ନୂଆଦିଲ୍ଲୀ,୧୪।୯: ସାରା ଦେଶରେ ବର୍ତ୍ତମାନ ତୈଳ ଦର ରେକର୍ଡ ଉଚ୍ଚତାରେ ରହିଛି। ଏଥିଯୋଗୁ ଅତ୍ୟାବଶ୍ୟକ ସାମଗ୍ରୀର ଦର ମଧ୍ୟ ଆକାଶ ଛୁଆଁ ହୋଇଛି। ସାଧାରଣ ଜନତାଙ୍କ ରୋଷରୁ ବର୍ତ୍ତିବା ପାଇଁ ସରକାର ପେଟ୍ରୋଲ ଏବଂ ଡିଜେଲକୁ ସାମଗ୍ରୀ ଓ ସେବା ଟିକସ (ଜିଏସ୍ଟି)ରେ ସାମିଲ କରିବା ଉପରେ ବିଚାର କରିବାକୁ ଯାଉଛନ୍ତି। ଏହି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ନାମ ଗୋପନ ରଖି ସୂଚନା ଦେଇଛନ୍ତି। ଯଦି ସରକାର ଇନ୍ଧନ ସାମଗ୍ରୀକୁ ଜିଏସ୍ଟିରେ ଅନ୍ତର୍ଭୁକ୍ତ କରନ୍ତି ତା’ହେଲେ ପେଟ୍ରୋଲ ଓ ଡିଜେଲ ମୂଲ୍ୟ କିଛି ପରିମାଣରେ ହ୍ରାସ ହୋଇପାରେ।
ସେପ୍ଟେମ୍ବର ୧୭ରେ ହେବାକୁ ଥିବା ଜିଏସ୍ଟି ପରିଷଦ ବୈଠକରେ ଏହି ପ୍ରସଙ୍ଗ ଉପରେ ଆଲୋଚନା ହୋଇପାରେ। ହେଲେ ବର୍ତ୍ତମାନ ସମୟରେ ପେଟ୍ରୋଲ ଓ ଡିଜେଲକୁ ଜିଏସ୍ଟି ପରିସରକୁ ଆଣିବା ସେତେଟା ସହଜ ନୁହେଁ।
ଜିଏସ୍ଟି ବ୍ୟବସ୍ଥାରେ ପରିବର୍ତ୍ତନ ପାଇଁ ପରିଷଦର ତିନି ଚତୁର୍ଥାଂଶ ସଦସ୍ୟଙ୍କ ମଞ୍ଜୁରୀ ଜରୁରୀ। ଏହି ପରିଷଦରେ ସମସ୍ତ ରାଜ୍ୟର ପ୍ରତିନିଧି ଅଛନ୍ତି। ସେଥିରୁ ଅନେକ ରାଜ୍ୟ ଇନ୍ଧନକୁ ଜିଏସ୍ଟି ତାଲିକାରେ ଆଣିବାକୁ ବିରୋଧ କରୁଛନ୍ତି। କାରଣ ପେଟ୍ରୋଲ ଓ ଡିଜେଲ ଜିଏସ୍ଟିରେ ସାମିଲ ହେଲେ ରାଜ୍ୟ ସରକାରଙ୍କ ହାତରୁ ଏକ ପ୍ରମୁଖ ଆୟର ସ୍ରୋତ ଚାଲିଯିବ। ଏଣୁ ପରିଷଦର ସଦସ୍ୟମାନେ ରାଜି ହେବେ ନାହିଁ।
