ଗୁରୁଗ୍ରାମ,୨୩ ।୨: ଗୁରୁଗ୍ରାମ ଥାନା ସେକ୍ଟର-୨୯ରେ ମାରୁତି ବିହାର ସୋସାଇଟିରେ ଜଣେ ମହିଳା କରୋନା ସଂକ୍ରମଣ ଭୟରେ ଗତ ୩ ବର୍ଷ ହେବ ନିଜକୁ ଓ ନିଜର ୧୦ ବର୍ଷର ପୁଅକୁ ଘରେ ବନ୍ଦ କରି ରହିଥିଲେ । ୩ ବର୍ଷ ପରେ ମହିଳାଙ୍କ ସ୍ୱାମୀଙ୍କ ଅଭିଯୋଗ କ୍ରମେ ସ୍ୱାସ୍ଥ୍ୟ ବିଭାଗର ଟିମ ସହ ମହିଳା ଓ ତାଙ୍କ ପୁଅକୁ ଘରୁ ବାହାର କରାଯାଇଛି ।
ସେକ୍ଟର ୧୦ ସ୍ଥିତି ନାଗରିକ ହସ୍ପିଟାଲରେ ମହିଳା ଓ ତାଙ୍କ ପୁଅର ପ୍ରାଥମିକ ଚିକିତ୍ସା ପରେ ଉଭୟଙ୍କୁ ରୋହତକର ପଣ୍ଡିତ ଭଗବାନ ଦୟାଲ ପୋଷ୍ଟ ଗ୍ରାଜୁଏଟ ମେଡିକାଲ ଇନଷ୍ଟିଚ୍ୟୁଟ ପଠାଇ ଦିଆଯାଇଛି । ଡାକ୍ତରଙ୍କ କହିବା କଥା ହେଲା ମହିଳାଙ୍କର ମାନସିକ ସମସ୍ୟା ରହିଛି । ସେ ସଂକ୍ରମଣ ପ୍ରତି ତାଙ୍କର ଶଙ୍କାକୁ ବାସ୍ତବିକ ବୋଲି ବୁଝି ନେଇଥିଲେ ।
ପଶ୍ଚିମବଙ୍ଗର ମୂଳ ବାସିନ୍ଦା ସୁଜାନ ମାଂଜି ଓ ତାଙ୍କ ପତ୍ନୀ ମୁନମୁନ ମାଂଜି ୧୦ ବର୍ଷର ପୁଅ ଶୋଭିତ ସହ ମାରୁତି ବିହାର କଲୋନିରେ ରହୁଥିଲେ । ହେଲେ ୨୦୨୦ରେ ଆସିଥିବା କରୋନା ମହାମାରୀ ଯୋଗୁ ଲକଡାଉନ ଘୋଷଣା କରାଯାଇଥିଲା । ଏହି ସମୟରେ ସୁଜାନ କୋଭିଡ ପ୍ରୋଟୋକଲ ପାଳନ କରି ବାହାରକୁ ଯିବାରୁ ତାଙ୍କୁ ସଂକ୍ରମଣ ଭୟରେ ପତ୍ନୀ ମୁନମୁନ ଘର ଭିତରେ ପୁରାଇ ଦେଇ ନ ଥିଲେ । ଏହାପରେ ସୁଜାନ ନିକଟରେ ଏକ ଭଡାଘର ନେଇ ରହିଥିଲେ । ନିଜ ପରିବାର ଓ ମୁନମୁନଙ୍କ ପରିବାରର ସମସ୍ତ ସଦସ୍ୟ ବହୁ ବୁଝାବୁଝି ପରେ ବି ମୁନମୁନ ମାନି ନ ଥିଲେ । ସେ କହୁଥିଲେ କି ତାଙ୍କ ପୁଅକୁ ୧୨ ବର୍ଷ ନ ହେଲେ ସେ କୋଭିଡ ଟିକା ନ ନେଲେ ଘରୁ ବାହାରିବେ ନାହିଁ । କାରଣ ତାଙ୍କୁ କୋଭିଡ ସଂକ୍ରମଣକୁ ଭୟ ଲାଗୁଛି । ତେବେ ମୁନମୁନ ଓ ତାଙ୍କ ପୁଅର ସମସ୍ତ ଆବଶ୍ୟକ ସାମଗ୍ରୀ ସୁଜାନ ଫ୍ଲାଟ ବାହାରେ ରଖିଦେଇ ଆସୁଥିଲେ । ଏମିତିକି ବିଜୁଳି ଓ ପାଣି ବିଲ୍ ବି ସୁଜାନ ଦେଉଥିଲେ । ଏହାରି ଭିତରେ ୩ ବର୍ଷ ବିତି ଯାଇଥିଲେ ବି ମୁନମୁନ ନ ବୁଝିବାରୁ ସୁଜାନ ପୋଲିସର ସହାୟତା ନେଇଥିଲେ । ଏବେ ଉଭୟ ମାଆ ପୁଅଙ୍କୁ ଘରୁ ବାହାର କରାଯାଇଥିବା ବେଳେ ଉଭୟ ସୁସ୍ଥ ଥିବା କୁହାଯାଉଛି । ହେଲେ ମୁନମୁନ ମାନସିକ ସମସ୍ୟାରେ ପିଡ଼ିତ ବୋଲି ଡାକ୍ତର କହିଛନ୍ତି ।
