କେନ୍ଦୁଝର, ୧୦।୧ (ସ୍ବ.ପ୍ର.) କୋଭିଡ୍ ସଂକ୍ରମଣ ବୃଦ୍ଧି ପାଉଥିବାରୁ ଜନସମାବେଶ ଉପରେ ସ୍ବତନ୍ତ୍ର ରିଲିଫ କମିଶନରଙ୍କ ପକ୍ଷରୁ କଟକଣା ଲାଗୁ କରାଯାଇଛି। ତେବେ ଏହା ସତ୍ତ୍ୱେ କେନ୍ଦୁଝର ଜିଲାର ଜଜାଙ୍ଗ ଲୌହ ଖଣି ପାଇଁ ଗ୍ରାମସଭା(ଜଙ୍ଗଲ ଜମି ଅଧିକାର ଆଇନ-୨୦୦୭) ଆୟୋଜନ କରି ଜନସମାବେଶ କରାଯାଇଥିବା ଘଟଣାକୁ ନେଇ ଅସନ୍ତୋଷ ଦେଖାଦେଇଛି। ଜିଲାରେ କୋଭିଡ୍ ସଂକ୍ରମଣ ବିଶେଷ କରି ଖଣି ଅଞ୍ଚଳରେ ଅଧିକ ଦେଖାଦେଇଥିବାରୁ ଗ୍ରାମସଭା ସ୍ଥଗିତ ରଖିବାକୁ ପଳସା ସରପଞ୍ଚ ନିରୁପମା ନାୟକ ଯୋଡା ବିଡିଓଙ୍କୁ ଚିଠି ନଂ. ୬୦/ ୫।୧।୨୦୨୧ରେ ଅବଗତ କରିଥିଲେ। କୋଭିଡ୍ କଟକଣା ଯୋଗୁ ସଦର ବ୍ଲକ ଟିକରପଡ଼ାରେ ରବିବାର ହେବାକୁ ଥିବା ଜନଶୁଣାଣିକୁ ସ୍ଥଗିତ କରାଯାଇଥିବା ବେଳେ ୭ ତାରିଖରେ ପଳସା ପଞ୍ଚାୟତ ଅଧୀନ ପଳସା(କ) ଗ୍ରାମରେ କିପରି ଗ୍ରାମସଭା ଅନୁଷ୍ଠିତ ହେଲା ତାହାକୁ ନେଇ ପରିବେଶବିତମାନେ ଚିନ୍ତାବ୍ୟକ୍ତ କରିଛନ୍ତି। ସମାବେଶ ଯୋଗୁ କରୋନା ବ୍ୟାପିବା ଆଶଙ୍କା ଥିଲେ ହେଁ କାହା ସ୍ବାର୍ଥରେ ପ୍ରଶାସନ ଗ୍ରାମସଭା ଆୟୋଜନ କରାଇଲା ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରକାଶ ଯେ, ଗତ ୬ ଏବଂ ୭ ତାରିଖରେ ଯୋଡା ବ୍ଲକର ଜଜାଙ୍ଗ, ହେସାବେଡା, ବନ୍ଧୁଆବେଡା, ପଳସା(କ) ଗାଁରେ ଜଙ୍ଗଲ ଜମିକୁ ଅଣ ଜଙ୍ଗଲ ଜମିରେ ପରିଣତ କରିବା ପାଇଁ ଗ୍ରାମସଭା କରାଯାଇଥିଲା। କଟକଣା ପାଇଁ ଏବଂ ସରକାରଙ୍କ କୋଭିଡ୍ ନିୟମକୁ ମାନି ବହୁ ଲୋକ ଗ୍ରାମସଭାରେ ଭାଗ ନେବା ପାଇଁ ଆଗ୍ରହୀ ଥିଲେ ମଧ୍ୟ ସରକାରଙ୍କ ନିୟମକୁ ପାଳନ କରି ଗ୍ରାମସଭାକୁ ଆସି ନ ଥିବା ଅଭିଯୋଗ ହୋଇଛି। ଫଳରେ ସେମାନେ ମତାମତ ଦେବାରୁ ବଞ୍ଚିତ ହୋଇଥିଲେ। ଫଳରେ ଗ୍ରାମ ସଭାର ସଫଳତାକୁ ନେଇ ମଧ୍ୟ ଗ୍ରାମବାସୀମାନେ ପ୍ରଶ୍ନ ଉଠାଇଛନ୍ତି। ଅନୁପସ୍ଥିତ ଗ୍ରାମବାସୀଙ୍କୁ ବିଭିନ୍ନ କଥା କହି ଗ୍ରାମସଭା ସଫଳ କରିବା ପାଇଁ ଘରକୁ ଯାଇ ଦସ୍ତଖତ ନିଆଯାଇଥିବା ନେଇ ହେଉଥିବା ଅଭିଯୋଗ ତଦନ୍ତ ସାପେକ୍ଷ। ଏଣୁ ଏହାର ତଦନ୍ତ କରି ପଦକ୍ଷେପ ଗ୍ରହଣ କରିବାକୁ ଦାବି ହେଉଛି। ଅନ୍ୟପକ୍ଷରେ ଯୋଡା ବିଡିଓ ଜଗନ୍ନାଥ ହନୁମାନ କହିଛନ୍ତି, କୋଭିଡ୍ ଆଇନର କାୈଣସି ଉଲ୍ଲଂଘନ ହୋଇନାହିଁ। ସମସ୍ତ ନୀତିନିୟମ ପାଳନ ହୋଇ ଗ୍ରାମସଭା ଅନୁଷ୍ଠିତ ହୋଇଛି।
