ଚା’ ଦୋକାନୀଙ୍କୁ ୧୧୦କୋଟିର ଜିଏସ୍‌ଟି ନୋଟିସ
9:04 amDecember 16, 2020December 16, 2020 / 43

ରାଉରକେଲା ଅଫିସ, ୧୬।୧୨: ରାଉରକେଲାରେ ଜିଏସ୍‌ଟି ଠକେଇର ନୂଆ ନୂଆ ମାମଲା ସାମ୍ନାକୁ ଆସୁଛି। ସହରରେ ଜିଏସ୍‌ଟି ଠକେଇ ତାଲିକାରେ ଜଣେ ଚା’ ଦୋକାନୀଙ୍କ ନାଁ ଯୋଡ଼ି ହୋଇଯାଇଛି। ରାସ୍ତାକଡରେ ଏକ ଛୋଟିଆ ଗୁମୁଟିରେ ଚା’ ବିକି ଗୁଜରାଣ ମେଣ୍ଟାଉଥିବା କାର୍ତ୍ତିକ କାମିଲା ନାମକ ବ୍ୟକ୍ତିଙ୍କ ନାଁରେ ଜିଏସ୍‌ଟି ନୋଟିସ ଆସିଛି। ଉକ୍ତ ଚା’ ଦୋକାନୀଙ୍କୁ କୋଏଲନଗର ‘ସି’ ବ୍ଲକ ସ୍ଥିତ ମାର୍କେଟ୍‌ କମ୍ପ୍ଲେକ୍ସର ମାଲିକ ଦର୍ଶାଇ ଲିଙ୍ଗରାଜ ଟ୍ରେଡିଂ ନାମକ ଜାଲ ବ୍ୟବସାୟିକ ସଂସ୍ଥା ପ୍ରାୟ ୧୧୦ କୋଟି ଟଙ୍କାର ବ୍ୟବସାୟ କରିଥିବା ଜଣାପଡିଛି। ଇନପୁଟ ଟ୍ୟାକ୍ସ କେଡ୍ରିଟ୍‌ ବାବଦକୁ ଜାଲ ବ୍ୟାଙ୍କ ଆକାଉଣ୍ଟ ମାଧ୍ୟମରେ ୧୦ କୋଟିରୁ ଅଧିକ ଟଙ୍କା ହଡପ କରିଥିବା ମଧ୍ୟ ଅଭିଯୋଗ ହୋଇଛି। କିନ୍ତୁ ଉକ୍ତ କ୍ଷୁଦ୍ର ବେପାରୀ ଜଣଙ୍କ ସେହି ମାର୍କେଟ କମ୍ପ୍ଲେକ୍ସର ମାଲିକ ନ ଥିବା ଜଣାପଡିଛି। ପୂର୍ବରୁ ଦିନ ମଜୁରିଆ, ରାସ୍ତା କଡରେ ଥିବା ଜଳଖିଆ ଦୋକାନୀ, ଗୁପଚୁପ ବିକ୍ରେତା, ଅଟୋ ଡ୍ରାଇଭର, ଠିକା ଶ୍ରମିକ, ଗୃହିଣୀ, କଲେଜ ପଢ଼ୁଆ ଛାତ୍ରଙ୍କ ନାଁରେ ଠକେଇ ହୋଇଥିବା ବେଳେ ଏବେ ଚା’ ବିକ୍ରେତାଙ୍କ ନାଁରେ ଜାଲ ସଂସ୍ଥା ଜିଏସ୍‌ଟି ଠକେଇ କରିଛି।