ଖପ୍ରାଖୋଲ, ୨୫ା୧୨(ଅଭୟ ତ୍ରିପାଠୀ): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଘୁନସର ପଞ୍ଚାୟତ ଝାଲବାହାଲ ଗାଁର ସୁକୁନି ବରିହା(୬୩) ଓ ତାଙ୍କ ସ୍ବାମୀ ଗୋପାଳ ବରିହା(୭୦)। ପରିଣତ ବୟସରେ ଏବେ ସେମାନଙ୍କ ଉପରେ ପଡିଛି ଲାଳନପାଳନର ଭାର। ପୁଅ ପୀତବାସ(୨୫), ବୋହୂ ଗୋଲାପି(୨୩) ଓ ଦେଢବର୍ଷ ନାତି କେଶବଙ୍କୁ ନେଇ ଥିଲା ସେମାନଙ୍କର ସୁଃଖଦୁଃଖର ପରିବାର। ୫ମାସ ତଳେ ଜନ୍ମନେଲା ଏକ ନାତୁଣୀ। ଜନ୍ମର ୫ମ ଦିନରେ ଗୋଲାପିଙ୍କର ମୃତ୍ୟୁ ହୋଇଗଲା। ଇତିମଧ୍ୟରେ ୫ମାସ ବିତିଗଲାଣି। ବଡକଷ୍ଟରେ ଦୁଇ ଶିଶୁଙ୍କ ଲାଳନପାଳନ କରୁଛନ୍ତି ସୁକୁନି ଓ ଗୋପାଳ। ଏପଟେ ପୀତବାସ ଦାଦନ ଖଟିବାକୁ ଯାଇଛନ୍ତି ଆନ୍ଧ୍ରପ୍ରଦେଶ। ମା’ ଛେଉଣ୍ଡ ୨ଶିଶୁଙ୍କ ଦେଖାଶୁଣା କରିବାକୁ ସେମାନଙ୍କ ପାଇଁ କାଠିକର ହେଉଛି। ସୁକୁନି ଓ ଗୋପାଳଙ୍କ ଭତ୍ତା ବାବାଦ ଟଙ୍କା ଓ ଖାଦ୍ୟ ସୁରକ୍ଷା ଯୋଜନାରେ ୧୫କେଜି ଚାଉଳ ହିଁ ଭରସା। କନ୍ୟାକୁ ଶିଶୁଖାଦ୍ୟ ଦେବାକୁ ସେମାନଙ୍କ ପାଖରେ ସମ୍ବଳ ନାହିଁ। ଏଣୁ ନିଜେ ପିଉଥିବା ନାଲି ଚା ପିଲାଙ୍କୁ ପିଆଉଥିବା ସୁକୁନି କାନ୍ଦି କାନ୍ଦି କହିଛନ୍ତି। କେବେକେବେ ସାହି ପଡିଶା ସହଯୋଗ କରୁଥିଲେ ବି କୌଣସି ସରକାରୀ ସହାୟତା ମିଳୁନି। ସରକାରୀ ସହାୟତା ଯୋଗାଇଦେବାକୁ ସେମାନେ ନିବେଦନ କରିଛନ୍ତି। ଏ ନେଇ ପାଟଣାଗଡ ଉପଜିଲାପାଳ ଡ଼ ବିଜୟାନନ୍ଦ ସେଠୀଙ୍କ ଦୃଷ୍ଟି ଆକର୍ଷଣ କରିବାରୁ ଶିଶୁକୁ କ୍ଷୀର ବାବଦରେ ସହାୟତା କରିବି ବୋଲି କହିଛନ୍ତି।
