବର୍ତ୍ତମାନ ଅଳ୍ପ ବୟସରୁ ଅନେକଙ୍କର କେଶ ପାଚୁଥିବା ଦେଖିବାକୁ ମିଳୁଛି। ଯାହାକୁ ଲୁଚାଇବା ଲାଗି ଅନେକେ ରଙ୍ଗ ବ୍ୟବହାର କରୁଛନ୍ତି। ହେଲେ ଏଭଳି ରଙ୍ଗରେ ଥିବା ହାନିକାରକ କେମିକାଲ୍ସ ପରବର୍ତ୍ତୀ ସମୟରେ କେଶ ଝଡ଼ିବାର କାରଣ ସାଜୁଛି। ତେଣୁ କେଉଁ ସବୁ ପ୍ରାକୃତିକ ଉପଚାର ଆପଣେଇଲେ କେଶ କଳା ରହିବା ସହ
ନ ଝଡ଼ିବ ସେ ସମ୍ପର୍କରେ…
ପ୍ରତିଦିନ ଅଁଳା ରସ ପିଇବା ଦ୍ୱାରା କେଶ ସମସ୍ୟା ଦୂର ହୋଇଥାଏ। ମେହେନ୍ଦିରେ ଅଁଳା ପାଉଡ଼ର ମିଶାଇ ହେୟାର ପ୍ୟାକ୍ ପ୍ରସ୍ତୁତ କରି ଲଗାଇବା ଦ୍ୱାରା ମଧ୍ୟ କେଶ କଳା ହେବା ସହ ମଜଭୁତ୍ ରହିଥାଏ। କେବଳ ଏତିକି ନୁହେଁ ନଡ଼ିଆ ତେଲରେ ଅଁଳାକୁ ଭଲ ଭାବେ ଫୁଟାଇ ଉକ୍ତ ତେଲକୁ ଥଣ୍ଡା କରି ଏକ ବୋତଲରେ ରଖନ୍ତୁ। ସପ୍ତାହରେ ଦୁଇଥର ଏହାକୁ କେଶରେ ଲଗାଇବା ଦ୍ୱାରା ମଧ୍ୟ ଉପକୃତ ହୋଇପାରିବେ।
କେଶ ପାଚିବା ସମସ୍ୟା ଦୂର କରିବାରେ ଚା ଏବଂ କଫି ଲାଭଦାୟକ। ଏକ ଚାମଚ ଚାପତିକୁ ଏକ କପ୍ ପାଣିରେ ଭଲ ଭାବେ ଫୁଟାଇ ଦିଅନ୍ତୁ। ଏହାକୁ ଥଣ୍ଡା କରିବା ପରେ ସେଥିରେ ଅଳ୍ପ କଫି ପାଉଡ଼ର ମିଶାନ୍ତୁ। କେଶ ଶାମ୍ପୁ କରିବା ପରେ ଏହି ପାଣିରେ ଧୋଇ ଦିଅନ୍ତୁ। ସପ୍ତାହକୁ ୨-୩ ଥର ଏପରି କରିବା ଦ୍ୱାରା କେଶ ଧିରେ ଧିରେ କଳା ହେବ।
ଏକ କପ୍ ଭୁର୍ସଙ୍ଗ ପତ୍ର ସହ ୨ ଚାମଚ ଅଁଳା ପାଉଡ଼ର ଏବଂ ୨ ଚାମଚ ବ୍ରାହ୍ମି ପାଉଡ଼ର ମିଶାଇ ଗ୍ରାଇଣ୍ଡ କରି ଦିଅନ୍ତୁ। ଏହି ମାସ୍କକୁ କେଶ ମୂଳରୁ ଶେଷ ପର୍ଯ୍ୟନ୍ତ ଭଲ ଭାବେ ଲଗାଇ ଛାଡି ଦିଅନ୍ତୁ। ଏକ ଘଣ୍ଟା ପରେ ମାଇଲ୍ଡ ଶାମ୍ପୁରେ କେଶ ଧୋଇ ଦିଅନ୍ତୁ। ସପ୍ତାହକୁ ଥରେ ଏହାକୁ ବ୍ୟବହାର କଲେ କେଶ କଳା ହେବାରେ ସାହାଯ୍ୟ କରିବ।
ନଡ଼ିଆ ତେଲରେ ଲେମ୍ବୁ ରସ ମିଶାଇ କେଶରେ ମସାଜ କରିବା ଦ୍ୱାରା ମଧ୍ୟ କେଶ କଳା ହୋଇଥାଏ।
