ଟରଣ୍ଟୋ, ୨୫।୧୨: ମାଟି ତଳେ ରହୁଥିବା ଜୀବମାନଙ୍କ ପାଇଁ ଭୂତଳ ଜଳ ଏକ ଜରୁରୀ ଉପାଦାନ। ଓ୍ବାଟର ସାଇକେଲ୍ ବା ଜଳଚକ୍ର ଦ୍ୱାରା ଏହି ଭୂତଳ ଜଳ (ଗ୍ରାଉଣ୍ଡ ଓ୍ବାଟର)ର କିଛି ଭାଗ ଜଳାଶୟ ଏବଂ ଆଉ କିଛି ଭାଗ ବାୟୁ ମଣ୍ଡଳରେ ମିଶିଥାଏ । ମାଟି ତଳର ଏହି ଜଳ ଅତିବେଶିରେ କେତେଦିନ ପର୍ଯ୍ୟନ୍ତ ଜଳଚକ୍ରରେ ସାମିଲ ନ ହୋଇ ମାଟି ତଳେ ସଂରକ୍ଷିତ ଭାବେ ରହିପାରିବ ସେ ନେଇ ବିଶେଷଜ୍ଞଙ୍କ ପାଖରେ ଉତ୍ତର ନ ଥିବାବେଳେ ଦକ୍ଷିଣ ଆଫ୍ରିକାର ଏକ ଗୋଲ୍ଡ-ୟୁରାନିୟମ୍ ଖଣିରୁ ୧.୨ ବିଲିୟନ୍ ବର୍ଷ ପୁରୁଣା ଭୂତଳ ଜଳ ଠାବ କରାଯାଇଛି।
ନେଚର କମ୍ୟୁନିକେଶନ୍ ଜର୍ନାଲ୍ରେ ପ୍ରକାଶିତ ରିପୋର୍ଟ ମୁତାବକ ସାଉଥ୍ ଆଫ୍ରିକାର ମୋବ ଖୋଟସୋଙ୍ଗରେ ଥିବା ଗୋଲ୍ଡ-ୟୁରାନିୟମ୍ ଖଣିରୁ ଗବେଷକମାନେ ୧.୨ ବିଲିୟନ୍ ବର୍ଷର ପୁରୁଣା ଗ୍ରାଉଣ୍ଡ ଓ୍ବାଟର ଆବିଷ୍କାର କରିଛନ୍ତି। ମାଟି ତଳେ ୨.୯ କି.ମି. ଗଭୀରରେ ଏହି ଜଳ ଥିବା ଦେଖାଯାଇଥିଲା। ଟରଣ୍ଟୋ ୟୁନିଭର୍ସିଟିର ଆର୍ଥ ସାଇନ୍ସ ବିଭାଗ ପ୍ରଫେସରଙ୍କ ଦ୍ୱାରା ଏହି ଅଧ୍ୟୟନ କରାଯାଇଛି। କାନାଡାରୁ ୧୦ ବର୍ଷ ପୂର୍ବେ ୧ ବିଲିୟନ୍ ବର୍ଷ ପୁରୁଣା ଭୂତଳ ଜଳ ଠାବ କରାଯାଇଥିବା ଗବେଷକ ବାରବାରା ଶେରଉଡ୍ ଲୋଲ୍ଲାର କହିଛନ୍ତି।
ୟୁରାନିୟମ୍, ଥୋରିୟମ୍, ପୋଟାସିୟମ୍ ଭଳି ରେଡିଓଆକ୍ଟିଭ୍ ଉପାଦାନଗୁଡ଼ିକ ଯେତେବେଳେ ତରଳ ପଦାର୍ଥ ବା ପଥରରେ ରହିଥାନ୍ତି ସେ ସମୟରେ ସେମାନଙ୍କଠାରୁ ବାହାରୁଥିବା ଆଲ୍ଫା, ବିଟା ଏବଂ ଗାମା ରଶ୍ମି ପରସ୍ପରକୁ ରେପେଲ (ଠେଲାପେଲା) କରନ୍ତି, ଯାହାକୁ ରେଡିଓଜେନିକ୍ ରିଆକ୍ସନ କୁହାଯାଏ। ତେବେ ମୋଆବ ଖୋଟସୋଙ୍ଗ ଖଣିରୁ ବିଶେଷଜ୍ଞମାନେ ପ୍ରଚୁର ପରିମାଣର ରେଡିଓଜେନିକ୍ ଉପାଦାନ ହିଲିୟମ୍, ନିଅନ, ଆର୍ଗନ୍ ଓ ଜେନନ ମିଳିଥିଲା। ଏହି କଣିକା ସବୁ ଭୂତଳଜଳ ଜଳ କଣିକାକୁ ଭାଙ୍ଗି ବହୁଳମାତ୍ରାରେ ହାଇଡ୍ରୋଜେନ୍ ବାହାର କରିଥିବା ଗବେଷକମାନେ ଲକ୍ଷ୍ୟ କରିଥିଲେ। ଏହାପରେ ମାଟି ତଳେ ଜଳର ଆଶଙ୍କା କରି ଗବେଷକମାନେ ଏ ନେଇ ପରୀକ୍ଷା ନିରୀକ୍ଷା ଆରମ୍ଭ କରିଦେଲେ। ଏହାପରେ ସେମାନଙ୍କୁ ଖଣି ତଳୁ ଜଳର ସନ୍ଧାନ ମିଳିଥିଲା।
