ତିହିଡ଼ି,୪ା୩(ସଞ୍ଜିତ ବଳ): ଭଦ୍ରକ ଜିଲା ତିହିଡ଼ି ଥାନା ବୋଡ଼କ ପଞ୍ଚାୟତ ଅଧୀନ ଖରିଦାପାଟଣା ଗ୍ରାମରେ ବୁଧବାର ସକାଳେ ଗୋଷ୍ଠୀ ସଂଘର୍ଷ ଉପୁଜିଛି। ଡିଜେ ବଜାକୁ କେନ୍ଦ୍ର କରି ଉପୁଜିଥିବା ଏହି ସଂଘର୍ଷରେ ୧୨ଜଣ ଆହତ ହୋଇଥିବା ଜଣାଯାଇଛି। ଏହି ଘଟଣା ପରେ ଗ୍ରାମରେ ଉତ୍ତେଜନା ଦେଖା ଦେଇଥିବାରୁ ୨ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ଖବରରୁ ଜଣାଯାଇଛି ଯେ, ଦୋଳ ପୂର୍ଣ୍ଣିମା ବାରୋରେ କୁମ୍ଭ ମେଳଣ ଅନୁଷ୍ଠିତ ହୋଇଥିଲା। ଏହି ମେଳଣରେ ଯୋଗ ଦେବା ପାଇଁ ଖରିଦାପାଟଣା ଗ୍ରାମର ଗୋପାଳମାନେ ଶୋଭାଯାତ୍ରାରେ ଡିଜେ ନେଇ ବାହାରିଥିଲେ। ଡିଜେକୁ ଗ୍ରାମର କିଛି ବିରୋଧ କରିବାରୁ ଶୋଭାଯାତ୍ରାରେ ଡିଜେ ସାମିଲ ହୋଇ ନ ଥିଲା। ତେବେ ବୁଧବାର ସକାଳେ ଗ୍ରାମରେ ରଙ୍ଗ ଖେଳ ଚାଲିଥିବା ବେଳେ ଡିଜେ ବଜା ଯିବାରୁ କେତେକ ଏହାକୁ ବିରୋଧ କରିଥିଲେ। ଯାହାଫଳରେ ଉତ୍ତେଜନା ଦେଖାଦେଇଥିଲା ଓ ୨ ଗୋଷ୍ଠୀ ମଧ୍ୟରେ ସଂଘର୍ଷ ଉପୁଜିଥିଲା। ଏଥିରେ ଉଭୟ ଗୋଷ୍ଠୀ ୧୨ଜଣ ଆହତ ହୋଇଥିଲେ। ପରେ ସେମାନଙ୍କୁ ଚିକିତ୍ସା ନିମନ୍ତେ ତିହିଡ଼ି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତିହିଡ଼ି ଥାନାରେ ଉଭୟ ଗୋଷ୍ଠୀ ପକ୍ଷରୁ ଏନେଇ ଅଭିଯୋଗ ହୋଇଥିବା ଜଣାଯାଇଛି।
