ଯାଜପୁର ଅଫିସ,୨୫ା୭: ସରକାରୀ ଜମି ଜବରଦଖଲ ଉଚ୍ଛେଦ ନେଇ ଯାଜପୁର ଜିଲା ପ୍ରଶାସନର ନୀତି ଅସ୍ପଷ୍ଟ ଓ ବିଚିତ୍ର। କେତେକ ସ୍ଥାନରେ ଜବରଦଖଲ ଯୋଗୁ ସରକାରୀ ଶିକ୍ଷାନୁଷ୍ଠାନ ପରିସର ସଙ୍କୁଚିତ ହୋଇ ତାହା ଅସାମାଜିକ ଲୋକଙ୍କ କବଜାକୁ ଚାଲିଯାଉଛି। ଆଉ କେଉଁଠି କେତେକ ଅସାଧୁ ଅଧିକାରୀଙ୍କ ନିଜସ୍ବ ସ୍ବାର୍ଥ ସାଧନ ପାଇଁ ବହୁ ମୂଲ୍ୟବାନ ସରକାରୀ ଜମିକୁ ସହରର ପ୍ରଭାବଶାଳୀ ବ୍ୟକ୍ତି ମାଡ଼ି ବସିଛନ୍ତି। ଜିଲା ରାଜସ୍ବ ବିଭାଗ ଏବଂ ପୌର ପ୍ରଶାସନର ଚରମ ନିଷ୍କ୍ରିୟତାର ସୁଯୋଗ ନେଇ ଜବରଦଖଲ ଜିଲାକୁ ଗ୍ରାସ କରି ଚାଲିଛି। ଏହି ବେଆଇନ କାର୍ଯ୍ୟ ସ୍ଥାନୀୟ ରାଜସ୍ବ ବିଭାଗ ଜାଣତରେ ଚାଲିଛି। ବିବାଦୀୟ ପରିସ୍ଥିତି କିମ୍ବା ଅଭିଯୋଗ ହେଲେ ଉଚ୍ଛେଦ ପାଇଁ ପ୍ରଶାସନ ତରଫରୁ ତପତ୍ରତା ପ୍ରକାଶ ପାଇଥାଏ। ନଚେତ୍ ଜବରଦଖଲ ଉଚ୍ଛେଦ ପାଇଁ ପ୍ରଶାସନର କୌଣସି ନିଜସ୍ବ ଅଭିଯାନ ଆଜିଯାଏ ହୋଇନାହିଁ। ଫଳରେ ଜିଲାର ଦୁଇ ସହର ବ୍ୟାସନଗର ଏବଂ ଯାଜପୁର ପୌର ପରିଷଦର ଜଳନିଷ୍କାସନ ଓ ଟ୍ରାଫିକ ସମସ୍ୟା ଉଦ୍ବେଗଜନକ ସ୍ଥିତିରେ ପହଞ୍ଚିଛି। ବ୍ୟାସନଗରର ଏନ୍ସି ହାଇସ୍କୁଲ ଜମିରେ କେତେକ ବସ୍ତି ଗଢ଼ିଉଠିଛି। ଫଳରେ ହାଇସ୍କୁଲ ପଡ଼ିଆ ସହ ସ୍କୁଲ ଗୃହ ବାଡ଼ ନିକଟ ଖୋଲା ଶୌଚାଳୟ ପାଲଟିଛି। ଏଠାରେ ଜାଗା ମିଶନରେ ଭୂମିହୀନଙ୍କୁ ଜମି ଅଧିକାର ପ୍ରମାଣପତ୍ର ଦେବା ସହ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ଯୋଗାଇ ଦେବାରେ ବିଫଳତା ଯୋଗୁ ସରକାରୀ ଜମି କ୍ରମଶଃ ସଙ୍କୁଚିତ ହେବାରେ ଲାଗିଛି।
ବସ୍ତି ବାସିନ୍ଦାଙ୍କୁ ଜମି ଅଧିକାର ପ୍ରମାଣ ପତ୍ର ଦେବାକୁ ୨୦୧୭ରେ ଜାଗା ମିଶନ କାର୍ଯ୍ୟକାରୀ ହୋଇଥିଲା। ଏହିକ୍ରମରେ ରାଜ୍ୟରେ ପ୍ରାୟ ୭୦ ହଜାର ପରିବାରଙ୍କୁ ଜମି ଅଧିକାର ପ୍ରମାଣପତ୍ର ଏବଂ ପ୍ରାୟ ୧ ଲକ୍ଷ ୫ ହଜାର ପରିବାରଙ୍କୁ ଜମି ହକଦାର ପ୍ରମାଣପତ୍ର ପ୍ରଦାନ କରାଯାଇଛି। ଜମି ଅଧିକାର ପ୍ରମାଣପତ୍ର ପାଇଥିବା ୭୦ ହଜାର ପରିବାରଙ୍କ ମଧ୍ୟରୁ ୪୫ ହଜାର ପରିବାର ପ୍ରଧାନମନ୍ତ୍ରୀ ଆବାସ ଯୋଜନା(ସହରୀ)ରେ ଅନ୍ତର୍ଭୁକ୍ତ ହୋଇଛନ୍ତି। ଏଥିପାଇଁ ୬୭୫ କୋଟି ଟଙ୍କା