କଟକ ଅଫିସ,୨୧ା୨:ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ହତ୍ୟା ମାମଲାର ଅଭିଯୁକ୍ତ ଗୋପାଳ ଦାସ ଜଣେ ମାନସିକ ରୋଗୀ। ତାଙ୍କର ଦୀର୍ଘଦିନ ଧରି ମାନସିକ ଅସୁସ୍ଥତାର ଇତିହାସ ରହିଛି। ଗୋପାଳଙ୍କ ମାନସିକ ଅସୁସ୍ଥତାର ସ୍ଥିତି ପରୀକ୍ଷା ପାଇଁ ଗଠିତ ସ୍ବତନ୍ତ୍ର ମେଡିକାଲ ବୋର୍ଡର ୪ଜଣିଆ ମାନସିକ ରୋଗ ବିଶେଷଜ୍ଞ କ୍ରାଇମ୍ବ୍ରାଞ୍ଚକୁ ଏଭଳି ରିପୋର୍ଟ ପ୍ରଦାନ କରିଛନ୍ତି। ଏଥିସହ ଅଭିଯୁକ୍ତଙ୍କ ମାନସିକ ଅସୁସ୍ଥତା ସମ୍ପର୍କିତ ନିର୍ଦ୍ଦିଷ୍ଟ ସିଦ୍ଧାନ୍ତରେ ପହଞ୍ଚତ୍ବା ପାଇଁ ଆହୁରି ଟିକିନିଖି ପରୀକ୍ଷାର ଆବଶ୍ୟକତା ରହିଛି ବୋଲି ବିଶେଷଜ୍ଞ କମିଟି ମତ ଦେଇଛନ୍ତି। ମେଡିକାଲ ବୋର୍ଡର ଏହି ରିପୋର୍ଟ ଉପରେ କ୍ରାଇମ୍ବ୍ରାଞ୍ଚ କର୍ନାଟକର ବେଙ୍ଗାଲୁରୁସ୍ଥିତ ନିମହାନ୍ସଠାରେ ଅଭିଯୁକ୍ତଙ୍କ ମାନସିକ ସ୍ଥିତି ସଂକ୍ରାନ୍ତୀୟ ମୂଲ୍ୟାୟନ ପାଇଁ ଅନୁମତି ଦେବାକୁ ଝାରସୁଗୁଡ଼ା ଜେଏମ୍ଏଫ୍ସି-୧ କୋର୍ଟରେ ଆବେଦନ କରିଥିଲା। ୪ଜଣିଆ ମେଡିକାଲ ବୋର୍ଡର ସଦସ୍ୟମାନେ ପୂର୍ବରୁ ଗୋପାଳଙ୍କ ସ୍ବାସ୍ଥ୍ୟାବସ୍ଥା ପରୀକ୍ଷା କରିବା ପରେ ଉଚ୍ଚତର ପରୀକ୍ଷା ପାଇଁ ସୁପାରିସ୍ କରିଥିବା ଅଦାଲତଙ୍କ ଦୃଷ୍ଟି ଆକର୍ଷଣ କରିଥିଲେ। କିନ୍ତୁ କ୍ରାଇମ୍ବ୍ରାଞ୍ଚର ଏହି ଆବେଦନକୁ ଝାରସୁଗୁଡ଼ା ଜେଏମ୍ଏଫ୍ସି ଖାରଜ କରିଦେଇଛନ୍ତି। କ୍ରାଇମ୍ବ୍ରାଞ୍ଚ ଗୋପାଳଙ୍କ ମାନସିକ ଅସୁସ୍ଥତାର ପରୀକ୍ଷା ନିମନ୍ତେ ଅଦାଲତ ଅନୁମତି ଦେବାକୁ ଉଚ୍ଚତର ଫୋରମରେ ଆବେଦନ କରିବ ବୋଲି ଜଣାପଡ଼ିଛି।
