ବରୋଦା,୨।୬: ଆଜିକାଲି ବିବାହ ଋତୁ ଚାଲିଛି। ଅନେକ ଯୋଡିଙ୍କୁ ବିବାହ ବନ୍ଧନରେ ଆବଦ୍ଧ ହେଉଥିବା ଦେଖାଯାଇଛି। କିନ୍ତୁ ଆସନ୍ତା ଜୁନ ୧୧ରେ ଗୁଜରାଟରେ ଏକ ନିଆରା ବିବାହ ଅନୁଷ୍ଠିତ ହେବାକୁ ଯାଉଛି। ଏପରି ବିବାହ ହୁଏତ ପୂର୍ବରୁ କେହି ଦେଖି ନ ଥିବେ। ଗୁଜରାଟର ବରୋଦାରେ ୨୪ ବର୍ଷୀୟା କ୍ଷମା ବିନ୍ଦୁ ନିଜେ ନିଜକୁ ବିବାହ କରିବାକୁ ଯାଉଛନ୍ତି। ଏହି ବିବାହରେ ହସ୍ତଗଣ୍ଠି ପଡିବ, ସାତ ଫେରା ହେବ ଏବଂ ପରେ ଗୋଆରେ ହନିମୁନ ମଧ୍ୟ ହେବ। ଏହି ବିବାହରେ କନ୍ୟା ଥିବେ କିନ୍ତୁ ବର ନ ଥିବେ। ଏହା ଭାରତର ପ୍ରଥମ ସୋଲୋଗାମୀ ଅର୍ଥାତ୍ ଏକକ ବିବାହ ହେବ ବୋଲି ଚର୍ଚ୍ଚା ହେଉଛି।
ଏକ ଘରୋଇ ସଂସ୍ଥାରେ କାମ କରୁଥିବା କ୍ଷମା କହିଛନ୍ତି, ମୁଁ ଭାରତରେ ଏପରି ବିବାହ ହୋଇଛି କି ନାହିଁ ସନ୍ଧାନ କରିବାକୁ ବହୁତ ଚେଷ୍ଟା କଲି, କିନ୍ତୁ କୌଣସି ସୂଚନା ପାଇଲି ନାହିଁ। ବୋଧହୁଏ ମୁଁ ପ୍ରଥମ । ମୁଁ କେବେ ବିବାହ କରିବାକୁ ଚାହୁଁ ନ ଥିଲି। କିନ୍ତୁ ମୁଁ ବର ହେବାକୁ ଚାହୁଁଥିଲି। ତେଣୁ ମୁଁ ନିଜକୁ ନିଜେ ବିବାହ କରିବାକୁ ସ୍ଥିର କଲି।
ଆତ୍ମ-ବିବାହ ହେଉଛି ବିନା ସର୍ତ୍ତରେ ନିଜ ପାଇଁ ପ୍ରେମ ସୃଷ୍ଟି କରିବାର ଏକ ପ୍ରତିବଦ୍ଧତା। ଲୋକମାନେ ଭଲ ପାଉଥିବା ବ୍ୟକ୍ତିଙ୍କୁ ବିବାହ କରନ୍ତି। ମୁଁ ନିଜକୁ ଭଲ ପାଏ। ତେଣୁ ମୁଁ ନିଜକୁ ବିବାହ କରିବାକୁ ନିଷ୍ପତ୍ତି ନେଇଛି। କେହି କେହି ଆତ୍ମ-ବିବାହକୁ ଅପ୍ରାସଙ୍ଗିକ ବୋଲି ଭାବି ପାରନ୍ତି। କିନ୍ତୁ ମୁଁ ଯାହା କରୁଛି ଏହା ମହିଳାଙ୍କ ପାଇଁ ଗୁରୁତ୍ୱପୂର୍ଣ୍ଣ।
ଏହି ନିଷ୍ପତ୍ତି ଉପରେ ତାଙ୍କ ପରିବାରର ପ୍ରତିକ୍ରିୟା ବିଷୟରେ କ୍ଷମା କହିଛନ୍ତି, ବିବାହ ପରେ ଆଗକୁ ବଢିବା ପାଇଁ ତାଙ୍କ ମାତାପିତା ତାଙ୍କୁ ଆଶୀର୍ବାଦ ଦେଇଛନ୍ତି। ଗୋତ୍ରିର ଏକ ମନ୍ଦିରରେ ଆୟୋଜିତ ହେବାକୁ ଥିବା ବିବାହ ପାଇଁ କ୍ଷମା ପାଞ୍ଚଟି ଶପଥ ପ୍ରସ୍ତୁତ କରିଛନ୍ତି। କେବଳ ଏତିକି ନୁହେଁ, ବିବାହ ପରେ ସେ ଗୋଆକୁ ଦୁଇ ସପ୍ତାହ ପାଇଁ ହନିମୁନ୍ରେ ଯିବାକୁ ନିଷ୍ପତ୍ତି ନେଇଛନ୍ତି।