ବିନିଯୋଗ ହୋଇସାରିଛି ବୋଲି ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ସୂଚନା ମିଳିଛି। ହେଲେ ଏହି ଯୋଜନା ଯାଜପୁର ଜିଲାର ୨ ପୌର ପରିଷଦରେ ସେତେଟା ସଫଳ ହୋଇପାରିନାହିଁ। ଯାଜପୁର ସହରରେ କେବଳ ୨୧ ପରିବାର ଏହି ଯୋଜନାରେ ଉପକୃତ ହୋଇଥିବା ଜଣାପଡିଛି। ସେମାନଙ୍କୁ ଗୃହ ନିର୍ମାଣ ବାବଦକୁ ୨ ଲକ୍ଷ ଟଙ୍କା ଲେଖାଏ ସହାୟତା ପ୍ରଦାନ କରାଯିବ। ଏହାସହ ରାସ୍ତା, ପାଣି, ବିଦ୍ୟୁତ ଓ ଗୋଷ୍ଠୀ ଶୌଚାଳୟ ନିର୍ମାଣ କରାଯିବ ବୋଲି କୁହାଯାଇଥିଲା। କିନ୍ତୁ ବ୍ୟାସନଗରର ବିଭିନ୍ନ ବସ୍ତିରେ ଜାଗା ମିଶନ ଉପରେ କେବଳ ବୈଠକ କରି ଫଟୋଗୁଡିକୁ ସୋସିଆଲ ମିଡିଆରେ ଭାଇରାଲ କରାଯାଇ ବାହୁସ୍ଫୋଟ ମାରୁଥିବା ଦେଖିବାକୁ ମିଳିଛି। ଏଠାରେ ମୁଣ୍ଡୋମାଳ ବ୍ୟାସସରୋବର ରାସ୍ତା, ଏନ୍ସି ହାଇସ୍କୁଲ ପଛପଟ, କୁଷ୍ଠ କଲୋନୀ ଆଦି ଅଞ୍ଚଳକୁ ଉଦାହରଣ ଭାବେ ନିଆଯାଇପାରେ। ଜାଗା ମିଶନ ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବାରୁ ଏନ୍ସି ହାଇସ୍କୁଲର ପ୍ରାୟ ୧୭.୪୬ ଏକର ଜମିରୁ ଅଧିକାଂଶ ଜମି କେତେଜଣବ୍ୟକ୍ତିଙ୍କ କବଜାକୁ ଚାଲି ଯାଇଛି।
ଦ୍ରୁତ ଶିଳ୍ପାୟନ ଓ ବ୍ୟବସାୟିକ ଅଭିବୃଦ୍ଧି କାରଣରୁ ଜିଲାରେ ଜମିର ମୂଲ୍ୟ ଆଶାତୀତ ବୃଦ୍ଧି ପାଇଚାଲିଛି। ତା’ ସାଙ୍ଗକୁ ବହିରାଗତ ଲୋକଙ୍କ ସଂଖ୍ୟା ମଧ୍ୟ ବୃଦ୍ଧି ପାଇ ଏଠାରେ ଜମି ଅକ୍ତିଆର ପାଇଁ ପ୍ରତିଯୋଗିତା ଚାଲିଛି। ସରକାରୀ ଜମି ପ୍ରତି ଲୋଲୁପ ଦୃଷ୍ଟି ରଖୁଥିବା ପ୍ରତିପତ୍ତିଶାଳୀ ଓ ରାଜନୈତିକ ବ୍ୟକ୍ତିମାନେ ଅସାଧୁ ସରକାରୀ ଅଧିକାରୀଙ୍କୁ ହାତେଇ ଜବରଦଖଲ କରୁଛନ୍ତି। କେତେକ ସ୍ଥାନରେ ବେଆଇନ ଭାବରେ ଲିଜ୍ରେ ମଧ୍ୟ ଜମି ହାତେଇବାରେ ଏମାନେ ସକ୍ଷମ ହେଉଛନ୍ତି। ଜଳାଶୟଗୁଡିକୁ ପୋତି ବେଆଇନ କବଜା ମଧ୍ୟ କରିଗଲେଣି। ତହସିଲ ଅଫିସ ପକ୍ଷରୁ କେବଳ ଜବରଦଖଲ ମାମଲା ରୁଜୁ କରି ଚୁପ ହୋଇ ବସି ଯାଉଛନ୍ତି। ଏହି କେସ୍ଗୁଡିକ ବର୍ଷ ବର୍ଷ ଧରି ଫଇସଲା ନ ହୋଇ ପଡ଼ିରହୁଛି। ଫଳରେ ଜିଲାରେ ସମୁଦାୟ ୩,୭୬୩ଟି ରାଜସ୍ବ ଜନିତ ମକଦ୍ଦମା ପଡ଼ିରହିଛି। ଏଥିରେ ୬୬୫.୮୧୭ ଏକର ସରକାରୀ ଜମି ଜବରଦଖଲରେ ରହିଛି।
