ଓ୍ବାଶିଂଟନ୍, ୧୩ା୬: ‘ବନ୍ଧୁକ ଆମକୁ ମାରିଦେବ। ତୁରନ୍ତ ଏହା ଉପରେ ଲଗାମ ଲଗାଇ ଆମ ଜୀବନ ବଞ୍ଚାଅ’ ନାରା ଦେଇ ଆମେରିକାବାସୀ ବନ୍ଧୁକ ନିୟନ୍ତ୍ରଣ ଆଇନ ଆଣିବା ଦାବିରେ ବିଶାଳ ଶୋଭାଯାତ୍ରା ଆୟୋଜନ କରିଛନ୍ତି। ନ୍ୟୁୟର୍କ ଓ ଟେକ୍ସାସ ଗୁଳିକାଣ୍ଡ ପରେ ତୁରନ୍ତ ଗନ୍ କଣ୍ଟ୍ରୋଲ ଲ’ ଆଣିବାକୁ ଲୋକେ ଆମେରିକା କଂଗ୍ରେସ ଉପରେ ଚାପ ପକାଇଛନ୍ତି। ଏହି ବିକ୍ଷୋଭକୁ ରାଷ୍ଟ୍ରପତି ଜୋ ବାଇଡେନ୍ ସମର୍ଥନ କରିବା ସହ ନିକଟରେ ଆମେରିକାର ନିମ୍ନସଦନରେ ପାରିତ ହୋଇଥିବା ଏହି ବିଲ୍କୁ ଆଇନରେ ପରିଣତ କରିବା ନିମନ୍ତେ କଂଗ୍ରେସକୁ ଆହ୍ବାନ ଦେଇଛନ୍ତି।
ସିନେଟ୍ରେ ରପବ୍ଲିକାନ୍ ସଦସ୍ୟଙ୍କ ବିରୋଧ ଯୋଗୁ ବନ୍ଧୁକ ନିୟନ୍ତ୍ରଣ ବିଲ୍ ଆଇନରେ ପରିଣତ ହେବା ସମ୍ଭାବନା କମ୍। ତେଣୁ ଲୋକଙ୍କ ସୁରକ୍ଷା ପାଇଁ ଏହି ନିୟମ ଆସିବା ଆବଶ୍ୟକ ବୋଲି ବାଇଡେନ୍ କହିଛନ୍ତି। ଓ୍ବାଶିଂଟନ୍ ଡିସି, ନ୍ୟୁୟର୍କ, ଲସ୍ ଏଞ୍ଜେଲ୍ସ, ଶିକାଗୋ ସମେତ ଦେଶବ୍ୟାପୀ ବିଭିନ୍ନ ସ୍ଥାନରେ ୪୫୦ରୁ ଊର୍ଦ୍ଧ୍ୱ ରାଲି କରାଯାଇଥିବା ଗନ୍ ସେଫ୍ଟି ଗ୍ରୁପ୍ ‘ମାର୍ଚ୍ଚ ଫର୍ ଆଓ୍ବାର ଲାଇଭ୍ସ’ ପକ୍ଷରୁ କୁହାଯାଇଛି। ରାଜନେତାମାନଙ୍କ ନିଷ୍କ୍ରିୟତା ଯୋଗୁ ଆମେରିକାବାସୀ ମରୁଛନ୍ତି। ସେମାନେ ଆରାମରେ ବସି ଆମ ଲୋକଙ୍କୁ ମରିବାକୁ ଛାଡ଼ି ଦେଇପାରିବେ ନାହିଁ ବୋଲି ଏହି ସଙ୍ଗଠନ କହିଛି।
ଯେଉଁମାନେ ବନ୍ଧୁକ ଉପର ଲଗାମ ପାଇଁ କଡ଼ା ଆଇନ ଆଣିବା ସପକ୍ଷରେ ଅଛନ୍ତି ସେମାନଙ୍କ ପ୍ରତି ଦେଶବାସୀଙ୍କ ସମର୍ଥନ ରହିଛି ବୋଲି ବିକ୍ଷୋଭକାରୀ କହିଛନ୍ତି। ନିକଟରେ ଆମେରିକା ଦୁଇଟି ବଡ଼ ଧରଣର ଗୁଳିକାଣ୍ଡ ଦେଖିଛି। ମେ ୧୪ରେ ନ୍ୟୁୟର୍କ ବଫାଲୋ ସହରରେ ଆତତାୟୀଙ୍କ ଗୁଳିରେ ୧୦ ଜଣଙ୍କ ଜୀବନ ଯାଇଥିଲା। ଏହାର ମାତ୍ର ୧୦ ଦିନ ପରେ ମେ ୨୪ରେ ଟେକ୍ସାସ୍ ସ୍କୁଲରେ ଗୁଳିକାଣ୍ଡ ଘଟି ୧୯ ଶିଶୁଙ୍କ ସମେତ ୨୧ ଜଣଙ୍କ ମୃତ୍ୟୁ ଘଟିଥିଲା।
