ଅହମଦାବାଦ, ୧ା୧୧: ଗୁଜରାଟର ମୋର୍ବିସ୍ଥିତ ମାଛୁ ନଦୀରେ ରବିବାର ଝୁଲାପୋଲ ଭାଙ୍ଗିବା ଘଟଣାରେ ବିରୋଧୀ ରାଜ୍ୟରେ ଥିବା ଭାଜପା ସରକାର ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ବରିଷ୍ଠ କଂଗ୍ରେସ ନେତା ଦିଗ୍ବିଜୟ ସିଂ ପୋଲ ଭୁଶୁଡ଼ିବା ଉପରେ ପ୍ରଶ୍ନ ଉଠାଇଛନ୍ତି। ଏହା ବାସ୍ତବରେ ଈଶ୍ୱରକୃତ ନା ଜାଲିଆତିର ପରିଣାମ ବୋଲି ସେ ପଚାରିଛନ୍ତି। ୨୦୧୬ରେ ପଶ୍ଚିମବଙ୍ଗରେ ବିବେକାନନ୍ଦ ରୋଡ୍ ଫ୍ଲାଏଓଭର ଭାଙ୍ଗିବା ଯୋଗୁ ଅନେକଙ୍କ ମୃତ୍ୟୁ ଘଟିଥିଲା। ଏହାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ରାଲିରେ ମମତା ବାନାର୍ଜୀଙ୍କ ସରକାରକୁ ସମାଲୋଚନା କରିଥିଲେ। ଅନୁରୂପ ଘଟଣା ଗୁଜରାଟରେ ଘଟିଥିବାବେଳେ ଏଥିପାଇଁ କିଏ ଦାୟୀ ବୋଲି ଦିଗ୍ବିଜୟ ପ୍ରଶ୍ନ କରିଛନ୍ତି। ଗୁଜରାଟରେ ୨୭ ବର୍ଷ ହେଲା ଭାଜପା କ୍ଷମତାରେ ରହିଛି। ଚଳିତ ବର୍ଷ ଜୁଲାଇରେ କୁଚ୍ ଜିଲାରେ ନର୍ମଦା କେନାଲ ଖୋଳାଯାଇଥିବବେଳେ ପରୀକ୍ଷଣର ପ୍ରଥମ ଦିନରେ ହିଁ ତାହା ଭାଙ୍ଗିଯାଇଥିଲା। ସେହିପରି ଭୁଜରେ ୮/୯ ବର୍ଷ ସମୟ ଲାଗି ନିର୍ମାଣ ହୋଇଥିବା ଏକ ଓଭରବ୍ରିଜ୍ର ମାତ୍ର ବର୍ଷକରେ ମରାମତି ଆବଶ୍ୟକ କଲାଣି ବୋଲି ଦିଗ୍ବିଜୟ କହିଥିଲେ। ତେଣୁ ସଦ୍ୟ ଘଟଣାରେ ସବୁଦିଗରୁ ତଦନ୍ତ କରାଯିବାକୁ ସେ ଦାବି କରିଛନ୍ତି।
କଂଗ୍ରେସ ନେତା ରଣଦୀପ ସୂର୍ଯ୍ୟଓ୍ବୋଲା କହିଛନ୍ତି, ବିନା ଫିଟ୍ନେସ ସାର୍ଟିଫିକେଟରେ ଉକ୍ତ ବ୍ରିଜ୍ ଖୋଲାଯାଯାଇଥିଲା। ଭାଜପା ସରକାର କିପରି ତାହାକୁ ଖୋଲିବାକୁ ଅନୁମତି ଦେଇଥିଲେ। ଏହା ଏକ ଷଡ଼ଯନ୍ତ୍ର ନୁହେଁ କି ବୋଲି ସେ ପ୍ରଶ୍ନ କରିଛନ୍ତି। ନବନିର୍ବାଚିତ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି, ମାତ୍ର ୫ ଦିନ ତଳେ ଉକ୍ତ ବ୍ରିଜ୍ ଖୋଲାଯାଇଥିଲା। ରବିବାର ସେଠାକୁ ଏତେ ସଂଖ୍ୟାରେ ଲୋକଙ୍କୁ ପ୍ରବେଶ ପାଇଁ କାହିଁକି ଏବଂ କିଏ ଅନୁମତି ଦେଇଥିଲା ତାହା ତଦନ୍ତ ସାପେକ୍ଷ। ସୁପ୍ରିମକୋର୍ଟ କିମ୍ବା ହାଇକୋର୍ଟର ଜଣେ ଅବସରପ୍ରାପ୍ତ ବିଚାରପତିଙ୍କ ତତ୍ତ୍ୱାବଧାନରେ ଏହାର ଯାଞ୍ଚ ହେବା ଉଚିତ ବୋଲି ସେ କହିଛନ୍ତି। ଏହା ଏକ ଆପରାଧିକ ଅବହେଳା। ଦୋଷୀଙ୍କ ବିରୋଧରେ ତ୍ୱରିତ ଭିତ୍ତିରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବାକୁ ସେ ଦାବି କରିଛନ୍ତି। ଭାଜପା ସରକାରର ଏହା ଏକ ବଡ଼ ଅବହେଳା ବୋଲି ସିବିଆଇ ଏମ୍ପି ବିନୟ ବିଶ୍ୱମ୍ କହିଛନ୍ତି।
