ନୂଆଦିଲ୍ଲୀ,୧ା୧: ଡିସେମ୍ବର ୨୦୨୪ ରେ ବସ୍ତୁ ଏବଂ ସେବା କର (ଜିଏସଟି) ସଂଗ୍ରହରେ ବଡ଼ ଅଭିବୃଦ୍ଧି ଦେଖିବାକୁ ମିଳିଛି। ଜାନୁଆରୀ ୧ ରେ ପ୍ରକାଶିତ ତଥ୍ୟ ଅନୁଯାୟୀ, ଡିସେମ୍ବରରେ ଜିଏସଟି ସଂଗ୍ରହ ପୂର୍ବ ବର୍ଷ ବର୍ଷ ତୁଳନାରେ ୭.୩ ପ୍ରତିଶତ ବୃଦ୍ଧି ହୋଇ ୧.୭୭ ଲକ୍ଷ କୋଟିରେ ପହଞ୍ଚିଛି। ଡିସେମ୍ବର ୨୦୨୩ ରେ ଜିଏସଟି ସଂଗ୍ରହ ୧.୬୫ ଲକ୍ଷ କୋଟି ଟଙ୍କା ଥିଲା।
ଡିସେମ୍ବରରେ ୧.୭୭ ଲକ୍ଷ କୋଟିର ଏହି ଆକଳନ କ୍ରମାଗତ ଦଶମ ଥର ପାଇଁ ଜିଜିଏସଟି ସଂଗ୍ରହ ୧.୭ ଲକ୍ଷ କୋଟିରୁ ଅଧିକ ହୋଇଛି। ତେବେ ଏପ୍ରିଲ୍ ୨୦୨୪ ରେ ସଂଗ୍ରହ ହୋଇଥିବା ୨.୧ ଲକ୍ଷ କୋଟି ଟଙ୍କା ଜିଏସଟି ସଂଗ୍ରହ ରେକର୍ଡ ଏବେ ମଧ୍ୟ ଅକ୍ଷୁର୍ଣ୍ଣ ଅଛି। ଏଥି ସହିତ, ଗତ ୩ ମାସ ମଧ୍ୟରେ ଏହି ଜିଏସଟି ଅଭିବୃଦ୍ଧି ମଧ୍ୟ ସର୍ବନିମ୍ନ ଅଟେ। ତେବେ ପୂର୍ବ ତ୍ରୈମାସିକ ତୁଳନାରେ ଏଥର ଜିଏସଟି ସଂଗ୍ରହ ଭଲ ହୋଇଛି।
ଯଦି ଅକ୍ଟୋବର-ଡିସେମ୍ବର ୨୦୨୪ ରେ ହାରାହାରି ଜିଏସଟି ସଂଗ୍ରହକୁ ଦେଖିବା, ତେବେ ଏହା ୧.୮୨ ଲକ୍ଷ କୋଟି ଟଙ୍କାକୁ ଆସିଥିବାବେଳେ ପୂର୍ବ ତ୍ରୈମାସିକ ଅର୍ଥାତ୍ ଜୁଲାଇ-ସେପ୍ଟେମ୍ବର ୨୦୨୪ ରେ ହାରାହାରି ଜିଏସଟି ସଂଗ୍ରହ ୧.୭୭ ଲକ୍ଷ କୋଟି ଟଙ୍କା ଥିଲା। ଗତ ବର୍ଷ ସମାନ ତ୍ରୈମାସିକ ତୁଳନାରେ ଯଦି ଆମେ ଏହାକୁ ଦେଖିବା, ତେବେ ଏହି ଜିଏସଟି ସଂଗ୍ରହ ୮.୩ ପ୍ରତିଶତ ଅଧିକ ହୋଇଛି।
