ବର୍ତ୍ତମାନ ପାର୍ବଣ ଋତୁ ଆରମ୍ଭ ହୋଇଯାଇଛି। ସାଧାରଣତଃ ଯେ କୌଣସି ପୂଜା ପାର୍ବଣ ପଡ଼ିଲେ ସୁନା କିଣାବିକାର ଚାହିଦା ଟିକେ ବଢ଼ିଯାଇଥାଏ। ବିଶେଷକରି ଦୁର୍ଗାପୂଜା, ଧନନ୍ତ୍ୱରୀ, ଦୀପାବଳି ଆଦିରେ ସୁନା ବିକ୍ରି ଅଧିକ ହୋଇଥାଏ। ବର୍ତ୍ତମାନ ବିଶ୍ୱରେ କରୋନା ମହାମାରୀ କାୟା ବିସ୍ତାର କରିଥିବାରୁ ସୁନା ବେପାର ମାନ୍ଦା ରହିଛି। ତଥାପି ସୁନାର ଦର୍ କମୁନାହିଁ। ସୁନାର ଦାମ୍ ବଢୁଥିବାରୁ ମନରେ ପ୍ରଶ୍ନ ଉଠୁଛି କ’ଣ ଖଣିରୁ ସୁନା ଶେଷ ହୋଇଗଲାକି? ଆପଣ ଏକଥା କେବେ ଭାବିଛନ୍ତି କି, ଯଦି ପୃଥିବୀରୁ ସୁନା ସମ୍ପୂର୍ଣ୍ଣ ଶେଷ ହୋଇଯିବ ତେବେ କ’ଣ ହେବ ବୋଲି। ତେବେ ଜାଣନ୍ତୁ ଏ ସମ୍ପର୍କରେ କ’ଣ କୁହନ୍ତି ବୈଜ୍ଞାନିକ…
ବିଶେଷଜ୍ଞ କିଛିଦିନ ତଳେ ସୁନା ଶେଷ ହୋଇଯିବାର କଥା କହିଥିଲେ। ଏହାକୁ ପିକ୍ ଗୋଲ୍ଡ କହନ୍ତି। କିଛି ବିଶେଷଜ୍ଞଙ୍କ ମତରେ ପୃଥିବୀରୁ ସୁନା ସରିଯିବ। ଓ୍ବାଲର୍ଡ ଗୋଲ୍ଡ କାଉନସିଲର ଏକ ରିପୋର୍ଟ ଅନୁଯାୟୀ, ୨୦୧୯ରେ ସମଗ୍ର ବିଶ୍ୱରେ ପ୍ରାୟ ୩,୫୩୧ ଟନ୍ ସୁନା ବାହାରିଥିଲା। କିନ୍ତୁ ଆଗାମୀ ବର୍ଷରେ ସୁନା ଆହୁରି କମ୍ ବାହାରିବ। ଏହାସହିତ ନୂଆ ଖଣି ଅନୁସନ୍ଧାନ ମଧ୍ୟ କମ୍ ରହୁଛି।
ବିଶ୍ୱରେ କେତେ ସୁନା ବାକି ଅଛି କେତେକ ଖନନ କମ୍ପାନୀ ଅନୁମାନ ଲଗାଇଛନ୍ତି। ଓ୍ବାଲର୍ଡ ଗୋଲ୍ଡ କାଉନସିଲ(ଡବ୍ଲୁଜିସି) ଅନୁସାରେ ବର୍ତ୍ତମାନ ପୃଥିବୀରେ ୫୪,୦୦୦ ଟନ୍ ସୁନା ଅଛି। ଯାହାର ଖନନ ଏବେ ବି ବାକି ଅଛି। ଏଥିରୁ ୩୦ ପ୍ରତିଶତ ସୁନା ବାହାର କରାଯାଇଛି। ଅବଶିଷ୍ଟ ସୁନା ଘର ଏବଂ ବ୍ୟାଙ୍କକୁ ଯାଇଛି।
ବୈଷୟିକ କମ୍ପାନୀ ଗୋଲ୍ଡମ୍ୟାନ ସୈଶ ଅନୁଯାୟୀ, ୨୦୩୫ରେ ପୃଥିବୀରୁ ସମ୍ପୂର୍ଣ୍ଣ ସୁନା ଶେଷ ହୋଇଯିବ। ସବୁ ଖଣିରୁ ସୁନା ସରିଆସିଲାଣି। ଅନ୍ୟପକ୍ଷରେ ନୂଆ ଖଣିର ସନ୍ଧାନ କରାଯାଉ ନ ଥିବାରୁ ଏପରି ସ୍ଥିତି ଉପୁଜିଥିବା ବିଶେଷଜ୍ଞମାନେ କୁହନ୍ତି।
