ସାକ୍ଷୀଗୋପାଳ,୨୧ା୫(ଡି.ଏନ୍.ଏ.): ପୁରୀ ଜିଲା ସାକ୍ଷୀଗୋପାଳ ମନ୍ଦିର ଭଣ୍ଡାରରୁ ୧୯୮୦ ମସିହାରେ ଚୋରି ହୋଇଥିବା ଗୋଟିଏ ସୁନାହାର ଓ ଦୁଇଟି କଟକି ଖଡୁ ଦୀର୍ଘ ୪୨ ବର୍ଷରେ ଶନିବାର ମନ୍ଦିରକୁ ଫେରିଛି। ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ସନ୍ତ ପ୍ରଧାନ ଏହି ଅଳଙ୍କାର ପୁରୀ ସିଜେଏମ୍ଙ୍କ କୋର୍ଟରୁ ସଂଗ୍ରହ କରିବା ପରେ ମୋଟ୍ ୬୩. ୩୪ ଗ୍ରାମ ଓଜନର ଅଳଙ୍କାର ମନ୍ଦିର ସୁପରଭାଇଜର ବିଶ୍ବନାଥ ମହାପାତ୍ରଙ୍କ ଜରିଆରେ ପାଳିଆ ଭଣ୍ଡାର ମେକାପ ଦୁର୍ଗା ମେକାପଙ୍କୁ ହସ୍ତାନ୍ତର କରାଯାଇଛି।
ସୂଚନାଯୋଗ୍ୟ, ଠାକୁରଙ୍କ ଭଣ୍ଡାର ଦାୟିତ୍ୱରେ ରହୁଥିବା ପାଳିଆ ଭଣ୍ଡାର ମେକାପ ସେବକଙ୍କ ଦାୟିତ୍ୱ ହସ୍ତାନ୍ତର ସମୟରେ ଉକ୍ତ ଅଳଙ୍କାର ଚୋରି ହୋଇଥିବା ଘଟଣା ପ୍ରଥମେ ନଜରକୁ ଆସିଥିଲା। ସାକ୍ଷୀଗୋପାଳ ମନ୍ଦିର ପ୍ରଶାସନ ପକ୍ଷରୁ ସେହି ସମୟର ଭଣ୍ଡାର ମେକାପ ସ୍ବର୍ଗତ କାଶୀନାଥ ମେକାପଙ୍କୁ ଦାୟୀ କରାଯାଇ ମାମଲା ରୁଜୁ କରାଯାଇଥିଲା। ଏନେଇ କେସ୍ ନଂ ୧୨୩୪/ ୧୯୮୦ ବିଚାର ଚାଲିଥିଲେ ମଧ୍ୟ ଚୋରି ଅଳଙ୍କାର ପତ୍ତା ମିଳି ନ ଥିଲା। ସେତେବେଳେ ବିଶ୍ୱସ୍ତ ସୂତ୍ରରୁ ଖବର ପାଇ ପ୍ରଥମେ ଠାକୁରଙ୍କ ଚୋରି ଗହଣା ସାକ୍ଷୀଗୋପାଳ ଷ୍ଟେଟ୍ବ୍ୟାଙ୍କ ଶାଖାରେ ବନ୍ଧା ପଡ଼ିଥିବା ଖବର ‘ଧରିତ୍ରୀ’ରେ ପ୍ରକାଶ ପାଇଥିଲା। ଯାହାକୁ ନେଇ ମାମଲାର ତଦନ୍ତ ନୂଆମୋଡ଼ ନେଇଥିଲା। ପୂବର୍ରୁ ସନ୍ଦେହଘେରରେ ରହିଥିବା ଅନ୍ୟ ଜଣେ ମେକାପ ସେବକ ସ୍ବର୍ଗତ ବଳଭଦ୍ର ମେକାପ ବ୍ୟାଙ୍କରେ ଅଳଙ୍କାର ବନ୍ଧା ପକାଇଥିବା କାରଣରୁ ତାଙ୍କୁ ମାମଲାରେ ଛନ୍ଦି ହୋକୁ ପଡ଼ିଥିଲା। ପୋଲିସ ସାକ୍ଷୀଗୋପାଳ ଷ୍ଟେଟବ୍ୟାଙ୍କରୁ ଅଳଙ୍କାର ଜବତ କରି କୋର୍ଟରେ ଜିମା ଦେଇଥିଲେ। ଏପରିକି ସିଂହାରୀ ଓ ଅନ୍ୟ ମେକାପ ସେବକ କୋର୍ଟରେ ଠାକୁରଙ୍କ ଅଳଙ୍କାର ଚିହ୍ନଟ କରିବା ପରେ ମଧ୍ୟ ପ୍ରାଥମିକ ଅଭିଯୋଗ ଏବଂ ଜବତ ଅଳଙ୍କାର ପରିମାଣରେ ବ୍ୟତିକ୍ରମ ରହିଥିବା ଦୃଷ୍ଟିକୁ ଆସିଥିଲା। ମାନ୍ୟବର କୋର୍ଟ ଅଭିଯୁକ୍ତ ସେବକ ଦ୍ବୟଙ୍କୁ ଦଣ୍ଡବିଧାନ କରିଥିଲେ। ମାତ୍ର ଅଭିଯୁକ୍ତମାନେ ପୁରୀ ଜିଲା ଜଜ୍ଙ୍କ ନିକଟରେ ପୁନର୍ବିଚାର ପାଇଁ ଆବେଦନ କରି ନିର୍ଦ୍ଦୋଷରେ ଖଲାସ ହୋଇଥିଲେ। ସରକାରଙ୍କ ପକ୍ଷରୁ ମାମଲା ଉଚ୍ଚ ନ୍ୟାୟାଳୟକୁ ଯାଇଥିଲା। ମାନ୍ୟବର ଉଚ୍ଚ ନ୍ୟାୟାଳୟ ୧୯. ୦୩. ୨୦୦୯ ରେ ନିମ୍ନ ଅଦାଲତଙ୍କ ଆଦେଶ ବଳବତ୍ତର ରଖି ଅଭିଯୁକ୍ତଙ୍କୁ ନିର୍ଦ୍ଦୋଷ କହିଥିଲେ। ସାକ୍ଷୀଗୋପାଳଙ୍କ ଜବତ ଅଳଙ୍କାର ଠାକୁରଙ୍କୁ ଫେରାଇ ଦେବାକୁ ଆଦେଶ ପ୍ରଦାନ କରିଥିଲେ। ଶନିବାର ମନ୍ଦିରକୁ ଅଳଙ୍କାର ଫେରାଇବା ସମୟରେ କାର୍ଯ୍ୟନିର୍ବାହୀ ଅଧିକାରୀ, ସୁପରଭାଇଜର, ମନ୍ଦିର ସ୍ବର୍ଣ୍ଣକାର କୃଷ୍ଣଚନ୍ଦ୍ର ମହାପାତ୍ର, ସେବାୟତ ସଂଘ ସମ୍ପାଦକ ବିଜୟ କୁମାର ନନ୍ଦ, ସେବାୟତ ରାମଚନ୍ଦ୍ର ମହାପାତ୍ର, ଜିତେନ ମହାପାତ୍ର ପ୍ରମୁଖ ଉପସ୍ଥିତ ଥିଲେ।
