ଛତ୍ରପୁର,୨୮।୫ (ଦିଲ୍ଲୀପ ସାମଲ): “ପାଣି ଟୋପେ ପାଇଁ ଜୀବନ ବିକଳ, ପ୍ରଶାସନ କିନ୍ତୁ ନିଦାବିଷ୍ଣୁ।” ଏଭଳି ଏକ ଚରମ ଅସନ୍ତୋଷ ପ୍ରକାଶ କରି ଆଜି ଛତ୍ରପୁର ପୌର ପରିଷଦର ୬ ନଂ ୱାର୍ଡର ଭାସ୍କର ରାଓ ପେଟା ସାହି ବାସିନ୍ଦା
ସ୍ଥାନୀୟ ଜନସ୍ବାସ୍ଥ୍ୟ ବିଭାଗ କାର୍ଯ୍ୟାଳୟକୁ ଘେରାଉ କରିଛନ୍ତି। ଦୀର୍ଘ ୫ ଦିନ ଧରି ପାନୀୟ ଜଳ ଯୋଗାଣ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଥିବାରୁ ସାହି ବାସିନ୍ଦା ଶେଷରେ ପିଏଚଡି କାର୍ଯ୍ୟାଳୟ ଘେରାଉ କରିଛନ୍ତି। ବିଶେଷ କରି ମହିଳାମାନେ ଏହି ଘେରାଉରେ ସାମିଲ ହୋଇଛନ୍ତି। ସେମାନଙ୍କ କହିବା କଥା ହେଲା ସାହିକୁ ଆଜିକୁ ୫ ଦିନ ହେଲା ପାଣି ଆସୁନାହିଁ । ଯାହାଫଳରେ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଅଂଚଳବାସୀ । ଶେଷରେ ଆଜି ବହୁ ମହିଳାମାନେ ବାଧ୍ୟ୍ୟ ହୋଇ ଆନ୍ଦୋଳନ ପନ୍ଥା ଗ୍ରହଣ କରିଥିଲେ । ବିଭାଗୀୟ ଅଧିକାରୀଙ୍କ ବିରୋଧରେ ତୀବ୍ର ନାରାବାଜି କରିବା ସହ ଅଫିସର ମୁଖ୍ୟ ଫାଟକ ସମ୍ମୁଖରେ ହୋହଲ୍ଲା କରିଥିଲେ।
“ପାଇପ ଅଛି, ପାଣି ନାହିଁ” ସାହିକୁ ବୁନ୍ଦାଏ ହେଲେ ବି ପାନୀୟ ଜଳ ମିଳୁନାହିଁ। “ଆମକୁ ପାଣି ଦିଅ, ନହେଲେ ଚଉକି ଛାଡ଼”, ବିଭାଗୀୟ ମନମୁଖୀ କାର୍ଯ୍ୟ ଚଳିବ ନାହିଁ” ବୋଲି ନାରା ଦେଇଥିଲେ। ଘଟଣାର ଖବର ପାଇ ବିଭାଗୀୟ ଅଧିକାରୀ ପହଂଚି ଆନ୍ଦୋଳନକାରୀଙ୍କୁ ବୁଝାଇଥିଲେ । ପାଣି ମିଳିବ ପ୍ରତିଶ୍ରୁତି ମିଳିବା ପରେ
ଆନ୍ଦୋଳନ ଥମିଥିଲା । ଆସନ୍ତାକାଲି ସୁଦ୍ଧା ସାହିକୁ ସ୍ବାଭାବିକ ଭାବେ ପାଣି ଯୋଗାଇ ଦିଆଯିବ ବୋଲି ସେ ଦୃଢ଼ ପ୍ରତିଶ୍ରୁତି ଦେବା ପରେ ଯାଇ ଧାରଣା ପ୍ରତ୍ୟାହୃତ ହୋଇଥିଲା। ତେବେ ପ୍ରତିଶ୍ରୁତି ରକ୍ଷା ନହେଲେ ଆନ୍ଦୋଳନ ଆହୁରି ଭୟାବହ ହେବ ବୋଲି ସାହି ବାସିନ୍ଦାମାନେ ଚେତାବନୀ ଦେଇଛନ୍ତି ।
Odisha’s No.1 Odia Daily
